ಜುರಿಚ್(ಸ್ವಿಟ್ಜರ್ಲ್ಯಾಂಡ್): ಟೆನ್ನಿಸ್ ಲೋಕದ ಲೆಜೆಂಡ್ ರೋಜರ್ ಫೆಡರರ್ ಮಂಡಿ ನೋವಿನಿಂದ ಬಳಲುತ್ತಿದ್ದು, ಮುಂಬರುವ ಫ್ರೆಂಚ್ ಓಪನ್ನಿಂದ ಹಿಂದೆ ಸರಿದಿದ್ದಾರೆ.
2020ರ ಆಸ್ಟ್ರೇಲಿಯಾ ಓಪನ್ನಲ್ಲಿ ಸೆಮಿಫೈನಲ್ ತಲುಪಿದರೂ ಜೋಕೊವಿಕ್ ವಿರುದ್ಧ ಸೋಲನುಭವಿಸಿ ನಿರಾಶೆಯನುಭವಿಸಿದ್ದರು. ಇದೀಗ ಮಂಡಿ ಶಸ್ತ್ರಚಿಕಿತ್ಸೆಗೆ ಒಳಗಾಗುತ್ತಿದ್ದು ಪ್ರತಿಷ್ಠಿತ ಫ್ರೆಂಚ್ ಓಪನ್ನಿಂದಲೂ ಹೊರಬಿದ್ದಿದ್ದಾರೆ. 38 ವರ್ಷದ ರೋಜರ್ ಬುಧವಾರ ಸ್ವಿಟ್ಜರ್ಲ್ಯಾಂಡ್ನಲ್ಲಿ ಆರ್ತ್ರೋಸ್ಕೋಪಿಕ್ ಸರ್ಜರಿಗೆ ಒಳಾಗಾಗಲಿದ್ದೇನೆ ತಮ್ಮ ಟ್ವಿಟರ್ ಮೂಲಕ ತಿಳಿಸಿದ್ದಾರೆ.
" ಬಲ ಮಂಡಿಯ ನೋವು ನನ್ನನ್ನು ಕಾಡುತ್ತಿದೆ. ಹಾಗಾಗಿ ನನ್ನ ತಂಡದೊಂದಿಗೆ ಚರ್ಚೆ ಹಾಗೂ ಪರೀಕ್ಷೆ ನಡೆಸಿದ ನಂತರ ಫ್ರೆಂಚ್ ಓಪನ್ನಿಂದ ಹೊರಗುಳಿಯುವ ನಿರ್ಧಾರ ಕೈಗೊಂಡಿದ್ದೇನೆ. ನಾನು ನಿನ್ನೆ ಸ್ವಿಟ್ಜರ್ಲ್ಯಾಂಡ್ನಲ್ಲಿ ಆರ್ತ್ರೋಸ್ಕೊಪಿಕ್ ಸರ್ಜರಿ ಮಾಡಿಸಿಕೊಳ್ಳಲು ನಿರ್ಧರಿಸಿದೆ" ಎಂದು ಬರೆದುಕೊಂಡಿದ್ದಾರೆ.
"ನನ್ನ ನಿರ್ಧಾರ ಉತ್ತಮ ಸಮಯದಲ್ಲಾಗಿದೆ ಎಂದು ವೈದ್ಯರು ಕೂಡ ಖಚಿತಪಡಿಸಿದ್ದು, ಆದಷ್ಟು ಬೇಗ ಚೇತರಿಸಿಕೊಳ್ಳಬಹುದು ಎಂಬ ಭರವಸೆ ನೀಡಿದ್ದಾರೆ. ಇದರಿಂದ ನಾನು ಅನಿವಾರ್ಯವಾಗಿ, ದುಬೈ ಓಪನ್, ಇಂಡಿಯನ್ ವೆಲ್ಸ್, ಬೊಗೋಟ, ಮಿಯಾಮಿ, ಹಾಗೂ ಫ್ರೆಂಚ್ ಓಪನ್ನ ಮಿಸ್ ಮಾಡಿಕೊಳ್ಳುತ್ತಿರುವೆ, ನನ್ನನ್ನು ಬೆಂಬಲಿಸಿದ ಪ್ರತಿಯೊಬ್ಬರಿಗೂ ಧನ್ಯವಾದಗಳು. ಮತ್ತೆ ಆಟವಾಡುವುದಕ್ಕೆ ಕಾಯಲು ನನ್ನಿಂದಲೂ ಸಾಧ್ಯವಿಲ್ಲ, ಶೀಘ್ರದಲ್ಲೇ ಹುಲ್ಲಿನ ಅಂಕಣದಲ್ಲಿ ಸಿಗೋಣ ಎಂದು ಬರೆದುಕೊಂಡಿದ್ದಾರೆ.
ಫೆಡರರ್ ಈಗಾಗಲೆ 20 ಗ್ರ್ಯಾಂಡ್ಸ್ಲಾಮ್ ಗೆದ್ದು ಅಧಿಕ ಪ್ರಶಸ್ತಿ ಗೆದ್ದ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ. ಎರಡನೇ ಸ್ಥಾನದಲ್ಲಿರುವ ರಫೆಲ್ ನಡಾಲ್ 19 ಗ್ರ್ಯಾಂಡ್ಸ್ಲಾಮ್ ಗೆದ್ದಿದ್ದಾರೆ. ಇದೀಗ ಫೆಡರರ್ ಹೊರಬಿದ್ದಿರುವುದು ನಡಾಲ್ ಕೊಂಚ ಒತ್ತಡ ಕಡಿಮೆಯಾಗಿದ್ದು, ಈಗೇನಿದ್ದರೂ ಆಸ್ಟ್ರೇಲಿಯನ್ ಓಪನ್ ಚಾಂಪಿಯನ್ ಜೋಕೊವಿಕ್ರಿಂದ ಮಾತ್ರ ಪ್ರಬಲ ಪೈಪೋಟಿಯ ನಿರೀಕ್ಷೆಯಲ್ಲಿದ್ದಾರೆ.
