ಬೆಂಗಳೂರು: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮಕ್ಕೆ (ಕೆಎಸ್ಆರ್ಟಿಸಿ) '60 ವಸಂತಗಳ ಸಂಭ್ರಮ' ಕಾರ್ಯಕ್ರಮಕ್ಕೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಇಂದು ಚಾಲನೆ ನೀಡಿದರು. ವಿಧಾನಸೌಧದ ಬಾಂಕ್ವೆಟ್ ಹಾಲ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ನಾಲ್ಕು ಸಾರಿಗೆ ನಿಯಮಗಳಲ್ಲಿನ ಅಪಘಾತರಹಿತ ಚಾಲಕರಿಗೆ ಮುಖ್ಯಮಂತ್ರಿ ಚಿನ್ನದ ಪದಕ ಪ್ರದಾನ ಮಾಡಿದರು.
ಸಾರಿಗೆ ಸಚಿವ ಶ್ರೀರಾಮುಲು ಮಾತನಾಡಿ, ಕೆಎಸ್ಆರ್ಟಿಸಿ 60ವರ್ಷಗಳ ಕಾಲ ಸೇವೆ ನೀಡಿದೆ. ಕೆಂಪೇಗೌಡ ಬಸ್ ನಿಲ್ದಾಣ ನಿತಂತರ ಸೇವೆ ಮೂಲಕ 50 ವರ್ಷಗಳನ್ನು ಪೂರೈಸಿದೆ. ಸರಳವಾಗಿ ಬಸ್‌ನಲ್ಲಿ ಓಡಾಡಿ, ಇಲ್ಲಿವರೆಗೂ ಮುಟ್ಟಿರುವವರು ನಾವು. ಅತ್ಯಂತ ವಿಶ್ವಾಸ, ಜನಸೇವೆ ಮೂಲಕ ಸಂಸ್ಥೆ ಸೇವೆ ನೀಡಿದೆ ಎಂದರು.
ಕೆಎಸ್ಆರ್ಟಿಸಿ 60 ವರ್ಷದ ಸೇವೆ ನೀಡಿದ್ದು, ಡ್ರೈವರ್, ಕಂಡಕ್ಟರ್, ಮೆಕ್ಯಾನಿಕ್ ಸೇವೆ ಅಪಾರ. ಈ ಸಂಭ್ರಮವನ್ನು ಅವರ ಕುಟುಂಬಕ್ಕೆ ಅರ್ಪಿಸಬೇಕಿದೆ. ನೀವಿಲ್ಲದಿದ್ದರೆ ನಾವಿಲ್ಲವೆಂದು ಬಹಳ ಸಲ ಹೇಳಿದ್ದೇನೆ. ಅಪಘಾತ ಮಾಡದೆ ಚಿನ್ನದ ಪದಕ ಪಡೆಯುತ್ತಿದ್ದೀರಿ. ಸಣ್ಣ ಅಪಘಾತವನ್ನೂ ಮಾಡದೆ ಜಾಗೃತರಾಗಿ ಸೇವೆ ಸಲ್ಲಿಸಿದ್ದೀರಿ. ರಾತ್ರಿ, ಹಗಲು ಕಷ್ಟಪಟ್ಟು ಸಮಸ್ಯೆಗಳನ್ನು ಬದಿಗಿಟ್ಟು ನಿಮ್ಮ ಕೆಲಸ ನಿರ್ವಹಿಸಿದ್ದೀರಿ. ಈ ಹಿನ್ನೆಲೆ ಇಲಾಖೆ ಕುಟುಂಬದವರಿಗೆ ಇನ್ಶೂರೆನ್ಸ್ ಕೂಡ ಮಾಡಿಸಲಾಗ್ತಿದ್ದು ಈ ಮುಖಾಂತರ ಇನ್ಫೋಸಿಸ್ ಸಂಸ್ಥೆಗೆ ಅಭಿನಂದನೆ ಸಲ್ಲಿಸುತ್ತೇನೆ ಎಂದು ಹೇಳಿದರು.
ದೇಶದಲ್ಲಿ ಆರ್ಥಿಕ ವ್ಯವಸ್ಥೆ ಬದಲಾಗಿದೆ. ಮುಂದಿನ ದಿನಗಳಲ್ಲಿ ಅನೇಕ ಸವಾಲುಗಳು ನಮ್ಮ ಎದುರಿದೆ. ನಿಮ್ಮ ಜೊತೆ ಸಚಿವನಾಗಿ ನಾನಿದ್ದೇನೆ ಹಾಗೆ ಸಿಎಂ ಇದ್ದಾರೆ ಎಂದು ಭರವಸೆ ನೀಡಿದರು.
ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ ಅಧ್ಯಕ್ಷ, ಶಾಸಕ ಚಂದ್ರಪ್ಪ ಮಾತನಾಡಿ, ಸಾರಿಗೆ ಸಂಸ್ಥೆ ನಷ್ಟದಲ್ಲಿ ದಿನ ದೂಡುತ್ತಿದೆ. ನಿಗಮದ ನೌಕರರಿಗೆ ಸಂಬಳ ಕೊಡಲು ಸಾಧ್ಯವಾಗುತ್ತಿಲ್ಲ. ಸರ್ಕಾರದಿಂದ ಹಣ ಪಡೆದು ವೇತನ ನೀಡುವ ಪರಿಸ್ಥಿತಿ ಬಂದಿದೆ. ಸರ್ಕಾರಕ್ಕೆ ಹೊರೆಯಾಗಲು ನಮಗೆ ಇಚ್ಚೆ ಇಲ್ಲ. ಕಾಡಿ ಬೇಡಿ ಹಣ ಪಡೆಯುವ ಪರಿಸ್ಥಿತಿ ಬಂದಿದೆ ಎಂದು ಬೇಸರ ಹೊರಹಾಕಿದರು.
ಸರ್ಕಾರದ ವತಿಯಿಂದ ನಮಗೆ ಸಹಕಾರ ಬೇಕಿದೆ. ತಾವು ದೊಡ್ಡ ಮನಸ್ಸು ಮಾಡಿ ಪ್ರತೀ ವರ್ಷ500 ಕೋಟಿ ಹಣ ನೀಡಿ. ಇದರಿಂದ ನಿಗಮದ ಸಿಬ್ಬಂದಿಗಳ ಬೇಡಿಕೆ ಈಡೇರಿಸಬಹುದು ಎಂದು ಸಿಎಂಗೆ ಮನವಿ ಮಾಡಿದರು.
