ಟೋಕಿಯೋ: ಒಲಿಂಪಿಕ್ಸ್ನಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿರುವ ಭಾರತದ ಪುರುಷರ ಹಾಕಿ ತಂಡ ಈಗಾಗಲೇ ಕ್ವಾರ್ಟರ್ ಫೈನಲ್ಗೆ ಲಗ್ಗೆ ಹಾಕಿದೆ. ನಾಳೆ ಗ್ರೇಟ್ ಬ್ರಿಟನ್ ವಿರುದ್ಧ ಸೆಣಸಾಟ ನಡೆಸುವ ಮೂಲಕ ಸೆಮಿಫೈನಲ್ಗೆ ಲಗ್ಗೆ ಹಾಕುವ ಇರಾದೆ ಇಟ್ಟುಕೊಂಡಿದೆ.
ಲೀಗ್ ಹಂತದ ಗ್ರೂಪ್ A ನಲ್ಲಿ ಭಾರತ ಆಡಿರುವ 5 ಪಂದ್ಯಗಳ ಪೈಕಿ ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಸೋಲು ಕಂಡಿದ್ದು, ನ್ಯೂಜಿಲ್ಯಾಂಡ್, ಸ್ಪೇನ್, ಅರ್ಜೆಂಟೈನಾ ಹಾಗೂ ಜಪಾನ್ ವಿರುದ್ಧ ಗೆಲುವು ದಾಖಲು ಮಾಡಿ ಎರಡನೇ ತಂಡವಾಗಿ ಕ್ವಾರ್ಟರ್ ಫೈನಲ್ಗೆ ಲಗ್ಗೆ ಹಾಕಿದೆ. ಗ್ರೇಟ್ ಬ್ರಿಟನ್ ಗ್ರೂಪ್ B ಯಲ್ಲಿ ಮೂರನೇ ತಂಡವಾಗಿ ಕ್ವಾರ್ಟರ್ಫೈನಲ್ಗೆ ಲಗ್ಗೆ ಹಾಕಿದ್ದು, ಆಡಿರುವ 5 ಪಂದ್ಯಗಳ ಪೈಕಿ ಎರಡಲ್ಲಿ ಗೆಲುವು, ಎರಡು ಡ್ರಾ ಹಾಗೂ ಮತ್ತೊಂದು ಪಂದ್ಯದಲ್ಲಿ ಸೋಲು ಕಂಡಿದೆ.
ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಗ್ರೇಟ್ ಬ್ರಿಟನ್ಗೆ ಹೋಲಿಕೆ ಮಾಡಿದಾಗ ಭಾರತದ ಪ್ರದರ್ಶನ ಉತ್ತಮವಾಗಿದ್ದು, ಸತತವಾಗಿ ಮೂರು ಪಂದ್ಯಗಳಲ್ಲಿ ಗೆಲುವು ದಾಖಲು ಮಾಡುವ ಮೂಲಕ ಆತ್ಮವಿಶ್ವಾಸ ಮತ್ತಷ್ಟು ಹೆಚ್ಚಿಸಿಕೊಂಡಿದೆ.
ಇದನ್ನೂ ಓದಿರಿ: ಒಲಿಂಪಿಕ್ಸ್ ಇತಿಹಾಸದಲ್ಲೇ ಮೊದಲ ಸಲ ನಾಕೌಟ್ ಹಂತಕ್ಕೆ ತಲುಪಿದ ಭಾರತದ ಮಹಿಳಾ ಹಾಕಿ ತಂಡ
ನಾಳೆ ಸಂಜೆ 5:30ಕ್ಕೆ ಈ ಪಂದ್ಯ ನಡೆಯಲಿದ್ದು, 41 ವರ್ಷಗಳ ನಂತರ ಮೊದಲ ಬಾರಿಗೆ, ಸೆಮಿಫೈನಲ್ನಲ್ಲಿ ಸ್ಥಾನಕ್ಕಾಗಿ ಮನ್ಪ್ರೀತ್ ಸಿಂಗ್ ಬಳಗ ಸೆಣಸಲಿದೆ. ಉಳಿದಂತೆ ಸೆಮಿಫೈನಲ್ನಲ್ಲಿ ಸ್ಥಾನ ಖಚಿತ ಮಾಡಿಕೊಳ್ಳಲು ಅರ್ಜೆಂಟೈನಾ-ಜರ್ಮನಿ, ಆಸ್ಟ್ರೇಲಿಯಾ-ನೆದರ್ಲ್ಯಾಂಡ್ಸ್ ಹಾಗೂ ಬೆಲ್ಜಿಯಂ-ಸ್ಪೇನ್ ನಡುವೆ ಫೈಟ್ ನಡೆಯಲಿದೆ. ಒಲಿಂಪಿಕ್ಸ್ನಲ್ಲಿ ಭಾರತ ಸತತವಾಗಿ 6 ಚಿನ್ನ ಗೆದ್ದಿರುವ ಇತಿಹಾಸ ಕೂಡ ಹೊಂದಿದೆ. ಹಾಕಿಯಲ್ಲಿ ಇಲ್ಲಿಯವರೆಗೆ 8 ಬಂಗಾರದ ಪದಕ ಗೆದ್ದಿರುವ ಭಾರತ 1980ರ ಮಾಸ್ಕೋ ಒಲಿಂಪಿಕ್ಸ್ ಬಳಿಕ ಯಾವುದೇ ಪದಕ ಗೆದ್ದಿಲ್ಲ. ಆದರೆ ಇದೀಗ ಮತ್ತೊಂದು ಸುವರ್ಣವಕಾಶ ಒದಗಿ ಬಂದಿದೆ.
