ಆಸ್ತಿ ತೆರಿಗೆ ಪರಿಶೀಲನೆಗೆ ಅಧಿಕಾರಿಗಳಿಂದ ಉದಾಸೀನ ಧೋರಣೆ: ಬಿಬಿಎಂಪಿ ಆಯುಕ್ತ

ಬಿಬಿಎಂಪಿ ವ್ಯಾಪ್ತಿಯ ಸ್ವಯಂ ಘೋಷಿತ ಆಸ್ತಿ ತೆರಿಗೆ ವ್ಯವಸ್ಥೆ (ಎಸ್ಎಎಸ್) 2008ರಿಂದ ಜಾರಿಗೆ ಬಂದರೂ ಕೂಡ ಇದರ ಪರಿಶೀಲನೆ ಮಾಡುವಲ್ಲಿ ಅಧಿಕಾರಿಗಳು ಉದಾಸೀನ ಧೋರಣೆ ತೋರಿದ್ದರು ಎಂದು ಬಿಬಿಎಂಪಿ ಆಯುಕ್ತ ಬಿ. ಹೆಚ್. ಅನಿಲ್ ಕುಮಾರ್ ತಿಳಿಸಿದರು.

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯ ಸ್ವಯಂಘೋಷಿತ ಆಸ್ತಿ ತೆರಿಗೆ ವ್ಯವಸ್ಥೆ (ಎಸ್ಎಎಸ್)ಯು 2008ರಿಂದ ಜಾರಿಗೆ ಬಂದರು ಕೂಡ ಇದರ ಪರಿಶೀಲನೆ ಮಾಡುವಲ್ಲಿ ಅಧಿಕಾರಿಗಳು ಉದಾಸೀನ ಧೋರಣೆ ತೋರಿದ್ದರು ಎಂದು ಬಿಬಿಎಂಪಿ ಆಯುಕ್ತ ಬಿ. ಹೆಚ್. ಅನಿಲ್ ಕುಮಾರ್ ತಿಳಿಸಿದರು.

ಕೌನ್ಸಿಲ್ ಸಭೆಯಲ್ಲಿ ಮಾತನಾಡಿದ ಅವರು, ನಗರ ಬೆಳೆಯುತ್ತಿದ್ದರೂ ಕೂಡ ಆದಾಯ ಮಾತ್ರ ಬಿಬಿಎಂಪಿ ಆದಾಯ ವೃದ್ಧಿಸುತ್ತಿಲ್ಲ. ಎಸ್ಎಎಸ್​ನ್ನು ಪರಿಣಾಮಕಾರಿಯಾಗಿ ಜಾರಿ ಮಾಡುತ್ತೇವೆ. ನಿಯಮಗಳನ್ನು ಬಿಗಿಗೊಳಿಸುತ್ತೇವೆಂದು ತಿಳಿಸಿದರು.

ಟೋಟಲ್ ಸ್ಟೇಷನ್ ಸರ್ವೆಯ ವರದಿಯಂತೆ ತೆರಿಗೆ ಹಾಗೂ ದಂಡ ವಸೂಲಿ ಮಾಡದ, ತಪ್ಪಿತಸ್ಥ ಅಧಿಕಾರಿಗಳು ಯಾರೇ ಇದ್ದರೂ ಕ್ರಮ ತೆಗೆದುಕೊಳ್ಳಲಾಗುವುದು. ಸದ್ಯ ಹಣಕಾಸು ವಿಶೇಷ ಆಯುಕ್ತ ಲೋಕೇಶ್ ನೇತೃತ್ವದ ಸಮಿತಿಯು ಈ ಬಗ್ಗೆ ಪರಿಶೀಲಿಲನೆ ನಡೆಸುತ್ತಿದೆ ಎಂದರು.

ಆಸ್ತಿಯ ಮಾಲೀಕರು ತಪ್ಪು ಆಸ್ತಿ ಘೋಷಿಸಿಕೊಂಡಿದ್ದರೆ ಅದನ್ನು ಪರಿಶೀಲಿಸುವ ವ್ಯವಸ್ಥೆ ಪಾಲಿಕೆಯಲ್ಲಿಲ್ಲ. ಟೋಟಲ್ ಸ್ಟೇಷನ್ ಸರ್ವೆಯ ವರದಿಯಂತೆ ಆಸ್ತಿ ತೆರಿಗೆ ಸಂಗ್ರಹದಲ್ಲಿ ಪೂರ್ವ ವಲಯದ ಜಂಟಿ ಆಯುಕ್ತ ಜೆ.ಸಿ. ರವೀಂದ್ರ ಲೋಪವೆಸಗಿದ್ದಾರೆ ಎಂದರು.

2008ರಲ್ಲಿ ಎಸ್ಎಎಸ್ ಬಂದ ಬಳಿಕ ಬದಲಾವಣೆ ಮಾಡಬೇಕಿತ್ತು, ಆದರೆ ಅದು ಆಗಿಲ್ಲ. ಎಸ್ಎಎಸ್​ನಲ್ಲಿ ಪುನರ್ ಪರಿಶೀಲಿಸುವ ಅವಕಾಶ ಇದ್ರೂ, ಪಾಲಿಕೆಯಿಂದ ಅದು ನಡೆಸದೇ ಇರೋದು ತಪ್ಪಾಗಿದೆ. ಟೋಟಲ್ ಸ್ಟೇಷನ್ ಸರ್ವೆಯಲ್ಲಿ 800ಕೋಟಿ ರೂ. ಹೆಚ್ಚುವರಿ ಆದಾಯದ ನಿರೀಕ್ಷೆಯಿತ್ತು, ಆದರೆ ವ್ಯವಸ್ಥೆಯ ಲೋಪದಿಂದ ಅಷ್ಟು ಆದಾಯ ಸಂಗ್ರಹವಾಗಿಲ್ಲ. ಇನ್ನು ಎಸ್​ಎಎಸ್​ನ್ನು ಬಿಗಿ ಮಾಡಿ ವಾಣಿಜ್ಯ ಹಾಗೂ ವಸತಿ ಕಟ್ಟಡಗಳ, ಆಸ್ತಿ ತೆರಿಗೆ ಪಾವತಿದಾರರ ಮೇಲೆ ಕಣ್ಣಿಡಲಾಗುವುದು ಎಂದು ತಿಳಿಸಿದರು.