ಬೆಂಗಳೂರು: ಡಿ.ಜೆ ಹಳ್ಳಿ ಹಾಗೂ ಕೆ.ಜಿ ಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ಗಲಭೆಗೆ ಕಾರಣನಾಗಿರುವ ನವೀನ್ ಕುಮಾರ್ ಫೇಸ್ಬುಕ್ ಖಾತೆಯಿಂದ ಮತ್ತೊಂದು ಪೋಸ್ಟ್ ಶೇರ್ ಮಾಡಲಾಗಿದ್ದು, ಮತ್ತೆ ಅನುಮಾನ ಮೂಡಿಸಿದೆ.
ಧರ್ಮದ ಬಗ್ಗೆ ಅವಹೇಳಕಾರಿಯಾಗಿ ಪೋಸ್ಟ್ ಮಾಡಿದ ಕಾರಣ ಘಟನೆ ನಡೆದ ದಿನವೇ ಪೊಲೀಸರು ನವೀನ್ನನ್ನು ಬಂಧಿಸಿದ್ದಾರೆ. ನವೀನ್ ಮೊಬೈಲ್ ಮೂರು ದಿನಗಳ ಹಿಂದೆ ಕಳೆದು ಹೋಗಿದೆ ಎಂದು ಆತನ ತಾಯಿ, ಜಯಂತಿ ಕೂಡ ಹೇಳಿದ್ದಾರೆ. ಇಷ್ಟಿದ್ದರೂ ಕಳೆದ 15 ಗಂಟೆಗಳ ಹಿಂದೆ ಒಂದು ಫೋಸ್ಟ್ವೊಂದನ್ನು ನವೀನ್ ಅಕೌಂಟ್ನಿಂದಲೇ ಶೇರ್ ಮಾಡಲಾಗಿದೆ.
ನವೀನ್ ಕಳೆದ 30 ಗಂಟೆಗಳಿಂದ ಪೊಲೀಸರ ವಶದಲ್ಲಿದ್ದಾನೆ. ಮೊನ್ನೆ ರಾತ್ರಿಯೇ ಆತನನ್ನು ಅರೆಸ್ಟ್ ಮಾಡಲಾಗಿದೆ. ಹೀಗಿರುವಾಗ ಕಳೆದ ಹದಿನೈದು ಗಂಟೆಗಳ ಹಿಂದೆ ಮಾಜಿ ಸಚಿವರೊಬ್ಬರು ಹಿಂದೂ ದೇವರ ಬಗ್ಗೆ ವಾಟ್ಸ್ಆ್ಯಪ್ ಮಾಡಿದ್ದ ಸುದ್ದಿ ಶೇರ್ ಆಗಿದೆ. ಪೀರೋಜ್ ಪಾಷಾ ಎಂಬಾತನ ಅಕೌಂಟ್ನಿಂದ ಶೇರ್ ಆಗಿದ್ದ ಪೋಸ್ಟ್ ಅನ್ನು ನವೀನ್ ಶೇರ್ ಮಾಡಿದ್ದು, ಬಹಳ ಅನುಮಾನಗಳನ್ನ ಹುಟ್ಟು ಹಾಕಿದೆ.
ಸದ್ಯ ತನ್ನ ಮೊಬೈಲ್ ಕಳೆದು ಹೋಗಿದೆ ಎಂದು ನವೀನ್ ಮೊನ್ನೆಯಿಂದ ಪೊಲೀಸರಿಗೆ ಹೇಳಿಕೆ ನೀಡುತ್ತಿದ್ದಾನೆ. ಹಾಗಾದರೆ ಮೊಬೈಲ್ ಯಾರ ಬಳಿ ಇದೆ ಎಂಬ ತನಿಖೆ ನಡೆಸಲಾಗುತ್ತಿದೆ. ನವೀನ್ ಮೊಬೈಲ್ ನಿಜವಾಗಿಯೂ ಕಳ್ಳತನವಾಗಿದೆಯಾ? ಯಾರು ಇದನ್ನ ಪೋಸ್ಟ್ ಮಾಡಿದ್ದಾರೆ ಎಂಬ ಬಗ್ಗೆ ಸಿಸಿಬಿ ಹಾಗೂ ಸೈಬರ್ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
