ದೋಹಾ(ಕತಾರ್): 2023 ರ ವಂಡಾ ಡೈಮಂಡ್ ಲೀಗ್ ದೋಹಾದ ಕತಾರ್ ಸ್ಪೋರ್ಟ್ ಕ್ಲಬ್ನಲ್ಲಿ ನಾಳೆಯಿಂದ ಪ್ರಾರಂಭವಾಗಲಿದೆ. ಈ ಲೀಗ್ನಲ್ಲಿ ಡೈಮಂಡ್ ಟ್ರೋಫಿಯನ್ನು ಗೆದ್ದ ಮೊದಲ ಭಾರತೀಯ ಆಟಗಾರ ನೀರಜ್ ಚೋಪ್ರಾ ಅವರು ಅಥ್ಲೆಟಿಕ್ಸ್ ಈವೆಂಟ್‌ಗಳಲ್ಲಿ ಒಂದರಲ್ಲಿ ಭಾಗವಹಿಸಲಿದ್ದಾರೆ.
ದೋಹಾ ಕೂಟದಲ್ಲಿ ಕಾಮನ್‌ವೆಲ್ತ್ ಕ್ರೀಡಾಕೂಟವೂ ನಡೆಯಲಿದ್ದು, ಟ್ರಿಪಲ್ ಜಂಪ್ ಚಾಂಪಿಯನ್ ಎಲ್ಡೋಸ್ ಪಾಲ್ ಸೇರಿದಂತೆ ಪೋರ್ಚುಗಲ್‌ನ ಹಾಲಿ ಒಲಿಂಪಿಕ್ ಚಾಂಪಿಯನ್ ಪೆಡ್ರೊ ಪಿಚಾರ್ಡೊ ಮತ್ತು ಕ್ಯೂಬಾದ ಡೈಮಂಡ್ ಲೀಗ್ ವಿಜೇತ ಆಂಡಿ ಡಯಾಜ್ ಹೆರ್ನಾಂಡೆಜ್ ಇವರು ಕ್ರೀಡಾಕೂಟದಲ್ಲಿ ಸ್ಪರ್ಧಿಸಲಿದ್ದಾರೆ.
2023 ರ ವಂಡಾ ಡೈಮಂಡ್ ಲೀಗ್ JioCinema ಮತ್ತು Sports18 ನಲ್ಲಿ ನೇರಪ್ರಸಾರವಾಗಲಿದೆ. 2022 ರಲ್ಲಿ ಜ್ಯೂರಿಚ್‌ನಲ್ಲಿ ನಡೆದ ಡೈಮಂಡ್ ಲೀಗ್ನಲ್ಲಿ ನೀರಜ್ ಚೋಪ್ರಾರವರು 88.44 ಮೀಟರ್ ಜಾವೆಲಿನ್ ಎಸೆತದಲ್ಲಿ ಡೈಮಂಡ್ ಟ್ರೋಫಿಯನ್ನು ತಮ್ಮದಾಗಿಸಿಕೊಂಡಿದ್ದರು. ಈ ಬಾರಿಯೂ ದೋಹಾದ ಕತಾರ್ ಸ್ಪೋರ್ಟ್ ಕ್ಲಬ್ನಲ್ಲಿ ನಡೆಯಲಿರುವ ಡೈಮಂಡ್ ಲೀಗ್ 2023ರಲ್ಲೂ ಚೋಪ್ರಾ ಅವರು ಭಾಗವಹಿಸಲಿದ್ದಾರೆ.
ನೀರಜ್ ಚೋಪ್ರಾಗೆ ಪ್ರತಿಸ್ಪರ್ಧಿಯಾಗಿ ಹಾಲಿ ವಿಶ್ವ ಚಾಂಪಿಯನ್ ಮತ್ತು 2022 ದೋಹಾ ಕೂಟದ ವಿಜೇತ ಗ್ರೆನಡಾದ ಆಂಡರ್ಸನ್ ಪೀಟರ್ಸ್ (ಪಿಬಿ: 93.07 ಮೀ), ಟೋಕಿಯೊ ಒಲಿಂಪಿಕ್ಸ್ ಬೆಳ್ಳಿ ಪದಕ ವಿಜೇತ ಜೆಕ್ ಗಣರಾಜ್ಯದ ಜಾಕುಬ್ ವಾಡ್ಲೆಜ್ (ಪಿಬಿ: 90.88 ಮೀ), ಯುರೋಪಿಯನ್ ಚಾಂಪಿಯನ್ ಜರ್ಮನಿಯ ಜೂಲಿಯನ್ ವೆಬರ್ (ಪಿಬಿ: 89.54 ಮೀ), ಮತ್ತು ಟ್ರಿನಿಡಾಡ್ ಮತ್ತು ಟೊಬಾಗೋದ ಮಾಜಿ ಒಲಿಂಪಿಕ್ ಚಾಂಪಿಯನ್ ಕೆಶೋರ್ನ್ ವಾಲ್ಕಾಟ್ (PB: 90.16 ಮೀ) ಈ ಸೀಸನ್ನಲ್ಲಿ ಟಫ್ ಕಾಂಫಿಟೇಶನ್ ನೀಡಲಿದ್ದಾರೆ.
ಡೈಮಂಡ್ ಲೀಗ್ ಎನ್ನುವಂಥದ್ದು ಅತ್ಯಂತ ಪ್ರತಿಷ್ಠಿತ ಕ್ರೀಡಾಕೂಟವಾಗಿದ್ದು, ಇದು ವಿಶ್ವ ಅಥ್ಲೆಟಿಕ್ಸ್‌ನ ಏಕದಿನ ಸಭೆ ಸ್ಪರ್ಧೆಗಳ ಸಾಲಿನಲ್ಲಿ ಉನ್ನತ ಶ್ರೇಣಿಯನ್ನು ಪಡೆದಿದೆ. 2023 ರ ಡೈಮಂಡ್ ಲೀಗ್ ಒಟ್ಟು 13 ಸಭೆಗಳನ್ನು ಒಳಗೊಂಡಿದ್ದು, ದೋಹಾದಲ್ಲಿ ಮೊದಲ ಈವೆಂಟ್ನಿಂದ ಪ್ರಾರಂಭವಾಗಲಿದೆ. ನಾಳೆಯಿಂದ ಆರಂಭವಾಗಲಿರುವ 2023ರ ವಂಡಾ ಡೈಮಂಡ್ ಲೀಗ್ 2023ರ ಫೈನಲ್ ಹಣಾಹಣಿ ಸೆಪ್ಟಂಬರ್ 16 ಮತ್ತು 17 ರಂದು ಅಂದರೆ ಒಟ್ಟು 2 ದಿನ ಯುಜೀನ್‌ನಲ್ಲಿ ನಡೆಯಲಿದೆ.
ನಾಳೆ ನೀರಜ್ ಚೋಪ್ರಾರನ್ನು ಹೊರತುಪಡಿಸಿ ಇತರ ಒಲಿಂಪಿಕ್ ಮತ್ತು ವಿಶ್ವ ಚಾಂಪಿಯನ್‌ಗಳು ದೋಹಾದಲ್ಲಿ ಈ ಬಾರಿಯ ಸೀಸನ್ ಓಪನರ್ ಆಗಿ ಭಾಗವಹಿಸಲಿದ್ದಾರೆ. ಮಹಿಳೆಯರ 100 ಮೀ ಓಟದಲ್ಲಿ ಐದು ಬಾರಿ ಒಲಿಂಪಿಕ್ ಪದಕ ಗಿಟ್ಟಿಸಿಕೊಂಡ ಜಮೈಕಾದ ಶೆರಿಕಾ ಜಾಕ್ಸನ್, ಗ್ರೇಟ್ ಬ್ರಿಟನ್‌ನ ಮಾಜಿ 200 ಮೀಟರ್ ವಿಶ್ವ ಚಾಂಪಿಯನ್ ದಿನಾ ಆಶರ್-ಸ್ಮಿತ್ ಮತ್ತು ಮೆಲಿಸ್ಸಾ ಜೆಫರ್ಸನ್, ಅಬ್ಬಿ ಸ್ಟೈನರ್, ಟ್ವಾನಿಶಾ ಟೆರ್ರಿ ಮತ್ತು ಶಾಕ್ರಿ ರಿಚರ್ಡ್ಸನ್ ಒಳಗೊಂಡ ಪ್ರತಿಭಾವಂತ ಅಮೆರಿಕನ್ ಕ್ವಾರ್ಟೆಟ್ ಭಾಗವಹಿಸಲಿದ್ದಾರೆ.
200 ಮೀಟರ್ ಪುರುಷರ ಓಟದಲ್ಲಿ ಹಾಲಿ ಒಲಿಂಪಿಕ್ 200 ಮೀಟರ್ ಚಾಂಪಿಯನ್ ಕೆನಡಾದ ಆಂಡ್ರೆ ಡಿ ಗ್ರಾಸ್ಸೆ, 400 ಮೀಟರ್ ವಿಶ್ವ ಚಾಂಪಿಯನ್ ಅಮೆರಿಕದ ಮೈಕೆಲ್ ನಾರ್ಮನ್, 100 ಮೀಟರ್ ವಿಶ್ವ ಚಾಂಪಿಯನ್ ಮತ್ತು ಒಲಿಂಪಿಕ್ ಬೆಳ್ಳಿ ಪದಕ ವಿಜೇತ ಅಮೆರಿಕದ ಫ್ರೆಡ್ ಕೆರ್ಲಿ ಮತ್ತು ಒಲಿಂಪಿಕ್ ಮತ್ತು ವಿಶ್ವ 200 ಮೀಟರ್ ಬೆಳ್ಳಿ ಪದಕ ವಿಜೇತ ಅಮೆರಿಕದ ಕೆನ್ನಿ ಬೆಡ್ನಾರೆಕ್ ಭಾಗವಹಿಸಲಿದ್ದಾರೆ.
ಇದನ್ನೂ ಓದಿ: ವೇಗವಾಗಿ ಚೇತರಿಸಿಕೊಳ್ಳುತ್ತಿರುವ ರಿಷಭ್ ಪಂತ್; ಇನ್‌ಸ್ಟಾಗ್ರಾಮ್ನಲ್ಲಿ ನ್ಯೂ ಲುಕ್..
