ಲಿಮಾ: ಭಾರತದ ಯುವ ಶೂಟರ್ ಐಶ್ವರಿ ಪ್ರತಾಪ್ ಸಿಂಗ್ ತೋಮರ್ ಐಎಸ್ಎಸ್ಎಫ್ ಜೂನಿಯರ್ ವಿಶ್ವ ಚಾಂಪಿಯನ್ಶಿಪ್ಸ್ನ 50 ಮೀಟರ್ ರೈಫಲ್ 3ನೇ ವಿಭಾಗದಲ್ಲಿ ವಿಶ್ವದಾಖಲೆಯ ಜೊತೆಗೆ ಚಿನ್ನದ ಪದಕಕ್ಕೆ ಕೊರಳೊಡ್ಡಿದ್ದಾರೆ.
ಸೋಮವಾರ ನಡೆದ ಫೈನಲ್ನಲ್ಲಿ ತೋಮರ್ ಅರ್ಹತಾ ಸುತ್ತಿನಲ್ಲಿ 1185 ಅಂಕ ಪಡೆದು ಜೂನಿಯರ್ ವಿಶ್ವದಾಖಲೆಯನ್ನು ಸರಿಗಟ್ಟಿದ್ದರು. ಇಂದು ನಡೆದ ಫೈನಲ್ನಲ್ಲಿ ಅವರು 463.4 ಅಂಕ ಪಡೆದು ವಿಶ್ವದಾಖಲೆ ಬ್ರೇಕ್ ಮಾಡಿದರು. ಅಲ್ಲದೇ ಬೆಳ್ಳಿ ಪದಕ ಗೆದ್ದ ಫ್ರಾನ್ಸ್ನ ಕ್ರಿಜ್(456.5) ಗಿಂತ 7 ಅಂಕ ಮುನ್ನಡೆ ಸಾಧಿಸಿ ಚಿನ್ನ ಗೆದ್ದರು. ಅಮೆರಿಕದ ಗೆವಿನ್ ಬೇರ್ನಿಕ್ 446.6 ಅಂಕ ಪಡೆದು ಕಂಚಿನ ಪದಕ ಪಡೆದರು.
ಇದೇ ವಿಭಾಗದಲ್ಲಿ ಸ್ಪರ್ಧಿಸಿದ್ದ ಭಾರತದ ಸಂಸ್ಕಾರ್ ಹವೇಲಿಯಾ 1160 ಅಂಕಗಳಿಸಿ 11ನೇ ಸ್ಥಾನ, ಪಂಕಜ್ ಮುಖೇಜ 15(1157), ಸರ್ತಾಜ್ ತಿವಾನ 16(1157) ಮತ್ತು ಗುರ್ಮನ್ ಸಿಂಗ್(1153) 22ನೇ ಸ್ಥಾನ ಪಡೆದರು.
ಇದಕ್ಕೂ ಮೊದಲು ನಡೆದ 25 ಮೀಟರ್ ಪಿಸ್ತೂಲ್ ವಿಭಾಗದಲ್ಲಿ 14 ವರ್ಷದ ಶೂಟರ್ ನಾಮ್ಯ ಕಪೂರ್ ಭಾರತದ ಪರ ಈಗಾಗಲೇ ಬೇರೆ ವಿಭಾಗಗಳಲ್ಲಿ 3 ಚಿನ್ನದ ಪದಕ ಗೆದ್ದಿದ್ದ ಪ್ರತಿಸ್ಪರ್ಧಿ ಮನು ಭಾಕರ್ ಅವರನ್ನು ಹಿಂದಿಕ್ಕಿ ಚಿನ್ನದ ಪದಕ ಪಡೆದರು.
ಕಪೂರ್ ಫೈನಲ್ನಲ್ಲಿ 36 ಅಂಕಪಡೆದು ಚಿನ್ನಕ್ಕೆ ಮುತ್ತಿಕ್ಕಿದರೆ, ಫ್ರಾನ್ಸ್ನ ಕೆಮಿಲ್ ಜೆಡ್ರೆಜ್ಜೆವ್ಸ್ಕಿ (33) ಮತ್ತು 19 ವರ್ಷದ ಒಲಿಂಪಿಯನ್ ಮನು ಭಾಕರ್(31) ಕಂಚಿನ ಪದಕ ಪಡೆದರು. ಭಾರತದ ಮತ್ತೊಬ್ಬ ಶೂಟರ್ ರಿದಮ್ ಸಂಗ್ವಾನ್ 4ನೇ ಸ್ಥಾನ ಪಡೆದರು. ಭಾರತ 8 ಚಿನ್ನ, 6 ಬೆಳ್ಳಿ ಮತ್ತು 3 ಕಂಚಿನ ಪದಕ ಸೇರಿದಂತೆ ಒಟ್ಟು 17 ಪದಕ ಪಡೆದು ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿದೆ.
ಇದನ್ನು ಓದಿ:ಪ್ರೋ ಕಬಡ್ಡಿ ಸೀಸನ್-8: ಬೆಂಗಳೂರಲ್ಲಿ ಪಂದ್ಯಾವಳಿ ಆಯೋಜನೆ; ಆದ್ರೆ, ವೀಕ್ಷಕರಿಗೆ ನಿರಾಸೆ
