ಕೊರೊನಾ ಗೆದ್ದು ಬಂದ 10 ವರ್ಷದ ಬಾಲಕನ ಅಂತರಾಳದ ಮಾತೇನು?

ಕೊರೊನಾ ಮಹಾಮಾರಿಗೆ ಬಲಿಯಾಗಿ ಅದರಿಂದ ಗೆದ್ದು ಬಂದ ಬಾಲಕ ತನ್ನ ಅನುಭವವನ್ನು ಹಂಚಿಕೊಂಡಿದ್ದಾನೆ. ಈತನ ತೋರಿದ ಧೈರ್ಯ ಇತರರಿಗೂ ಮಾದರಿಯಾಗಿದ್ದು, ಕೊರೊನಾ ಕುರಿತು ಜನರಲ್ಲಿ ಮನವಿ ಮಾಡಿಕೊಂಡಿದ್ದಾನೆ.

ಬೆಂಗಳೂರು: ಮಹಾಮಾರಿ ಕೊರೊನಾದ ವಿರುದ್ಧ ಹೋರಾಡಿ ಗೆದ್ದು ಬಂದ ಹತ್ತು ವರ್ಷದ ಬಾಲಕ ತನ್ನ ಅನುಭವವನ್ನು ಹಂಚಿಕೊಂಡಿದ್ದು, ಈತನ ಧೈರ್ಯ ಇತರರಿಗೂ ಮಾದರಿಯಾಗಿದೆ.

ಸಂಜಯನಗರದಲ್ಲಿ ವಾಸವಿರುವ ಹತ್ತು ವರ್ಷದ ಚಂದನ್​ ಎಂಬ ಬಾಲಕನಿಗೆ ಕೊರೊನಾ ಸೋಂಕು ತಗುಲಿತ್ತು. ಇದೀಗ ಈತ ಮಹಾಮಾರಿಯಿಂದ ಗುಣಮುಖನಾಗಿದ್ದು, ಕೊರೊನಾ ಪೀಡಿತ ಇತರ ಮಕ್ಕಳಿಗೆ ಮಾದರಿಯಾಗಿದ್ದಾನೆ. ಅಪ್ಪ - ಅಮ್ಮನಿಂದ ಈತನಿಗೆ ಸೋಂಕು ತಗುಲಿತ್ತು. ಬಾಲಕನ ತಂದೆ - ತಾಯಿಗಳು ಮೊದಲು ಗುಣಮುಖರಾಗಿ ಡಿಸ್ಚಾರ್ಜ್​ ಆಗಿದ್ದು, ಬಳಿಕ ಬಾಲಕ ಒಬ್ಬಂಟಿಯಾಗಿ ಕೊರೊನಾ ಎದುರಿಸಿದ್ದನು.

ಇನ್ನು ಕೊರೊನಾ ಚಿಕಿತ್ಸೆ ಪಡೆಯುತ್ತಿದ್ದ ಈ ಬಾಲಕ ಕುಗ್ಗದೇ, ಕೊರಗದೆ ತನ್ನ ವಾರ್ಡ್​ನಲ್ಲಿ ಡ್ರಾಯಿಂಗ್​, ಪೇಟಿಂಗ್​, ಟಿಕ್​ಟಾಕ್​ ಮಾಡುವ ಮೂಲಕ ಮನೋಸ್ಥೈರ್ಯವನ್ನು ಹೆಚ್ಚಿಸಿಕೊಳ್ಳುತ್ತಿದ್ದನಂತೆ. ಈತ 21 ದಿನಗಳ ಕಾಲ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದು, ಅಲ್ಲಿದ್ದ ವೈದ್ಯರು, ನರ್ಸ್​ಗಳಿಗೆ ಅಚ್ಚುಮೆಚ್ಚಿನ ಬಾಲಕನಾಗಿದ್ದನು.

ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಚಂದನ್, ಸದ್ಯ ಡಿಸ್ಜಾರ್ಜ್ ಆಗಿ ಸಂಪೂರ್ಣವಾಗಿ ಗುಣಮುಖನಾಗಿದ್ದಾನೆ. ‌ಚಂದನ್ 5ನೇ ತರಗತಿ ಓದುತ್ತಿದ್ದು, ಜನರಿಗೆ ಜಾಗೃತಿ ಮೂಡಿಸುತ್ತಿದ್ದಾನೆ. ಕೊರೊನಾದಿಂದ ಆದಷ್ಟು ಜಾಗೃತರಾಗಿರಿ, ಮಾಸ್ಕ್​ ಧರಿಸಿ, ಸ್ವಚ್ಚತೆ ಕಾಪಾಡಿ ಎಂದು ಜನರಲ್ಲಿ ಮನವಿ ಮಾಡಿಕೊಂಡಿದ್ದಾನೆ.