ಉತ್ಪಾದನಾ ವಲಯದಲ್ಲಿ ಸವಾಲುಗಳಿದ್ದರೂ ಅಷ್ಟೇ ಅವಕಾಶಗಳಿವೆ: ಗುಂಜನ್ ಕೃಷ್ಣ

ಬೆಂಗಳೂರಿನ ಖಾಸಗಿ ಹೋಟೆಲ್​ನಲ್ಲಿ ಬಿಸಿಐಸಿ ಆಯೋಜಿಸಿದ್ದ ಜಾಗತಿಕ ಉತ್ಪಾದನಾ ಸಮಾವೇಶವನ್ನು ಕರ್ನಾಟಕ ಸರ್ಕಾರದ ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ನಿರ್ದೇಶಕಿ ಹಾಗೂ ಕೈಗಾರಿಕಾ ಅಭಿವೃದ್ಧಿ ಆಯುಕ್ತೆ ಗುಂಜನ್ ಕೃಷ್ಣ ಉದ್ಘಾಟಿಸಿದರು.

ಬೆಂಗಳೂರು: ಜಗತ್ತಿನಲ್ಲಿ ಪ್ರಸ್ತುತ ಬದಲಾವಣೆಗಳ ವೇಗ ಹೆಚ್ಚಾಗಿದೆ. ಕೋವಿಡ್ ಸಾಂಕ್ರಾಮಿಕದ ನಂತರ ಗಮನಾರ್ಹ ಬದಲಾವಣೆಗಳ ಸ್ಥಿತಿಯಲ್ಲಿದ್ದೇವೆ. ಇದು ನಾಲ್ಕು ಪಟ್ಟು ಹೆಚ್ಚು ಸವಾಲುಗಳನ್ನು ಉತ್ಪಾದನಾ ಕ್ಷೇತ್ರದಲ್ಲಿ ನಮಗೆ ಒಡ್ಡಿದೆಯಾದರೂ, ಅಷ್ಟೇ ಅವಕಾಶಗಳೂ ಸಹ ಸೃಷ್ಟಿಯಾಗಿವೆ ಎಂದು ಕರ್ನಾಟಕ ಸರ್ಕಾರದ ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ನಿರ್ದೇಶಕಿ ಹಾಗೂ ಕೈಗಾರಿಕಾ ಅಭಿವೃದ್ಧಿ ಆಯುಕ್ತೆ ಗುಂಜನ್ ಕೃಷ್ಣ ಹೇಳಿದರು.

ಹವಾಮಾನ ಬದಲಾವಣೆ ಮತ್ತು ಜಾಗತಿಕ ತಾಪಮಾನದ ಹೆಚ್ಚಳದ ಕಡೆಗೆ ಗಮನಹರಿಸಬೇಕಾದ ಅಗತ್ಯವಿದೆ. ನಮ್ಮ ಉತ್ಪಾದನಾ ಪ್ರಕ್ರಿಯೆಗಳು ಪರಿಸರದ ಮೇಲೆ ಉಂಟುಮಾಡುವತಹ ಪರಿಣಾಮ ಕಡಿಮೆ ಮಾಡಬೇಕಾದ ಅಗತ್ಯ ಕೂಡ ನಮಗಿದೆ. ಜಾಗತಿಕ ಅನಿಶ್ಚಿತತೆಯ ನಡುವೆ ಜಾಗತಿಕ ರಾಜಕೀಯ ಬೆಳವಣಿಗೆಗಳನ್ನು ನಿಭಾಯಿಸುವುದು ಮತ್ತು ಅವಕಾಶಗಳನ್ನು ಸ್ವಾಧೀನಪಡಿಸಿಕೊಳ್ಳುವುದು ಎರಡನೇಯ ಸವಾಲು. ಪ್ರಸ್ತುತ ಬಹಳಷ್ಟು ಹೂಡಿಕೆ ಆಗ್ನೇಯ ಏಷ್ಯಾದ ಕಡೆ ಬರುತ್ತದೆ. ಈ ಅವಕಾಶಗಳನ್ನು ಬಳಸಿಕೊಳ್ಳಲು ನಾವೆಲ್ಲರೂ ಒಟ್ಟಾಗಿ ಕೆಲಸ ಮಾಡುವುದು ಅಗತ್ಯ ಎಂದರು.

ಮೂರನೇಯ ಸವಾಲು ಜಾಗತಿಕ ಉತ್ಪಾದನೆಯಲ್ಲಿ ಕೃತಕ ಬುದ್ಧಿವಂತಿಕೆ ಬಳಕೆಯನ್ನು ಹೆಚ್ಚಿಸುವುದಾಗಿದೆ. ಮುಂದುವರಿದ ದೇಶಗಳು ರೋಬೋಟಿಕ್ಸ್ ಕಡೆಗೆ ಸಾಗುತ್ತಿದ್ದರೆ ಭಾರತದಂಥ ದೇಶ ತನ್ನ ವಿಸ್ತಾರವಾದ ಜನಸಂಖ್ಯೆಯ ಜೊತೆಗೆ ಕೃತಕ ಬುದ್ಧಿವಂತಿಕೆಯ ಅಳವಡಿಕೆಯೊಂದಿಗೆ ಉದ್ಯೋಗ ಸೃಷ್ಟಿಯ ಕಡೆಗೆ ಗಮನ ನೀಡುವುದು ಅಗತ್ಯ ಎಂದು ಹೇಳಿದರು.

ಜಾಗತಿಕ ಬದಲಾವಣೆಗಳಿಂದ ಮೂರನೇ ಸವಾಲು ಹೊರಹೊಮ್ಮುತ್ತಿದೆ. ಕೆಲವು ದೇಶಗಳಲ್ಲಿ ವೃದ್ಧರ ಸಂಖ್ಯೆ ಹೆಚ್ಚುತ್ತಿರುವುದು ನಮಗೆ ಅವಕಾಶಗಳನ್ನು ಸೃಷ್ಟಿಸುತ್ತಿದೆ. ಅಲ್ಲಿ ನಾವು ಸ್ಪರ್ಧಾತ್ಮಕ ಉತ್ಪಾದನಾ ಪರಿಹಾರಗಳನ್ನು ಪೂರೈಸಬೇಕಷ್ಟೇ. ಸಮರ್ಥ ಮತ್ತು ಸ್ವಯಂಚಾಲಿತ ಪ್ರಕ್ರಿಯೆಗಳನ್ನು ಕೈಗಾರಿಕೆಗಳು ಕೈಗೊಳ್ಳುತ್ತಿದ್ದು, ಅದರ ಬಗ್ಗೆ ಎಚ್ಚರಿಕೆ ವಹಿಸಿ ನಾವೀನ್ಯತೆಯ ಕಡೆಗೆ ಗಮನ ನೀಡಬೇಕಿದೆ ಎಂದರು.

ಕರ್ನಾಟಕ ಸರ್ಕಾರ ಆಂತರಿಕ ಉತ್ಪನ್ನಕ್ಕೆ ಗಮನಾರ್ಹ ಮೌಲ್ಯವರ್ಧನೆಗಳ ಕಡೆಗೆ ಕಣ್ಣಿಟ್ಟಿದೆ. ಪ್ರವರ್ಧಮಾನಕ್ಕೆ ಬರುತ್ತಿರುವ ತಂತ್ರಜ್ಞಾನಗಳು ಮತ್ತು ಕೌಶಲ್ಯಪೂರ್ಣ ಕೆಲಸಗಾರರ ಪ್ರಾಮುಖ್ಯತೆಯ ಕಡೆಗೆ ಸರ್ಕಾರ ಒತ್ತು ನೀಡಿದೆ. ಇದು ಬೆಳವಣಿಗೆಗೆ ಅವಕಾಶ ಮಾಡಿಕೊಡಲಿದೆ.

ತಂತ್ರಜ್ಞಾನ ಉನ್ನತೀಕರಣ ಮತ್ತು ಉದ್ಯೋಗಾವಕಾಶಗಳ ಸೃಷ್ಟಿ ನಡುವೆ ಸಮತೋಲನದ ಖಾತ್ರಿ ಮಾಡಿಕೊಳ್ಳುವುದು, ಅದರಲ್ಲಿಯೂ ವಿಶೇಷವಾಗಿ ಯುವ ಮತ್ತು ಬೆಳೆಯುತ್ತಿರುವ ಜನಸಂಖ್ಯೆ ಕಡೆಗೆ ಗಮನ ನೀಡುವುದು ಮುಖ್ಯವಾಗಿದೆ. ಈ ನಿಟ್ಟಿನಲ್ಲಿ ಸರ್ಕಾರ ಕೈಗಾರಿಕಾ ಮೂಲಸೌಕರ್ಯ ಸುಧಾರಿಸಲು ಶ್ರಮಿಸುತ್ತಿದೆ ಎಂದು ಗುಂಜನ್ ಕೃಷ್ಣ ಹೇಳಿದರು.

ಟಿವಿಎಸ್ ಮೋಟಾರ್ ಕಂಪನಿಯ ಹಿರಿಯ ಉಪಾಧ್ಯಕ್ಷ ಮತ್ತು ಬಿಸಿಐಸಿ ಅಧ್ಯಕ್ಷ ಡಾ. ಎಸ್. ದೇವರಾಜನ್ ಅಧ್ಯಕ್ಷೀಯ ಭಾಷಣ ಮಾಡಿ, 2030ರ ಹೊತ್ತಿಗೆ ಶೇ.8ರಿಂದ 10ರಷ್ಟು ಬೆಳವಣಿಗೆ ದರವನ್ನು ಸಾಧಿಸುವ ಸಾಮರ್ಥ್ಯ ಭಾರತಕ್ಕಿದೆ ಎಂದು ಹೇಳಿದರು.

ಟೇಗುಟೆಕ್ ಇಂಡಿಯಾ ವ್ಯವಸ್ಥಾಪಕ ನಿರ್ದೇಶಕ ಎಲ್.ಕೃಷ್ಣನ್ ಉತ್ಪಾದನಾ ಕ್ಷೇತ್ರದ ಸುತ್ತ ಸಕಾರಾತ್ಮಕತೆ ಮತ್ತು ಆಶಾವಾದದ ಭಾವನೆ ಇದೆ. ಪ್ರಸ್ತುತ ಭಾರತ ಜಗತ್ತಿನಲ್ಲಿ ಎರಡನೇ ಪ್ರತಿಷ್ಟಿತ ಉತ್ಪಾದನಾ ತಾಣವಾಗಿದೆ. ದೇಶದ ಒಟ್ಟಾರೆ ಆಂತರಿಕ ಉತ್ಪನ್ನಕ್ಕೆ ಉತ್ಪಾದನಾ ಕ್ಷೇತ್ರವು ಸುಮಾರು ಶೇ.16-17ರಷ್ಟು ಕೊಡುಗೆ ನೀಡುತ್ತಿದೆ ಎಂದು ತಿಳಿಸಿದರು.

ಏಸ್ ಡಿಸೈರ‍್ಸ್ ಲಿಮಿಟೆಡ್‌ನ ಮುಖ್ಯ ಕಾರ್ಯಾಚರಣೆ ಅಧಿಕಾರಿ ಮತ್ತು ಬಿಸಿಐಸಿಯ ಉತ್ಪಾದನಾ ಪರಿಣತರ ಸಮಿತಿಯ ಚೇರ್ಮನ್ ಜಿ. ಪ್ರಕಾಶ್ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.

ಇದನ್ನೂಓದಿ: ಬೆಂಗಳೂರು: ಸುರಕ್ಷಿತ ರಸ್ತೆ ನಿರ್ಮಿಸಲು 'ನಮ್ಮ ರಸ್ತೆ' ಪ್ರದರ್ಶನ ಕಾರ್ಯಾಗಾರ