ದೊಡ್ಡಬಳ್ಳಾಪುರ: ಎಲೆಕ್ಟ್ರಿಕ್ ಬೈಕ್ ಖರೀದಿಸಿದ 6 ತಿಂಗಳಲ್ಲೇ ಹಲವು ಸಮಸ್ಯೆಗಳು ಎದುರಾಗುತ್ತಿವೆ. ನಡುರಸ್ತೆಯಲ್ಲೇ ಬೈಕ್ಗಳು ಕೆಟ್ಟು ನಿಲ್ಲುತ್ತಿವೆ. ಗ್ರಾಹಕರು ಬೈಕ್ ಸಮಸ್ಯೆ ಕುರಿತು ಕಂಪನಿ ಮತ್ತು ಡೀಲರ್‌ಗಳಿಗೆ ಹೇಳಿದರೆ ಸ್ಪಂದಿಸುತ್ತಿಲ್ಲ ಎನ್ನಲಾಗಿದೆ. ಕಂಪನಿಯ ಧೋರಣೆಯಿಂದ ಬೇಸತ್ತ ಗ್ರಾಹಕರು ಎಲೆಕ್ಟ್ರಿಕ್ ದ್ವಿಚಕ್ರವಾಹನ ಶೋ ರೂಂಗೆ ಮುತ್ತಿಗೆ ಹಾಕಿ ಸಿಬ್ಬಂದಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ದೊಡ್ಡಬಳ್ಳಾಪುರ ನಗರದ ರಂಗಪ್ಪ ಸರ್ಕಲ್ನಲ್ಲಿರುವ ಶೋ ರೂಂಗೆ ನಿನ್ನೆ (ಶನಿವಾರ) ಮಧ್ಯಾಹ್ನ ಮುತ್ತಿಗೆ ಹಾಕಿ ಗ್ರಾಹಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
"ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಕೊಂಡುಕೊಳ್ಳುವ ಸಮಯದಲ್ಲಿ ಶೋ ರೂಂನವರು 3 ವರ್ಷ ಗ್ಯಾರೆಂಟಿ ಇರುವುದಾಗಿ ಹೇಳಿದ್ದರು. ಆದರೆ ಬೈಕ್ ಖರೀಸಿದ ಆರೇ ತಿಂಗಳಲ್ಲಿ ಬ್ಯಾಟರಿ ಸಮಸ್ಯೆ ಉದ್ಭವಿಸಿ ಎಲ್ಲೆಂದರಲ್ಲಿ ನಿಂತು ನಿತ್ಯ ಕೆಲಸ ಕಾರ್ಯಗಳಿಗೆ ಅಡ್ಡಿಯಾಗುತ್ತಿದೆ" ಎಂದು ಗ್ರಾಹಕರು ದೂರಿದ್ದಾರೆ.
"ಒಮ್ಮೆ ಬೈಕ್ ನಿಂತರೇ ಇದನ್ನು ಸಾಗಿಸಲು ಮತ್ತೊಂದು ನಾಲ್ಕು ಚಕ್ರದ ವಾಹನವನ್ನು ಅವಲಂಬಿಸುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಬ್ಯಾಟರಿ ಬದಲಿಸುವಂತೆ ಹೇಳಿ ಸುಮಾರು ಒಂದು ತಿಂಗಳಾದರೂ ಶೋ ರೂಂ ಡೀಲರ್ಗಳು ಮತ್ತು ಸಬ್ ಡೀಲರ್ಗಳು ತಲೆಕೆಡಿಸಿಕೊಳ್ಳುತ್ತಿಲ್ಲ" ಎಂದು ಛಾಯಾಗ್ರಾಹಕರ ಸಂಘದ ತಾಲೂಕು ಅಧ್ಯಕ್ಷ ಅಶ್ವತ್ಥ್ ಮಾಧ್ಯಮದವರ ಮುಂದೆ ತಮ್ಮ ಅಳಲು ತೋಡಿಕೊಂಡರು.
ಇದನ್ನೂ ಓದಿ: ಇಂಧನ ದರ ಹೆಚ್ಚಳ : ಪರಿಸರ ಸ್ನೇಹಿ electric bike ಮೊರೆ ಹೋದ ಶಿವಮೊಗ್ಗ ಜನ
ಸ್ಥಳೀಯರಾದ ಜಯರಾಂ ಮಾತನಾಡಿ, "ಎಲೆಕ್ಟ್ರಿಕ್ ಬೈಕ್ ಕೊಂಡುಕೊಳ್ಳಲು ಸಾಲ ಪಡೆದಿದ್ದೇವೆ. ಫೈನಾನ್ಸ್ ಕಂಪನಿಯವರು ಒಂದು ದಿನ ಕಂತಿನ ಹಣ ಕಟ್ಟದಿದ್ದರೆ ವಾಹನವನ್ನು ಎತ್ತಿಕೊಂಡು ಹೋಗುತ್ತಾರೆ. ಇಂತಹ ಸಂದರ್ಭದಲ್ಲಿ ನಾವು ನಮ್ಮ ಎಲೆಕ್ಟ್ರಿಕ್ ಬೈಕ್ನ ಬ್ಯಾಟರಿ ಬದಲಿಸಿ ಕೊಡುವಂತೆ ಶೋ ರೂಂನವರಿಗೆ ಹೇಳಿ ಎರಡು ತಿಂಗಳಾದರೂ ಇನ್ನೂ ಬ್ಯಾಟರಿ ಬದಲಿಸಿಲ್ಲ. ಫೈನಾನ್ಸ್‌ನವರು ನಮ್ಮ ಸಮಸ್ಯೆ ಆಲಿಸಲು ತಯಾರಿಲ್ಲ. ಈಗ ಅವಶ್ಯಕತೆಗೆ‌ಂದು ಕೊಂಡುಕೊಂಡ ಬೈಕ್ ಇಲ್ಲದೇ ಪರದಾಡುವಂತಾಗಿದೆ" ಎಂದರು.
ಇದನ್ನೂ ಓದಿ: ಆಕರ್ಷಕ ವೈಶಿಷ್ಟ್ಯಗಳೊಂದಿಗೆ 'ಎಲೆಕ್ಟ್ರಿಕ್ ಬೈಕ್' ಉತ್ಪಾದಿಸಿದ ಖಾಸಗಿ ಮೋಟಾರ್ ಕಂಪನಿ!
ಎಲ್ಲೆಡೆ ಸಮಸ್ಯೆ: ಎಲೆಕ್ಟ್ರಿಕ್ ಬೈಕ್ ಸಮಸ್ಯೆಗಳು ಕೇವಲ ದೊಡ್ಡಬಳ್ಳಾಪುರ ತಾಲೂಕಿನಲ್ಲಿ ಮಾತ್ರ ಆಗುತ್ತಿಲ್ಲ. ಬದಲಿಗೆ ದೇಶಾದ್ಯಂತ ಇರುವ ಎಲ್ಲಾ ಬ್ರ್ಯಾಂಚ್ಗಳಲ್ಲೂ ಇದೇ ಕಥೆ. ಇನ್ನು ಒಂದು ವಾರದಲ್ಲಿ ಬ್ಯಾಟರಿಗಳು ಬರಲಿವೆ. ಬಂದ ತಕ್ಷಣ ಗ್ರಾಹಕರಿಗೆ ನೀಡಲಾಗುವುದು ಎಂದು ನಗರದ ಬೈಕ್ ಶೋ ರೂಂನ ಸಬ್ ಡೀಲರ್ ಶ್ರೀನಿವಾಸ್ ಮಾತನಾಡಿ ಭರವಸೆ ನೀಡಿದರು. ಈ ನಡುವೆ ಗ್ರಾಹಕರು ಮತ್ತು ಶೋ ರೂಂ ಮಾಲೀಕರ ನಡುವೆ ಮಾತಿನ ಚಕಮಕಿ ನಡೆಯಿತು. ಪೊಲೀಸರು ಮಧ್ಯಪ್ರವೇಶಿಸಿ ಪರಿಸ್ಥಿತಿ ತಿಳಿಗೊಳಿಸಿದರು.
ಇದನ್ನೂ ಓದಿ: ವಾಹನ ಸವಾರರೇ ಗಮನಿಸಿ! ಮಾಲಿನ್ಯ ನಿಯಂತ್ರಣಕ್ಕೆ ಕೇಂದ್ರದ ಮಾಸ್ಟರ್ ಪ್ಲಾನ್ ಹೀಗಿದೆ
