40 ಸಾವಿರ ಲಸಿಕೆ ಡೋಸ್ ಬಿಬಿಎಂಪಿ ವ್ಯಾಪ್ತಿಯ ಕೇಂದ್ರಗಳಿಗೆ ರವಾನೆ: ತಗ್ಗದ ಜನರ ಸರತಿ ಸಾಲು

ಬಿಬಿಎಂಪಿ ವ್ಯಾಪ್ತಿಯ 141 ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಗೆ ಇಂದು 40 ಸಾವಿರ ಲಸಿಕೆ ಡೋಸ್​ಗಳನ್ನು ಪೂರೈಸಲಾಗಿದೆ. ಇಷ್ಟಾದ್ರೂ ಲಸಿಕೆ ಕೊರತೆ ಕಾಡುತ್ತಿದ್ದು, ಜನ ಸರತಿ ಸಾಲಿನಲ್ಲಿ ನಿಲ್ಲುತ್ತಿರುವ ದೃಶ್ಯಗಳು ಸರ್ವೇ ಸಾಮಾನ್ಯವಾಗಿವೆ.

ಬೆಂಗಳೂರು: ಕೋವಿಡ್​ ಲಸಿಕೆ ಪಡೆಯಲು ಜನ ಬೆಂಗಳೂರಿನ ಹಲವೆಡೆ ಸರತಿ ಸಾಲಿನಲ್ಲಿ ನಿಂತಿದ್ದಾರೆ. 40 ಸಾವಿರ ಲಸಿಕೆ ಡೋಸ್​ಗಳು ಬಿಬಿಎಂಪಿ ವ್ಯಾಪ್ತಿಯ ದಾಸಪ್ಪ ಆಸ್ಪತ್ರೆಗೆ ಬಂದಿವೆ. ಇಲ್ಲಿಂದ ನಗರದ ವಿವಿಧ ಆರೋಗ್ಯ ಕೇಂದ್ರ, ಆಸ್ಪತ್ರೆಗಳಿಗೆ ಡೋಸ್​ಗಳು ರವಾನೆಯಾಗಲಿವೆ.

ಅಧಿಕಾರಿಯೊಬ್ಬರ ಪ್ರಕಾರ ಇಂದು ಹಾಗೂ ನಾಳೆ ಮಧ್ಯಾಹ್ನದವರೆಗೂ ನಗರದಾದ್ಯಂತ ಲಸಿಕೆ ಕೊಡಲು ಸಾಧ್ಯವಾಗುವಷ್ಟು ಡೋಸ್​ಗಳು ಬಂದಿವೆ. ಒಟ್ಟು ಪಾಲಿಕೆ ವ್ಯಾಪ್ತಿಯ 141 ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಗೆ ವ್ಯಾಕ್ಸಿನ್ ಪೂರೈಕೆಯಾಗಲಿದ್ದು, ಮಧ್ಯಾಹ್ನದ ಹೊತ್ತಿಗೆ ನಗರ ವ್ಯಾಪ್ತಿಯ ಬಹುತೇಕ ಕಡೆ ವ್ಯಾಕ್ಸಿನ್ ದೊರೆಯಲಿದೆ. ಪ್ರತಿ ಲಸಿಕೆ ಸೆಂಟರ್​ನ ಬೇಡಿಕೆ ಆಧರಿಸಿ ಕನಿಷ್ಠ 200 ವ್ಯಾಕ್ಸಿನ್ ತಲುಪಿಸಲು ತೀರ್ಮಾನ ಕೈಗೊಳ್ಳಲಾಗಿದ್ದು, ಸದ್ಯಕ್ಕಂತೂ ಆತಂಕ ಬೇಡ. ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ವ್ಯಾಕ್ಸಿನ್ ತಡವಾಗಿಯಾದರೂ ಲಭ್ಯವಾಗಲಿದ್ದು, 45 ವರ್ಷಕ್ಕಿಂತ ಮೇಲ್ಪಟ್ಟ ಸೆಕೆಂಡ್ ಡೋಸ್​ಗೆ ಮಾತ್ರ ಸೀಮಿತವಾಗಲಿದೆ ಎಂದು ತಿಳಿಸಿದ್ದಾರೆ.

50 ಜನಕ್ಕೆ ಕೊಡುವಷ್ಟು ವ್ಯಾಕ್ಸಿನ್ ಈಗಾಗಲೇ ಇದ್ದು, 200 ಜನರು ಕ್ಯೂ ನಿಂತಿದ್ದಾರೆ, ವ್ಯಾಕ್ಸಿನ್ ಕೊರತೆ ನೀಗಿಸಲು 8 ವಲಯಗಳಿಗೆ ವ್ಯಾಕ್ಸಿನ್ ರವಾನಿಸಲಾಗುತ್ತಿದೆ. ಇಂದು ಮಧ್ಯಾಹ್ನದ ನಂತರ ಹಾಗೂ ನಾಳೆ ವ್ಯಾಕ್ಸಿನ್ ಕೊರತೆ‌ ಇರುವುದಿಲ್ಲ. ಸದ್ಯಕ್ಕೆ ವ್ಯಾಕ್ಸಿನ್ ಪಡೆಯಲು ಆತುರ ಬೇಡ, ಪ್ರತಿ ಸೆಂಟರ್​ಗೂ ಕನಿಷ್ಠ 100, ಗರಿಷ್ಠ 300 ವ್ಯಾಕ್ಸಿನ್ ನೀಡಲಾಗುತ್ತಿದೆ ಎಂದು ದಾಸಪ್ಪ ಆಸ್ಪತ್ರೆಯ ಸ್ಟೋರೇಜ್ ಅಧಿಕಾರಿ ಮಂಜುಳ ಮಾಹಿತಿ ನೀಡಿದ್ದಾರೆ.