ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಕೊರೊನಾ ವೈರಸ್ ಹಾವಳಿ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಹೀಗಾಗಿ ಹೆಚ್ಚಿನ ಟೆಸ್ಟ್ ನಡೆಸುವ ಉದ್ದೇಶದಿಂದ 1,805 ಮಂದಿ ನಿಯೋಜನೆ ಮಾಡಲಾಗಿದೆ.
ಬಿಬಿಎಂಪಿ ವ್ಯಾಪ್ತಿಯ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ರ‍್ಯಾಪಿಡ್ ಆಂಟಿಜನ್ ಟೆಸ್ಟ್ ಹಾಗೂ ಆರ್ಟಿಪಿಸಿಆರ್ ಪರೀಕ್ಷೆಗಳ ಪ್ರಮಾಣ ಅತಿ ಕಡಿಮೆಯಾಗುತ್ತಿದೆ. ನಿಗಧಿತ ಗುರಿ ಸಾಧಿಸಲು ಕೋವಿಡ್ ಸೋಂಕು ಪರೀಕ್ಷೆಗಳನ್ನು ಹೆಚ್ಚು ಮಾಡಬೇಕೆಂದು ಬಿಬಿಎಂಪಿ ಆಯುಕ್ತ ಮಂಜುನಾಥ್ ಪ್ರಸಾದ್ ಆದೇಶ ಹೊರಡಿಸಿದ್ದಾರೆ.
ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರ/ ವಾರ್ಡ್ ವಾರು ಪ್ರತಿ ದಿನ ಶೇಕಡಾ ನೂರರಷ್ಟು (60-ಆರ್ಟಿಟಿಸಿಆರ್, 40-ಆಂಟಿಜನ್) ಪರೀಕ್ಷೆ ನಡೆಸಲು ಸಿಬ್ಬಂದಿಗಳನ್ನ ಬಿಬಿಎಂಪಿ ನಿಯೋಜನೆ ಮಾಡಿದೆ. ನಗರದ ಎಂಟು ವಲಯಗಳಲ್ಲಿ ಒಟ್ಟು 1,805 ಸಿಬ್ಬಂದಿಗಳನ್ನು ಕೋವಿಡ್ ಪರೀಕ್ಷೆಗಾಗಿ ನಿಯೋಜಿಸಲಾಗಿದೆ. ಒಟ್ಟು 198 ವಾರ್ಡ್ಗಳ 141 ನಗರ ಪ್ರಾಥಮಿಕ ಕೇಂದ್ರಗಳಲ್ಲಿ 297 ಮೆಡಿಕಲ್ ಆಫೀಸರ್ಸ್, ನರ್ಸ್ ಸಿಬ್ಬಂದಿ 199 ಮಂದಿ, ಗಂಟಲು ದ್ರವ ಸಂಗ್ರಹಕ್ಕೆ 137 ಮಂದಿ, ಫಾರ್ಮಾಸಿಸ್ಟ್ 132 ಮಂದಿ, ಎನ್ಎಸ್ಎಸ್ ತಂಡದ 120 ಮಂದಿ ಸೇರಿದಂತೆ ಒಟ್ಟು 1,805 ಮಂದಿಯನ್ನು ನಿಯೋಜಿಸಲಾಗಿದೆ.
ಸಿಬ್ಬಂದಿಗಳ ಕೊರತೆ ಉಂಟಾದರೆ ಆಶಾ ಕಾರ್ಯಕರ್ತೆಯರ ನೆರವು ಪಡೆದು ತರಬೇತಿ ನೀಡಲು ತಿಳಿಸಲಾಗಿದೆ. ಇದರ ಜತೆಗೆ ಪ್ರತಿ ಪರೀಕ್ಷೆಗೆ ರೂ.30 ರಂತೆ ನೀಡಿ, ಹೆಚ್ಚಿನ ಪರೀಕ್ಷೆ ಕೈಗೊಳ್ಳಲು ಸೂಚಿಸಲಾಗಿದೆ. ಈ ಸಿದ್ಧತೆಯನ್ನು ಒಂದು ವಾರ ಮೊದಲೇ ಕ್ರಿಯಾಯೋಜನೆ ಮಾಡಿ, ವಾರ್ಡ್ಗಳ ಎಲ್ಲ ವ್ಯಾಪ್ತಿಗೂ ಒಳಪಡುವಂತೆ ಪ್ರಾಥಮಿಕ ಕೇಂದ್ರ ತಂಡ, ಮೊಬೈಲ್ ತಂಡ, ಸ್ಟಾಟಿಕ್ ತಂಡ ಬಳಸಿಕೊಂಡು ಸೋಂಕು ಪರೀಕ್ಷೆ ನಡೆಸಲು ಸೂಚಿಸಲಾಗಿದೆ.
