ಬೆಂಗಳೂರು : ಬೆಂಗಳೂರು ನಗರ ವೇಗವಾಗಿ ಬೆಳೆಯುತ್ತಿರುವುದರಿಂದ ಮೂಲಸೌಕರ್ಯ ವ್ಯವಸ್ಥೆಯಲ್ಲಿ ವ್ಯತ್ಯಯವಾಗಿದೆ. ಆದರೆ, ಈ ಅವ್ಯವಸ್ಥೆ ಸರಿಪಡಿಸಲು ನಾನು ಎಲ್ಲ ರೀತಿಯ ಪ್ರಯತ್ನ ನಡೆಸುತ್ತೇನೆ. ಅದಕ್ಕಾಗಿ ಕೆಲವೊಂದು ಗಡಿಗಳನ್ನು( ಮಿತಿ) ಮುರಿಯಲೂ ನಾನು ಹಿಂಜರಿಯುವುದಿಲ್ಲ. ಹೂಡಿಕೆದಾರರಿಗೆ ಬೇಕಿರುವ ಎಲ್ಲ ಸೌಲಭ್ಯಗಳನ್ನು ಕಲ್ಪಿಸಲು ನಮ್ಮ ಸರ್ಕಾರ ಬದ್ದವಾಗಿದೆ ಎಂದು ಬೆಂಗಳೂರು ಟೆಕ್ ಸಮ್ಮಿಟ್ ನಲ್ಲಿ ಜಾಗತಿಕ ಹೂಡಿಕೆದಾರರಿಗೆ ಉಪ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಭರವಸೆ ನೀಡಿದ್ದಾರೆ.
ನಗರದ ಅರಮನೆ ಆವರಣದಲ್ಲಿ ಆಯೋಜನೆ ಮಾಡಿದ್ದ ಬೆಂಗಳೂರು ಟೆಕ್ ಶೃಂಗಸಭೆಯ 26ನೇ ಆವೃತ್ತಿಯ ಉದ್ಘಾಟನಾ ಸಮಾರಂಭದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಗಡಿಗಳನ್ನು ಮುರಿಯುವುದರಿಂದಾಗಿಯೇ ಹೊಸ ಜೀವನ, ಹೊಸ ಆವಿಷ್ಕಾರಗಳು, ಹೊಸ ಇತಿಹಾಸವನ್ನು ಸೃಷ್ಟಿಸುತ್ತದೆ. ಮರಿಗಳು ಚಿಪ್ಪುಗಳನ್ನು ಒಡೆಯದಿದ್ದರೆ ಅವುಗಳಿಗೆ ಜೀವನವೇ ಇರುವುದಿಲ್ಲ. ಶಿಶುಗಳು ತಾಯಿಯ ಗರ್ಭದಲ್ಲಿರುವ ನೀರನ್ನು ಒಡೆಯದಿದ್ದರೆ ಜೀವನವೇ ಇರುವುದಿಲ್ಲ. ರಾಜರು ಗಡಿಯನ್ನು ಮೀರದಿದ್ದರೆ ಯಾವುದೇ ಸಾಮ್ರಾಜ್ಯಗಳು ಇರುವುದಿಲ್ಲ. ಮಹಿಳೆಯರು ಗಾಜಿನ ಸೀಲಿಂಗ್ ಅನ್ನು ಒಡೆಯದಿದ್ದರೆ ಇಂದು ನಮ್ಮ ಉದ್ಯೋಗಿಗಳಲ್ಲಿ ಮಹಿಳೆಯರೇ ಇರುತ್ತಿರಲಿಲ್ಲ. ಇದನ್ನೇ ಬ್ರೇಕಿಂಗ್ ಬೌಂಡರೀಸ್ ಎನ್ನುತ್ತೇವೆ ಎಂದು ಡಿಕೆಶಿ ವಿವರಿಸಿದರು.
ಬೆಂಗಳೂರು ಟೆಕ್ ಶೃಂಗಸಭೆಯು 1998 ರಿಂದ ಗಡಿಗಳನ್ನು ಮುರಿಯುತ್ತಿದೆ. ಇದು ದೇಶದ ಮೊದಲ ಐಟಿ ಎಕ್ಸ್‌ಪೋ ಆಗಿತ್ತು ನಂತರ ಏಷ್ಯಾದ ಅತಿದೊಡ್ಡ ಟೆಕ್ ಶೃಂಗಸಭೆಯಾಯಿತು. ಇಂದು ಇದು ವಿಶ್ವದ ಪ್ರಮುಖ ಟೆಕ್ ಶೃಂಗಸಭೆಗಳಲ್ಲಿ ಒಂದಾಗಿದೆ. ಬೆಂಗಳೂರು ಟೆಕ್ ಶೃಂಗಸಭೆ 2023 ಕಳೆದ 26 ವರ್ಷಗಳಲ್ಲಿ ಅತಿದೊಡ್ಡ ಆವೃತ್ತಿಯಾಗುವ ಮೂಲಕ ಹಿಂದಿನ ಎಲ್ಲ ಗಡಿಗಳನ್ನು ಮುರಿದಿದೆ ಎಂದರು.
ಸಿಂಗ್ ಸರ್ಕಾರ ಹೊಗಳಿದ ಡಿಕೆಶಿ : ಕರ್ನಾಟಕ ಸರ್ಕಾರ ಈ ಹಿಂದೆ ಹಲವು ಗಡಿಗಳನ್ನು ಮುರಿದಿದೆ. 1997 ರಲ್ಲಿ ಐಟಿ ನೀತಿಯನ್ನು ರೂಪಿಸಿದ ಮೊದಲ ರಾಜ್ಯ ಕರ್ನಾಟಕ. ಎಸ್.ಎಂ ಕೃಷ್ಣ ಸರ್ಕಾರವು ರಾಜ್ಯದಲ್ಲಿ ಐಟಿ ಇಲಾಖೆಯನ್ನು ಸ್ಥಾಪಿಸಿತು. ಈ ಉಪಕ್ರಮಗಳು ಭಾರತ ಸರ್ಕಾರದ ಪ್ರಯತ್ನಗಳಿಂದ ಪೂರಕವಾಗಿವೆ. 1991 ರಲ್ಲಿ ಸಾಫ್ಟ್‌ವೇರ್ ಟೆಕ್ನಾಲಜಿ ಪಾರ್ಕ್ಸ್ ಆಫ್ ಇಂಡಿಯಾ (ಎಸ್‌ಟಿಪಿಐ) ಅನ್ನು ಸ್ಥಾಪಿಸಿದ ಪಿ.ವಿ ನರಸಿಂಹ ರಾವ್ ಸರ್ಕಾರವು ಐಟಿ ಕ್ರಾಂತಿಯನ್ನು ರಚನಾತ್ಮಕ ರೀತಿಯಲ್ಲಿ ಪ್ರಾರಂಭಿಸಿತು. ಅನೇಕ ಅಧಿಕಾರಿಗಳು ಮತ್ತು ರಾಜಕಾರಣಿಗಳು ಹಲವು ವರ್ಷಗಳಲ್ಲಿ ಐಟಿ ಇಲಾಖೆಯನ್ನು ನಿರ್ಮಿಸಲು ಶ್ರಮಿಸಿದ್ದಾರೆ.
ಸರ್ಕಾರಗಳು ಗಡಿಗಳನ್ನು ಮುರಿದು ಹೊಸ ದೃಷ್ಟಿಕೋನವನ್ನು ಸೃಷ್ಟಿಸದಿದ್ದರೆ ಇಂದು ಬೆಂಗಳೂರು ಈಗಿನ ರೀತಿಯ ಬೆಂಗಳೂರು ಆಗುತ್ತಿರಲಿಲ್ಲ. ಗಡಿಗಳನ್ನು ಮುರಿಯುವ ಅನೇಕ ಸಂಸ್ಥೆಗಳು ಇದ್ದವು. ಟೆಕ್ಸಾಸ್ ಇನ್ಸ್ಟ್ರುಮೆಂಟ್ಸ್ 1980 ರ ದಶಕದಲ್ಲಿ ಬೆಂಗಳೂರಿನಲ್ಲಿ ತನ್ನ ಕಚೇರಿಯನ್ನು ಸ್ಥಾಪಿಸಿದ ಮೊದಲ ಐಟಿ ಕಂಪನಿಯಾಗಿದೆ. ನಂತರ ವಿಪ್ರೋ ಮತ್ತು ಇನ್ಫೋಸಿಸ್ ನೇತೃತ್ವದ ಕಂಪನಿಗಳು ನಗರದಲ್ಲಿ ಐಟಿ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ಹಲವಾರು ಗಡಿಗಳನ್ನು ಮುರಿದವು ಎಂದು ಹೇಳಿದರು.
ಬೆಂಗಳೂರಿನಲ್ಲಿ ಐಟಿ ಕ್ರಾಂತಿ ಆರಂಭವಾಗಿದ್ದು, 1990ರ ದಶಕದಲ್ಲಿ ಅಲ್ಲ. ಅದು ಪ್ರಾರಂಭವಾಗುವ ಮೊದಲು ಬಹಳಷ್ಟು ಜನರು ಆ ಮಾರ್ಗಕ್ಕೆ ಅಡಿಪಾಯ ಹಾಕಿದರು. ಮೈಸೂರು ಮಹಾರಾಜರು ವೈಜ್ಞಾನಿಕ ಮನೋಭಾವ ಪ್ರದರ್ಶಿಸದಿದ್ದರೆ ಮತ್ತು ವಿಜ್ಞಾನ ಮತ್ತು ತಂತ್ರಜ್ಞಾನವನ್ನು ಪ್ರೋತ್ಸಾಹಿಸದಿದ್ದರೆ, ಬೆಂಗಳೂರು ಇಂದು ಐಟಿ ಸಿಟಿಯ ಬೆಂಗಳೂರಾಗುತ್ತಿರಲಿಲ್ಲ. ಐಐಎಸ್ ಸೇರಿದಂತೆ ಅಸಂಖ್ಯಾತ ವೈಜ್ಞಾನಿಕ ಶಿಕ್ಷಣ ಸಂಸ್ಥೆಗಳು, ಒಂದು ಶತಮಾನದ ಹಿಂದೆ ಅನೇಕ ವೈಜ್ಞಾನಿಕ ಸಂಶೋಧನಾ ಸಂಸ್ಥೆಗಳು ಮತ್ತು ಕೈಗಾರಿಕೆಗಳು ಬಹುಶಃ ಇರುತ್ತಿರಲಿಲ್ಲ ಎಂದು ಡಿಕೆಶಿ ತಿಳಿಸಿದರು.
ನೆಹರೂ ಕೊಡುಗೆ ಸ್ಮರಣೆ : ಪಂಡಿತ್ ಜವಾಹರಲಾಲ್ ನೆಹರು ಅವರು ಬೆಂಗಳೂರಿನಲ್ಲಿ ಸಾರ್ವಜನಿಕ ವಲಯದ ಕೈಗಾರಿಕೆಗಳ ಸರಣಿಯನ್ನು ಸ್ಥಾಪಿಸುವ ದೂರದೃಷ್ಟಿಯನ್ನು ಪ್ರದರ್ಶಿಸದಿದ್ದರೆ, ಬೆಂಗಳೂರು ಬಹುಶಃ ಈ ಮಟ್ಟದ ಬೆಂಗಳೂರು ಆಗುತ್ತಿರಲಿಲ್ಲ. ಆ ದೂರದೃಷ್ಟಿಯ ಶಿಕ್ಷಣ ತಜ್ಞರು ಬೆಂಗಳೂರಿನಲ್ಲಿ ಇಷ್ಟೊಂದು ಇಂಜಿನಿಯರಿಂಗ್ ಕಾಲೇಜುಗಳನ್ನು ಮತ್ತು ತಂತ್ರಜ್ಞಾನ ಸಂಸ್ಥೆಗಳನ್ನು ಸ್ಥಾಪಿಸದಿದ್ದರೆ, ಅಜೀಂ ಪ್ರೇಮ್‌ಜೀ ಮತ್ತು ನಾರಾಯಣ ಮೂರ್ತಿಯವರು ಐಟಿ ಸಾಹಸಕ್ಕೆ ಬರದೇ ಹೋಗಿದ್ದರೆ, ಸಾವಿರಾರು ಜನರು ತಮ್ಮ ಸ್ಟಾರ್ಟ್‌ಅಪ್‌ಗಳಿಗಾಗಿ ಬೆಂಗಳೂರನ್ನು ಆಯ್ಕೆ ಮಾಡದಿದ್ದರೆ, ಬೆಂಗಳೂರಿನ ಆರಂಭಿಕ ಆಡಳಿತಗಾರರು ಜಯನಗರ, ಕೋರಮಂಗಲ, ಇಂದಿರಾನಗರದಂತಹ ಸಂಘಟಿತ ಲೇಔಟ್‌ಗಳನ್ನು ಸ್ಥಾಪಿಸದಿದ್ದರೆ, ಬಹುಶಃ ಬೆಂಗಳೂರು ಇಂದು ಐಟಿ ಸಿಟಿಯ ಬೆಂಗಳೂರಾಗುತ್ತಿರಲಿಲ್ಲ.
ಭೌತಿಕ ಮಟ್ಟದಲ್ಲಿ ಬೆಂಗಳೂರು ನಗರವು ತನ್ನ ಗಡಿಗಳನ್ನು ತುಂಬಾ ವೇಗವಾಗಿ ಮುರಿಯುತ್ತಿದೆ ಇದು ಎಲ್ಲಾ ಮೂಲಸೌಕರ್ಯ ಅವ್ಯವಸ್ಥೆಗೆ ಕಾರಣವಾಗಿದೆ. ಹಾಗಾಗಿ ಬೆಂಗಳೂರನ್ನು ಸರಿಪಡಿಸಲು ನಾನು ಯಾವುದೇ ಪ್ರಯತ್ನವನ್ನು ಬಿಡುವುದಿಲ್ಲ ಎಂದು ನಾನು ನಿಮಗೆ ಭರವಸೆ ನೀಡುತ್ತೇನೆ. ಈ ಸಮಸ್ಯೆಗಳನ್ನು ಸರಿಪಡಿಸಲು ನಾನು ಕೆಲವು ಗಡಿಗಳನ್ನು ಮುರಿಯಬೇಕಾಗಿದೆ ಅದಕ್ಕೆ ನಾನು ಹಿಂಜರಿಯುವುದಿಲ್ಲ. ನಾವು ದೊಡ್ಡ ಯೋಜನೆಗಳನ್ನು ಹೊಂದಿದ್ದೇವೆ ಮತ್ತು ನೀವು ಅವುಗಳನ್ನು ಶೀಘ್ರದಲ್ಲೇ ನೆಲದ ಮೇಲೆ ನೋಡುತ್ತೀರಿ ಎಂದು ಡಿಕೆಶಿ ಭರವಸೆ ನೀಡಿದರು.
ನೀವು ಸೇವೆಗಳ ಗಡಿಯನ್ನು ಯಶಸ್ವಿಯಾಗಿ ಮುರಿದಿದ್ದೀರಿ. ಆದರೆ, ಉತ್ಪನ್ನದ ಜಾಗದಲ್ಲಿ ಗಡಿಗಳನ್ನು ಮುರಿಯುವ ಸಮಯ ಬಂದಿದೆ ಎಂದು ನಾನು ನಂಬುತ್ತೇನೆ. ಯುಪಿಐ ಇಂದು ಬಹುಶಃ ಭಾರತ ಉತ್ಪಾದಿಸಿದ ಅತಿದೊಡ್ಡ ಉತ್ಪನ್ನವಾಗಿದೆ. ನಾವು ಅದರ ಕಡೆಗೆ ಕೆಲಸ ಮಾಡಿದರೆ ಅದು ಜಾಗತಿಕ ಹಣಕಾಸು ವ್ಯವಸ್ಥೆಯ ಬೆನ್ನೆಲುಬಾಗಬಹುದು. ಮನಮೋಹನ್ ಸಿಂಗ್ ಅವರ ಸರ್ಕಾರವು ಗಡಿಯನ್ನು ಮುರಿದು 2008 ರಲ್ಲಿ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾವನ್ನು ಸ್ಥಾಪಿಸದಿದ್ದರೆ ಮತ್ತು ಎನ್‌ಪಿಸಿಐ ತಂಡವು ಗಡಿಗಳನ್ನು ಮುರಿಯಲು ಶ್ರಮಿಸದಿದ್ದರೆ, ಇಂದು ಯುಪಿಐ ಇರುತ್ತಿರಲಿಲ್ಲ. ಮುಂಬರುವ ದಿನಗಳಲ್ಲಿ ಹೊಸ ಗಡಿಗಳನ್ನು ಮುರಿದು ನಮ್ಮನ್ನು, ನಮ್ಮ ಸಂಸ್ಥೆಗಳನ್ನು, ನಮ್ಮ ನಗರಗಳನ್ನು, ನಮ್ಮ ರಾಜ್ಯ ಮತ್ತು ನಮ್ಮ ದೇಶವನ್ನು ಉನ್ನತ ಮಟ್ಟಕ್ಕೆ ಕೊಂಡೊಯ್ಯುವ ಪ್ರತಿಜ್ಞೆಯನ್ನು ತೆಗೆದುಕೊಳ್ಳೋಣ ಎಂದು ಡಿಕೆ ಶಿವಕುಮಾರ್ ನುಡಿದರು.
ಈ ವೇಳೆ ಬಯೋಟೆಕ್ ಪಾಲಿಸಿ ಡ್ರಾಫ್ಟ್, ಅನಿಮೇಷನ್ ವಿಜುವಲ್ ಎಫೆಕ್ಟ್ ಗೇಮಿಂಗ್ ಇನ್ ಕಾಮಿಕ್ಸ್ ಪಾಲಿಸಿ ಮತ್ತು ಪ್ರೋಗ್ರಾಂ ಡಾಕ್ಯುಮೆಂಟ್ ಅನ್ನು ಬಿಡುಗಡೆ ಮಾಡಲಾಯಿತು.
ಇದನ್ನೂ ಓದಿ : ಸರ್ಕಾರ ಉದ್ಯಮಸ್ನೇಹಿ ವಾತಾವರಣ ಉತ್ತೇಜಿಸುವ ಗುರಿ ಹೊಂದಿದೆ: ಟೆಕ್ ಸಮ್ಮಿಟ್ನಲ್ಲಿ ಸಿಎಂ ಸಿದ್ದರಾಮಯ್ಯ
