ಅಡಮಾನವಿಟ್ಟ ಪಾಲಿಕೆಯ ಆಸ್ತಿ ಋಣಮುಕ್ತಕ್ಕೆ ಬಿಬಿಎಂಪಿ ನಿರ್ಧಾರ

ಅಡಮಾನವಿಟ್ಟ ಐದು ಕಟ್ಟಡಗಳ ಪೈಕಿ ಕೆ.ಆರ್ ಮಾರುಕಟ್ಟೆಯ ಕಟ್ಟಡ ಹೊರತುಪಡಿಸಿ ಉಳಿದ ನಾಲ್ಕು ಕಟ್ಟಡಗಳನ್ನು ಋಣಮುಕ್ತಗೊಳಿಸಲು ಬಿಬಿಎಎಂಪಿ ತಯಾರಿ ನಡೆಸಿದೆ ಎಂದು ಮೇಯರ್ ಗಂಗಾಂಬಿಕೆ ಅವರು ಭರವಸೆ ನೀಡಿದ್ದಾರೆ.

ಬೆಂಗಳೂರು : ಹಿಂದಿನ ಕೌನ್ಸಿಲ್ ಅವಧಿಯಲ್ಲಿ ಅಡಮಾನವಿಟ್ಟು ಸಾಲ ಪಡೆದಿದ್ದ ಪಾಲಿಕೆ ಆಸ್ತಿಗಳನ್ನು ಋಣಮುಕ್ತಗೊಳಿಸಲು ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ನಿರ್ಧರಿಸಿದೆ.

ಬಿಬಿಎಂ​ಪಿ ಒಡೆತನದ 11 ಆಸ್ತಿಗಳ ಪೈಕಿ ಈಗಾಗಲೇ 6 ಆಸ್ತಿಗಳು ಋಣಮುಕ್ತವಾಗಿವೆ. ಅಡಮಾನವಿಟ್ಟ 5 ಆಸ್ತಿಗಳಲ್ಲಿ‌ 4 ಆಸ್ತಿಗಳನ್ನು ಋಣ ಮುಕ್ತಗೊಳಿಸಲು ಪಾಲಿಕೆ ತಯಾರಿ ನಡೆಸಿದೆ. ಪಿಯುಬಿ ಕಟ್ಟಡ, ಕೆ. ಆರ್. ಮಾರುಕಟ್ಟೆ, ಬಿಬಿಎಂಪಿಯ ಪಶ್ಚಿಮ ವಲಯ ಕಚೇರಿ, ದಾಸಪ್ಪ ಆಸ್ಪತ್ರೆ ಮತ್ತು ಕಲಾಸಿ ಪಾಳ್ಯ ಮಾರುಕಟ್ಟೆ ಕಟ್ಟಡಗಳನ್ನು ಬ್ಯಾಂಕ್​ಗಳಿಗೆ ಅಡಮಾನಕ್ಕೆ ಇಡಲಾಗಿದೆ.

ಇದರಲ್ಲಿನ ನಾಲ್ಕು ಕಟ್ಟಡಗಳನ್ನು 2016-17ರಲ್ಲಿ ಹುಡ್ಕೋ ಸಂಸ್ಥೆಯಿಂದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾಗೆ (ಎಸ್​ಬಿಐ) 871 ಕೋಟಿ ರೂ.ಗೆ ಅಡಮಾನ ಮುಂದುವರೆಸಿ ಕಡಿಮೆ ಬಡ್ಡಿ ದರಕ್ಕೆ ವರ್ಗಾಹಿಸಲಾಗಿತ್ತು. ಇದೀಗ ಎಸ್​ಬಿಐಗೆ 871 ಕೋಟಿ ರೂ. ಸಂದಾಯ ಮಾಡಿ, ಅಡಮಾನವಿಟ್ಟ ಕಟ್ಟಡಗಳನ್ನು ಋಣಮುಕ್ತಗೊಳಿಸಲು ಬಿಬಿಎಂ​ಪಿ ಮುಂದಾಗಿದೆ.

'ಕೆ. ಆರ್. ಮಾರುಕಟ್ಟೆ ಕಟ್ಟಡ ಹೊರತುಪಡಿಸಿ ಪಿಯುಬಿ, ಬಿಬಿಎಂಪಿಯ ಪಶ್ಚಿಮ ವಲಯ ಕಚೇರಿ, ದಾಸಪ್ಪ ಆಸ್ಪತ್ರೆ ಮತ್ತು ಕಲಾಸಿ ಪಾಳ್ಯ ಮಾರುಕಟ್ಟೆಯ ಕಟ್ಟಡಗಳು ಋಣಮುಕ್ತಗೊಳ್ಳಲಿವೆ ಎಂದು ಮೇಯರ್ ಗಂಗಾಂಬಿಕೆ ಭರವಸೆ ನೀಡಿದ್ದಾರೆ.