ಬೆಂಗಳೂರು: ದಿನೇ ದಿನೆ ಕೊರೊನಾ ಸೋಂಕು ಹೆಚ್ಚಾಗುತ್ತಿದ್ದಂತೆ ಜನರಲ್ಲಿ ಆತಂಕ ಹೆಚ್ಚಿದೆ. ನಿತ್ಯ ಸಾವಿರ ಗಡಿದಾಟುತ್ತಿರುವ ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ಜನ ಕಕ್ಕಾಬಿಕ್ಕಿ ಆಗಿದ್ದಾರೆ. ಇದರ ಪರಿಣಾಮ ಯಾರು ಏನೇ ಸಲಹೆ ನೀಡಿದರೂ ಸ್ವೀಕರಿಸುವ ಮನೋಭಾವ ಹೆಚ್ಚಿದೆ. ಕೊರೊನಾ ಬಗೆಗೆ ಆತಂಕ- ಭಯ ಬೇಡ, ಮುಂಜಾಗ್ರತೆ ವಹಿಸಿ ಎಂದು ಆರೋಗ್ಯ ಇಲಾಖೆ ಹೇಳುತ್ತಲೇ ಇದೆ.
ಇತ್ತ ಕೊರೊನಾ ಆತಂಕ ಬೆಂಗಳೂರಿನಲ್ಲಿ ಹೆಚ್ಚಾಗಿದ್ದು, ಎಲ್ಲ ಭಾಗಗಳು ಹೈ ರಿಸ್ಕ್ ಪ್ರದೇಶಗಳಾಗಿ ಬದಲಾಗಿದೆ. ಹೀಗಾಗಿ, ಭಾರತ ಸರ್ಕಾರದ ಆಯುಷ್ ಮಂತ್ರಾಲಯ ಆರ್ಸೆನಿಕ್ ಆಲ್ಬಂ-30 ಔಷಧ ನೀಡುತ್ತಿದೆ. ಆದರೆ, ಜನರು ಇದನ್ನ ಕೊರೊನಾ ರೋಗದ ಔಷಧ ಎಂದು ತಿಳಿದು ಖರೀದಿಗೆ ಮುಂದಾಗಿದ್ದಾರೆ.
ಹೀಗಾಗಿ ಆಯುಷ್ ಇಲಾಖೆ ಈ ಸಂಬಂಧ ಸ್ಪಷ್ಟನೆ ನೀಡಿದ್ದು, ಸಾರ್ವಜನಿಕರ ಗಮನಕ್ಕೆ ತಂದಿದ್ದು ಆರ್ಸೆನಿಕ್ ಆಲ್ಬಂ-30 ಔಷಧ ಕೊರೊನಾ ರೋಗಕ್ಕೆ ನೀಡುವ ಔಷಧವಲ್ಲ. ಇದು ರೋಗ ನಿರೋಧಕ ಶಕ್ತಿ ಹೆಚ್ಚಿಸಲು ನೀಡುತ್ತಿರುವ ಔಷಧಿಯಾಗಿದೆ ಅಂತ ತಿಳಿಸಿದೆ.
