ಹೈದರಾಬಾದ್: ಕ್ರೀಡೆ ಜನಪ್ರಿಯ ಮನರಂಜನೆ ಕೂಡಾ ಹೌದು. ಭಾರತದ ಕ್ರೀಡಾಪಟುಗಳು ವರ್ಷದಿಂದ ವರ್ಷಕ್ಕೆ ಹೊಸ ಹೊಸ ಸಾಧನೆಗಳನ್ನು ಮಾಡುತ್ತಾ ಸಾಗುತ್ತಿದ್ದಾರೆ. 2024ರಲ್ಲಿ ನಡೆಯುವ ಪ್ರಮುಖ ಕ್ರೀಡಾ ಚಟುವಟಿಕೆಗಳ ಮಾಹಿತಿ ಇಲ್ಲಿದೆ.
- ಎಎಫ್ಸಿ ಏಷ್ಯನ್ ಕಪ್-ಫುಟ್ಬಾಲ್: ಜನವರಿ 12ರಿಂದ ಫೆಬ್ರವರಿ 10: 2022ರ ಫಿಫಾ ವಿಶ್ವಕಪ್ ಆಯೋಜಿಸಿದ ನಂತರ ಕತಾರ್ ದೇಶವು ಏಷ್ಯನ್ ಕಪ್ 2024 ನಡೆಸಿಕೊಡುತ್ತಿದೆ. ಏಷ್ಯನ್ ರಾಷ್ಟ್ರಗಳು ಪ್ರಬಲ ಪೈಪೋಟಿಗೆ ಸಜ್ಜಾಗಿವೆ. ಅಲ್ಲದೆ, ಭಾರತದ ಸ್ಟಾರ್ ಫುಟ್ಬಾಲಿಗ ಸುನಿಲ್ ಚೆಟ್ರಿ ಅಂತರರಾಷ್ಟ್ರೀಯ ಫುಟ್ಬಾಲ್ಗೆ ವಿದಾಯ ಹೇಳುವ ಸಾಧ್ಯತೆಯೂ ಇದೆ. ಏಷ್ಯನ್ ಕಪ್‌ನಲ್ಲಿ ಭಾರತವು ಸಿರಿಯಾ, ಉಜ್ಬೇಕಿಸ್ತಾನ್ ಮತ್ತು ಆಸ್ಟ್ರೇಲಿಯಾ ತಂಡಗಳಿರುವ ಗುಂಪಿನಲ್ಲಿದೆ.
- ಆಸ್ಟ್ರೇಲಿಯನ್ ಓಪನ್-ಟೆನಿಸ್: ಜ.14ರಿಂದ ಜ.28: ವರ್ಷದ ಮೊದಲ ಗ್ರ್ಯಾನ್‌ಸ್ಲಾಮ್ಗೆ ರಾಫೆಲ್ ನಡಾಲ್ ಸುಮಾರು ಒಂದು ವರ್ಷದ ನಂತರ ಮರಳಲಿದ್ದಾರೆ. ಮೆಲ್ಬೋರ್ನ್‌ನ ರಾಡ್ ಲೇವರ್ ಅರೆನಾದಲ್ಲಿ ಪ್ರಶಸ್ತಿಗಾಗಿ ದಿಗ್ಗಜ ಮತ್ತು ಯವ ಆಟಗಾರರ ನಡುವೆ ಪೈಪೋಟಿ ನಿರೀಕ್ಷೆ ಇದೆ.
- ಐಸಿಸಿ U-19 ಕ್ರಿಕೆಟ್ ವಿಶ್ವಕಪ್: ಜ.19ರಿಂದ ಫೆ.11: ವರ್ಷದ ಪ್ರಮುಖ ಐಸಿಸಿ ಕ್ರಿಕೆಟ್ ಟೂರ್ನಿ ಆರಂಭವಾಗಲಿದೆ. ಉದಯೋನ್ಮುಖ ಪ್ರತಿಭೆಗಳು ವರ್ಷದ ಮೊದಲ ತಿಂಗಳಲ್ಲಿ ತಮ್ಮ ಅದೃಷ್ಟ ಪರೀಕ್ಷೆ ನಡೆಸಲಿದ್ದು, ಎಷ್ಟು ಜನ ವರ್ಷಾಂತ್ಯದ ವೇಳೆಗೆ ರಾಷ್ಟ್ರೀಯ ತಂಡದ ಕದ ತಟ್ಟುತ್ತಾರೆ ಎಂಬುದನ್ನು ಕಾದುನೋಡಬೇಕು.
- ಫ್ರೆಂಚ್ ಓಪನ್-ಟೆನಿಸ್: ಮೇ 20ರಿಂದ ಜೂನ್ 9: ಕ್ಲೇ ಕೋರ್ಟ್ಗೆ ರಾಫೆಲ್ ನಡಾಲ್ ಮರಳಲಿದ್ದಾರೆ. ಹೆಚ್ಚು ಫ್ರೆಂಚ್ ಓಪನ್ ಪ್ರಶಸ್ತಿಗಳನ್ನು (14) ಗೆದ್ದಿರುವ ನಡಾಲ್ ಅವರು ನೊವಾಕ್ ಜೊಕೊವಿಕ್, ಕಾರ್ಲೋಸ್ ಅಲ್ಕರಾಜ್, ಡೇನಿಯಲ್ ಮೆಡ್ವೆಡೆವ್ ಮತ್ತು ಇತರ ಬಲಿಷ್ಟರೊಂದಿಗೆ ಗುದ್ದಾಡುವರು.
- ಐಸಿಸಿ ಪುರುಷರ ಟಿ20 ವಿಶ್ವಕಪ್- ಕ್ರಿಕೆಟ್: ಜೂನ್ 4ರಿಂದ ಜೂ.30: ವೆಸ್ಟ್ ಇಂಡೀಸ್ ಮತ್ತು ಯುಎಸ್ಎನಲ್ಲಿ ಈ ಬಾರಿ ಚುಟುಕು ವಿಶ್ವಕಪ್ ನಡೆಯಲಿದೆ. ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ಪ್ರತಿ ವರ್ಷ ಐಸಿಸಿ ಪುರುಷರ ಟೂರ್ನಿ ಆಯೋಜಿಸುತ್ತಿದೆ. 23ರಲ್ಲಿ ಏಕದಿನ ವಿಶ್ವಕಪ್ ನಡೆದರೆ, 24ರಲ್ಲಿ ಟಿ20, 25ರಲ್ಲಿ ಟೆಸ್ಟ್ ಚಾಂಪಿಯನ್ಶಿಪ್ ಮತ್ತು ಚಾಂಪಿಯನ್ಸ್ ಟ್ರೋಫಿ ನಡೆಯಲಿದೆ.
- ಯುರೋ ಕಪ್-ಫುಟ್ಬಾಲ್: ಜೂನ್ 14ರಿಂದ ಜುಲೈ 14: ಈ ಪಂದ್ಯಾವಳಿಯಲ್ಲಿ ಕ್ರಿಸ್ಟಿಯಾನೋ ರೊನಾಲ್ಡೊ, ಕೈಲಿಯನ್ ಎಂಬಪ್ಪೆ, ಕರೀಮ್ ಬೆಂಜೆಮಾ ಮತ್ತು ರಾಬರ್ಟ್ ಲೆವಾಂಡೋಸ್ಕಿ ಅವರಂತಹ ತಾರಾ ಆಟಗಾರರು ಭಾಗವಹಿಸುತ್ತಾರೆ. ರೊನಾಲ್ಡೊಗೆ ಇದು ಕೊನೆಯ ಯುರೋ ಆಗುವ ಸಾಧ್ಯತೆಯೂ ದಟ್ಟವಾಗಿದೆ.
- ವಿಂಬಲ್ಡನ್-ಟೆನಿಸ್: ಜುಲೈ 1ರಿಂದ ಜುಲೈ 14: ಒಲಿಂಪಿಕ್ಸ್‌ಗೆ ಮುಂಚಿತವಾಗಿ, ಟೆನಿಸ್ ಆಟಗಾರರು ಗ್ರಾಸ್ ಕೋರ್ಟ್‌ನಲ್ಲಿ ಆಡುವ ಗ್ರ್ಯಾಂಡ್‌ಸ್ಲಾಮ್‌ನ ಮೂಲಕ ಅದಕ್ಕೆ ಸಿದ್ಧರಾಗಲು ಅವಕಾಶ ಹೊಂದಿರುತ್ತಾರೆ. ಕಾರ್ಲೋಸ್ ಅಲ್ಕರಾಜ್ ತಮ್ಮ ಕಪ್ ಉಳಿಸಿಕೊಳ್ಳಲು ಹೋರಾಡಲಿದ್ದಾರೆ.
- ಒಲಿಂಪಿಕ್ಸ್: ಜುಲೈ 26ರಿಂದ ಆಗಸ್ಟ್ 11: ಏಷ್ಯನ್ ಗೇಮ್ಸ್ 2023ರಲ್ಲಿ ಐತಿಹಾಸಿಕ ಪ್ರದರ್ಶನದ ನಂತರ, ಭಾರತವು ವಿಶ್ವ ಮಟ್ಟದಲ್ಲಿ ಅಥ್ಲೆಟಿಕ್ಸ್ ವಿಭಾಗದಲ್ಲಿ ಇನ್ನಷ್ಟು ದೊಡ್ಡ ಸಾಧನೆಗೆ ಎದುರು ನೋಡುತ್ತಿದೆ. ಪ್ಯಾರಿಸ್ ಒಲಿಂಪಿಕ್ಸ್ ಮತ್ತು ಪ್ಯಾರಾಲಿಂಪಿಕ್ಸ್ ಗೇಮ್ಸ್ 2024ರಲ್ಲಿ ಏಷ್ಯಾಡ್ ರೀತಿಯಲ್ಲಿಯೇ ಪದಕ ಬೇಟೆಯಾಡಲು ಕ್ರೀಡಾಪಟುಗಳು ಸಜ್ಜಾಗುತ್ತಿದ್ದಾರೆ. ಒಲಿಂಪಿಕ್ ಕ್ರೀಡಾಕೂಟವು ಜುಲೈ 26ರಿಂದ ಆಗಸ್ಟ್ 11ರವರೆಗೆ ನಡೆಯಲಿದೆ. 19 ದಿನಗಳಲ್ಲಿ 329 ಸ್ಪರ್ಧೆಗಳು ನಡೆಯಲಿದ್ದು, 10,500 ಕ್ರೀಡಾಪಟುಗಳು 32 ವಿವಿಧ ರೀತಿಯ ಕ್ರೀಡೆಗಳಲ್ಲಿ ಭಾಗವಹಿಸುತ್ತಾರೆ.
- ಯುಎಸ್ ಓಪನ್-ಟೆನಿಸ್: ಆಗಸ್ಟ್ 26ರಿಂದ ಸೆಪ್ಟೆಂಬರ್ 8: ನ್ಯೂಯಾರ್ಕ್‌ನ ಫ್ಲಶಿಂಗ್ ಮೆಡೋಸ್‌ನಲ್ಲಿರುವ ಬಿಲ್ಲಿ ಜೀನ್ ಕಿಂಗ್ ನ್ಯಾಷನಲ್ ಟೆನಿಸ್ ಸೆಂಟರ್‌ನಲ್ಲಿ ಸ್ಪರ್ಧಿಸಲು ನಿರ್ಧರಿಸಲಾಗಿದೆ. ಯುಎಸ್ ಓಪನ್ ವಿಶ್ವದ ಅತ್ಯಂತ ಹಳೆಯ ಟೂರ್ನಮೆಂಟ್‌ಗಳಲ್ಲಿ ಒಂದು. ಒಲಿಂಪಿಕ್ಸ್ ಮುಗಿದ ತಕ್ಷಣ ಪಂದ್ಯಾವಳಿ ಇರುವುದರಿಂದ ಸ್ಟಾರ್ ಆಟಗಾರರು ವಿಶ್ರಾಂತಿ ಪಡೆಯಬಹುದು.
- ಬಿಡಬ್ಲ್ಯುಎಫ್ ವರ್ಲ್ಡ್ ಟೂರ್ ಫೈನಲ್ಸ್: ಡಿ.11ರಿಂದ 15: ವರ್ಷದ ಕೊನೆಯಲ್ಲಿ ಬ್ಯಾಡ್ಮಿಂಟನ್ ಆಟಗಾರರು ಚೀನಾದ ಹ್ಯಾಂಗ್‌ಝೌನಲ್ಲಿ ಪೈಪೋಟಿಗಿಳಿಯಲಿದ್ದಾರೆ. 2023ರಲ್ಲಿ ಭಾರತದ ಶಟ್ಲರ್‌ಗಳು ಉತ್ತಮ ಪ್ರದರ್ಶನ ನೀಡಿದ್ದು, ಅದೇ ಫಾರ್ಮ್ನಲ್ಲಿ ಮುಂದುವರೆಯುವ ನಿರೀಕ್ಷೆ ಇದೆ.
ಇದನ್ನೂ ಓದಿ: ಏಕದಿನ ಕ್ರಿಕೆಟ್‌ಗೆ ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್ ವಿದಾಯ
