ಬೆಂಗಳೂರು : ಶಕ್ತಿ ಯೋಜನೆಯ ಯಶಸ್ಸಿನ ಬೆನ್ನಲ್ಲೇ ಸಾರಿಗೆ ನಿಗಮಗಳಿಗೆ ಹೆಚ್ಚುವರಿಯಾಗಿ 5.5 ಸಾವಿರ ಬಸ್ಗಳ ಸೇರ್ಪಡೆಗೆ ಮುಂದಾಗಿದ್ದು, ಡೀಸೆಲ್ ಬಸ್ಗಳ ಜೊತೆ ವಿದ್ಯುತ್ ಚಾಲಿತ ಬಸ್ಗಳೂ ಸೇರಿವೆ. ಆರಂಭಿಕ ಹಂತವಾಗಿ 100 ಎಲೆಕ್ಟ್ರಿಕ್ ನಾನ್ ಎಸಿ ಬಸ್ಗಳು ಮುಂದಿನ ವಾರ ಬಿಎಂಟಿಸಿಗೆ ಸೇರಿಕೊಳ್ಳಲಿದ್ದು, ಹಂತ ಹಂತವಾಗಿ ಉಳಿದ ಬಸ್ಗಳು ಕೆಎಸ್ಆರ್ಟಿಸಿ ಸೇರಿದಂತೆ ಎಲ್ಲ ಸಾರಿಗೆ ನಿಗಮಗಳಿಗೆ ಹಸ್ತಾಂತರಗೊಳ್ಳಲಿದೆ.
ಕೇಂದ್ರ ಸರ್ಕಾರದ ಫೇಮ್-2 ಯೋಜನೆ ಅಡಿ ಬಿಎಂಟಿಸಿಗೆ 921 ಬಸ್ಗಳು ಲಭ್ಯವಾಗಿದ್ದು, ಇದರಲ್ಲಿ ಮೊದಲ ಕಂತಿನ 100 ನಾನ್ ಎಸಿ ಎಲೆಕ್ಟ್ರಿಕ್ ಬಸ್ಗಳನ್ನು ಟಾಟಾ ಸಂಸ್ಥೆ ಹಸ್ತಾಂತರ ಮಾಡಿದೆ. ಡಿಸೆಂಬರ್ 26 ರಂದು 100 ಇವಿ ಬಸ್ಗಳ ಚಾಲನೆಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಡಿಸಿಎಂ ಡಿ ಕೆ ಶಿವಕುಮಾರ್ ಹಾಗೂ ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಗ್ರೀನ್ ಸಿಗ್ನಲ್ ನೀಡಲಿದ್ದಾರೆ.
5500 ಬಸ್ಗಳ ಖರೀದಿಗೆ ತಯಾರಿ: ಶಕ್ತಿ ಯೋಜನೆ ನಂತರ ಸಾರಿಗೆ ನಿಗಮಗಳಲ್ಲಿ ಪ್ರಯಾಣಿಕರ ಸಂಖ್ಯೆಯಲ್ಲಿ ಶೇ.15-20 ರಷ್ಟು ಹೆಚ್ಚಳಗೊಂಡಿದ್ದು, ಅದಕ್ಕೆ ತಕ್ಕಂತೆ ಹೆಚ್ಚುವರಿ ಬಸ್ಗಳ ವ್ಯವಸ್ಥೆ ಕಲ್ಪಿಸಲು ಸಾರಿಗೆ ನಿಗಮಗಳು ಮುಂದಾಗಿದ್ದು, ಅದಕ್ಕೆ ತಕ್ಕಂತೆ ಬಸ್ಗಳ ಖರೀದಿಗೆ ಟೆಂಡರ್ ಕರೆದಿವೆ. ಡೀಸೆಲ್ ಬಸ್ಗಳು, ವಿದ್ಯುತ್ ಚಾಲಿತ ಎಸಿ ಬಸ್, ಇವಿ ನಾನ್ ಎಸಿ ಬಸ್ಗಳು ಸೇರಿದ್ದು, ಒಟ್ಟಾರೆಯಾಗಿ 5,500 ಬಸ್ಗಳ ಖರೀದಿಗೆ ಎಲ್ಲ ತಯಾರಿ ನಡೆಸಲಾಗಿದೆ.
ಈ ಕುರಿತು ಈಟಿವಿ ಭಾರತ್ಗೆ ಮಾಹಿತಿ ನೀಡಿರುವ ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ, ಶಕ್ತಿ ಯೋಜನೆಯಿಂದಾಗಿ ನಮಗೆ ಬಸ್ಗಳ ಕೊರತೆಯಾಗಿಲ್ಲ. ನಾನು ಈ ಹಿಂದೆ ಸಾರಿಗೆ ಸಚಿವನಾಗಿದ್ದಾಗ ನಾಲ್ಕು ಸಾರಿಗೆ ನಿಗಮಗಳಿಂದ ಸೇರಿ ಒಟ್ಟು 24 ಸಾವಿರ ಬಸ್ಗಳಿದ್ದವು. ಆದರೆ, 10 ವರ್ಷವಾದರೂ ಈಗ ಬಸ್ಗಳ ಸಂಖ್ಯೆಯಲ್ಲಿ ಹೆಚ್ಚಳವಾಗಿಲ್ಲ. ಬದಲಿಗೆ 1 ಸಾವಿರ ಸಂಖ್ಯೆ ಕಡಿಮೆಯಾಗಿದ್ದು, 23 ಸಾವಿರ ಆಗಿದೆ ಎಂದರು.
ಹಿಂದಿನ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಒಂದೇ ಒಂದು ಬಸ್ ಖರೀದಿಯೇ ಆಗಿಲ್ಲ. ಜನಸಂಖ್ಯೆ ಹೆಚ್ಚಾದಂತೆ ಅದಕ್ಕೆ ತಕ್ಕಂತೆ ಬಸ್ಗಳೂ ಹೆಚ್ಚಾಗಬೇಕು. ಸದ್ಯ ನಾವು 4-5 ಸಾವಿರ ಬಸ್ ಖರೀದಿ ಮಾಡುತ್ತಿದ್ದೇವೆ. ಆದರೂ ನಮ್ಮ ಜನಸಂಖ್ಯೆ ನೋಡಿದರೆ, ನಮಗೆ 35 ಸಾವಿರ ಬಸ್ಗಳ ಅಗತ್ಯ ಇದೆ. ಆ ನಿಟ್ಟಿನಲ್ಲಿ ನಾವು ಬಸ್ ವ್ಯವಸ್ಥೆಗೆ ಮುಂದಾಗಲಿದ್ದೇವೆ ಎಂದು ಹೇಳಿದರು.
ಬಿಎಂಟಿಸಿಗೆ 921 ಎಲೆಕ್ಟ್ರಿಕ್ ನಾನ್ ಎಸಿ ಬಸ್ ಫೇಮ್-2 ಯೋಜನೆಯಡಿ ಮಂಜೂರಾತಿ ಸಿಕ್ಕಿದ್ದು, ಅದರಲ್ಲಿ ಮೊದಲ ಹಂತವಾಗಿ 100 ಬಸ್ಗಳು ಬಂದಿವೆ. ಡಿಸೆಂಬರ್ 26ಕ್ಕೆ ಈ ಬಸ್ಗಳ ಚಾಲನೆಗೆ ಹಸಿರು ನಿಶಾನೆ ಸಿಗಲಿದೆ. ನಂತರ ಉಳಿದ ಬಸ್ಗಳು ತಯಾರಾಗುತ್ತಿದ್ದಂತೆ ಬಿಎಂಟಿಸಿಗೆ ಸೇರ್ಪಡೆಯಾಗಲಿವೆ. ಈಗಾಗಲೇ ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮಕ್ಕೆ 600ಕ್ಕೂ ಹೆಚ್ಚಿನ ಬಸ್ಗಳ ಖರೀದಿ ಮುಗಿದು ಸೇವೆಗೆ ಚಾಲನೆ ನೀಡಲಾಗಿದೆ.
ಉಳಿದಂತೆ ಇನ್ನು ಎಲ್ಲ ನಿಗಮಕ್ಕೂ ಸೇರಿದಂತೆ ಐದಾರು ಟೆಂಡರ್ ಆಗಿದೆ. ಅದರಂತೆ ಕೆಎಸ್ಆರ್ಟಿಸಿಗೆ 800ಕ್ಕೂ ಹೆಚ್ಚಿನ ಡೀಸೆಲ್ ಬಸ್ಗಳು ಬರಲಿವೆ. ಇದರೊಂದಿಗೆ 325 ವಿದ್ಯುತ್ ಚಾಲಿತ ಹವಾನಿಯಂತ್ರಿತ ಬಸ್ಗಳನ್ನೂ ಒಪ್ಪಂದದ ಮೂಲಕ ಕೆಎಸ್ಆರ್ಟಿಸಿಗೆ ಸೇರ್ಪಡೆ ಮಾಡಿಕೊಳ್ಳಲಾಗುತ್ತದೆ ಎಂದು ಹೇಳಿದರು.
100 ಪಲ್ಲಕ್ಕಿ ಬಸ್ಗಳನ್ನು ಖರೀದಿ: ಇತ್ತೀಚಿನ ದಿನಗಳಲ್ಲಿ ಕೆಎಸ್ಆರ್ಟಿಸಿ ಹೊಸದಾಗಿ ನಾನ್ ಎಸಿ ಸ್ಲೀಪರ್ನ ಪಲ್ಲಕ್ಕಿ ಹೆಸರಿನ 40 ಬಸ್ಗಳ ಖರೀದಿ ಮಾಡಿದೆ. ಅದಕ್ಕೆ ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆ ಬಂದಿದ್ದು, ಬೇಡಿಕೆಯೂ ಹೆಚ್ಚಾಗಿದೆ. ಹಾಗಾಗಿ ಹೊಸದಾಗಿ ಮತ್ತು 100 ಪಲ್ಲಕ್ಕಿ ಬಸ್ಗಳನ್ನು ಖರೀದಿ ಮಾಡಲಾಗುತ್ತಿದೆ. ಇದರಿಂದಾಗಿ ಕೆಎಸ್ಆರ್ಟಿಸಿಯ ನಾನ್ ಎಸಿ ಸ್ಲೀಪರ್ ಸೇವೆಗೆ ಮತ್ತಷ್ಟು ಬಸ್ಗಳು ಸೇರ್ಪಡೆಯಾದಂತಾಗಲಿವೆ ಎಂದರು.
ಬಿಎಂಟಿಸಿ ಬಸ್ಗಳಿಗೆ ಸರ್ಕಾರ ಹೆಚ್ಚಿನ ಒತ್ತು ನೀಡಿದೆ. ಈಗಾಗಲೇ 1800ಕ್ಕೂ ಹೆಚ್ಚಿನ ಬಸ್ಗಳ ಖರೀದಿ ಪ್ರಕ್ರಿಯೆ ಆರಂಭಿಸಲಾಗಿದೆ. ಇದರ ಜೊತೆಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಘೋಷಣೆ ಮಾಡಿರುವ 300ಕ್ಕೂ ಹೆಚ್ಚಿನ ಬಸ್ಗಳು ಸೇರ್ಪಡೆಯಾಗಲಿದ್ದು, ಒಟ್ಟು 2100ಕ್ಕೂ ಹೆಚ್ಚಿನ ಬಸ್ಗಳು ಮುಂದಿನ ಒಂದು ವರ್ಷದ ಒಳಗೆ ನಿಗಮಕ್ಕೆ ಸೇರ್ಪಡೆಯಾಗಲಿವೆ ಎಂದು ಹೇಳಿದರು.
ಹಳೆಯ ಬಸ್ಗಳು ಸಾರಿಗೆ ನಿಗಮಗಳಿಂದ ನಿವೃತ್ತಿಯಾಗಿ ಸ್ಕ್ರ್ಯಾಪ್ಗೆ ಸೇರುತ್ತಿದ್ದಂತೆ ಹೊಸ ಬಸ್ಗಳು ಸೇರ್ಪಡೆಯಾಗಲಿವೆ. ಯಾವ ಕಾರಣಕ್ಕೂ 15 ವರ್ಷ ಮೀರಿದ ಹಾಗು 10 ಲಕ್ಷ ಕಿಲೋಮೀಟರ್ ದಾಟಿದ ಬಸ್ಗಳನ್ನು ಸಾರಿಗೆ ನಿಗಮಗಳಲ್ಲಿ ಸಂಚಾರಕ್ಕೆ ಅವಕಾಶ ನೀಡಲ್ಲ ಎಂದು ಸ್ಪಷ್ಟಪಡಿಸಿದರು.
ಇದನ್ನೂ ಓದಿ : 100 ಕರ್ನಾಟಕ ಸಾರಿಗೆ ಹಾಗೂ 40 ನಾನ್ ಎಸಿ ಸ್ಲೀಪರ್ ಪಲ್ಲಕ್ಕಿ ಬಸ್ಗಳಿಗೆ ಸಿಎಂ, ಡಿಸಿಎಂ ಚಾಲನೆ
