ನವದೆಹಲಿ : ಭಾರತ ಟೋಕಿಯೊ ಒಲಿಂಪಿಕ್ಸ್ನಲ್ಲಿ 7 ಪದಕ ಗೆಲ್ಲುವ ಮೂಲಕ ದಾಖಲೆ ಬರೆದಿತ್ತು. ಇದೀಗ ಮಂಗಳವಾರದಿಂದ ಪ್ಯಾರಾಲಿಂಪಿಕ್ಸ್ ಆರಂಭವಾಗುತ್ತಿದೆ. 50ಕ್ಕೂ ಹೆಚ್ಚು ಕ್ರೀಡಾಪಟುಗಳು ಈ ಬಾರಿ ಸ್ಪರ್ಧಿಸುತ್ತಿದ್ದು, ಇವರೂ ಕೂಡ ಈ ಹಿಂದಿನ ದಾಖಲೆ ಮುರಿಯುವ ಉತ್ಸಾಹದಲ್ಲಿದ್ದಾರೆ.
ಭಾರತ 1968ರಲ್ಲಿ ಪ್ಯಾರಾಲಿಂಪಿಕ್ಸ್ಗೆ ಪದಾರ್ಪಣೆ ಮಾಡಿದ್ದಾಗಿನಿಂದ ಒಟ್ಟು 12 ಮೆಡಲ್ ಗೆದ್ದಿದೆ. ಇದರಲ್ಲಿ ತಲಾ 4 ಚಿನ್ನ, ಬೆಳ್ಳಿ ಮತ್ತು ಕಂಚಿನ ಪದಕ ಸೇರಿವೆ. ಪದಕ ಗೆದ್ದ ಪ್ರಮುಖ ಕ್ರೀಡಾಪಟುಗಳ ವಿವಿರ ಇಲ್ಲಿದೆ.
1972ರ ಹೀಡೆಲ್ಬರ್ಗ್
ಮುರಳೀಕಾಂತ್ ಪೇಟ್ಕರ್-ಚಿನ್ನ
ಮುರಳೀಕಾಂತ್ ಪೇಟ್ಕರ್ ಪ್ಯಾರಾಲಿಂಪಿಕ್ಸ್ನಲ್ಲಿ ಭಾರತಕ್ಕೆ ಮೊದಲ ಪದಕ ತಂದುಕೊಟ್ಟ ಅಥ್ಲೀಟ್ ಆಗಿದ್ದಾರೆ. ಅವರು 1972ರ ಹೀಡೆಲ್ಬರ್ಗ್ ಕ್ರೀಡಾಕೂಟದಲ್ಲಿ 50 ಮೀಟರ್ ಫ್ರಿಸ್ಟೈಲ್ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದಿದ್ದರು. ಅವರು ವಿಶ್ವದಾಖಲೆಯ 37.33 ಸೆಕೆಂಡ್ಗಳಲ್ಲಿ ಗುರಿ ತಲಿಪಿದ್ದರು.
ಭಾರತೀಯ ಸೈನ್ಯದಲ್ಲಿದ್ದ ಪೇಟ್ಕರ್ ಮೂಲತಃ ಬಾಕ್ಸರ್ ಆಗಿದ್ದರು. 1965ರ ಇಂಟೋ-ಪಾಕ್ ಯುದ್ದದಲ್ಲಿ ಒಂದು ಕೈ ಕಳೆದುಕೊಂಡಿದ್ದರಿಂದ ಸ್ವಿಮ್ಮಿಂಗ್ ಕಡೆಗೆ ತಮ್ಮ ಕ್ರೀಡೆಯನ್ನು ಬದಲಾಯಿಸಿಕೊಂಡಿದ್ದರು.
1984ರ ನ್ಯೂಯಾರ್ಕ್ (ಯುಎಸ್) ಮತ್ತು ಸ್ಟೋಕ್ ಮ್ಯಾಂಡೆವಿಲ್ಲೆ (ಯುಕೆ)
ಜೋಗಿಂದರ್ ಸಿಂಗ್ ಬೇಡಿ ಒಂದು ಬೆಳ್ಳಿ ಮತ್ತು 2 ಕಂಚಿನ ಪದಕ
ಬೇಡಿ 1984ರ ಪ್ಯಾರಾಲಿಂಪಿಕ್ಸ್ನಲ್ಲಿ ಒಟ್ಟು ಮೂರು ಪದಕ ಪಡೆಯುವ ಮೂಲಕ ಅತಿ ಹೆಚ್ಚು ಪದಕ ಗೆದ್ದಿರುವ ಭಾರತೀಯ ಪ್ಯಾರಾ ಕ್ರೀಡಾಪಟು ಎಂಬ ದಾಖಲೆಗೆ ಪಾತ್ರರಾಗಿದ್ದಾರೆ. ಅವರು ಶಾಟ್ಪುಟ್ನಲ್ಲಿ ಬೆಳ್ಳಿ, ಡಿಸ್ಕಸ್ ಥ್ರೋ ಮತ್ತು ಜಾವಲಿನ್ ಥ್ರೋನಲ್ಲಿ ಕಂಚಿನ ಪದಕ ಪಡೆದಿದ್ದರು.
ಭೀಮರಾವ್ ಕೇಸರ್ಕರ್, ಬೆಳ್ಳಿ
1984ರ ನ್ಯೂಯಾರ್ಕ್ (ಯುಎಸ್) ಮತ್ತು ಸ್ಟೋಕ್ ಮ್ಯಾಂಡೆವಿಲ್ಲೆ (ಯುಕೆ) ಆಶ್ರಯದಲ್ಲಿ ನಡೆದಿದ್ದ ಪ್ಯಾರಾಲಿಂಪಿಕ್ಸ್ನಲ್ಲಿ ಕೇಸರ್ಕರ್ ಜಾವಲಿನ್ ಥ್ರೋನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದರು.
2004 ಅಥೆನ್ಸ್ ಪ್ಯಾರಾಲಿಂಪಿಕ್ಸ್
ದೇವೇಂದ್ರ ಜಜಾರಿಯಾ, ಚಿನ್ನ
ಅಥೆನ್ಸ್ ಕ್ರೀಡಾಕೂಟದಲ್ಲಿ ಜಾವಲಿನ್ ಥ್ರೋದಲ್ಲಿ ಚಿನ್ನದ ಪದಕ ಗೆಲ್ಲುವ ಮೂಲಕ ಜಜಾರಿಯಾ 20 ವರ್ಷಗಳ ಪದಕದ ಬರ ನೀಗಿಸಿದ್ದರು. ಅವರು 62.15 ಮೀಟರ್ ಎಸೆಯುವ ಮೂಲಕ ವಿಶ್ವದಾಖಲೆ ಬರೆದಿದ್ದರು. ದೇವೇಂದ್ರ ಈ ಬಾರಿ ಟೋಕಿಯೊದಲ್ಲೂ ಕಣಕ್ಕಿಳಿಯುತ್ತಿದ್ದಾರೆ.
ರಾಜೀಂದರ್ ಸಿಂಗ್ ರಹೇಲು : ಕಂಚು
ಪಂಜಾಬ್ನ ಜಲಂದರ್ ಜಿಲ್ಲೆಯಲ್ಲಿ ಮೆಹ್ಶಾಪುರ್ ಎಂಬ ಹಳ್ಳಿಯಲ್ಲಿ ಜನಿಸಿದ್ದ ರಹೇಲು, ಕೇವಲ 8 ತಿಂಗಳ ಮಗುವಿದ್ದಾಗಲೇ ಪೋಲಿಯೋಗೆ ತುತ್ತಾಗಿದ್ದರು. ಅವರು 56 ಕೆಜಿ ಪವರ್ಲಿಫ್ಟಿಂಗ್ನಲ್ಲಿ 147.5 ಕೆಜಿ ಭಾರ ಎತ್ತುವ ಮೂಲಕ ಕಂಚಿನ ಪದಕ ಪಡೆದಿದ್ದರು.
2012ರ ಲಂಡನ್ ಪ್ಯಾರಾಲಿಂಪಿಕ್ಸ್
ಗಿರೀಶ್ ನಾಗರಾಜೇಗೌಡ, ಬೆಳ್ಳಿ
ಲಂಡನ್ ಪ್ಯಾರಾಲಿಂಪಿಕ್ಸ್ನಲ್ಲಿ ಕರ್ನಾಟಕದ ಗಿರೀಶ್ ಏಕೈಕ ಭಾರತೀಯನಾಗಿ ಪದಕ ಗೆದ್ದಿದ್ದರು. ಅವರು ಹೈಜಂಪ್ನಲ್ಲಿ 1.74 ಮೀಟರ್ ಎತ್ತರ ಜಿಗಿದು ಬೆಳ್ಳಿ ಪದಕ ಪಡೆದಿದ್ದರು. ಇವರು ಈ ಸ್ಪರ್ಧೆಯಲ್ಲಿ ಪದಕ ಗೆದ್ದ ಭಾರತದ ಮೊದಲ ಕ್ರೀಡಾಪಟುವಾಗಿದ್ದರು.
2016ರ ರಿಯೋ ಪ್ಯಾರಾಲಿಂಪಿಕ್ಸ್
ದೇವೇಂದ್ರ ಜಜಾರಿಯಾ, ಚಿನ್ನ
2004ರಲ್ಲಿ ಜಾವಲಿನ್ನಲ್ಲಿ ಚಿನ್ನ ಗೆದ್ದಿದ್ದ ಜಜಾರಿಯಾ ಮತ್ತೆ 12 ವರ್ಷಗಳ ಬಳಿಕ ರಿಯೋದಲ್ಲೂ 2ನೇ ಚಿನ್ನದ ಪದಕ ಪಡೆದರು. ದಾಖಲೆಯ 63.97 ಮೀಟರ್ ಎಸೆದು ಪ್ಯಾರಾಲಿಂಪಿಕ್ಸ್ನಲ್ಲಿ 2 ಚಿನ್ನ ಗೆದ್ದ ಭಾರತದ ಮೊದಲ ಕ್ರೀಡಾಪಟು ಎನಿಸಿದ್ದರು.
ಮರಿಯಪ್ಪನ್ ತಂಗವೇಲು, ಚಿನ್ನ
ತಂಗವೇಲು ಹೈಜಂಪ್ ಸ್ಪರ್ಧೆಯಲ್ಲಿ 1.89 ಮೀಟರ್ ಜಿಗಿದು ಚಿನ್ನದ ಪದಕ ಪಡೆದಿದ್ದರು. ಈ ಮೂಲಕ ದೇಶಕ್ಕೆ ಚಿನ್ನದ ಪದಕ ತಂದುಕೊಟ್ಟ 3ನೇ ಕ್ರೀಡಾಪಟು ಎನಿಸಿದ್ದರು. ತಂಗವೇಲು 5 ವರ್ಷದವನಾಗಿದ್ದಾಗ ಬಲಗಾಲಿನ ಮೇಲೆ ಬಸ್ ಚಕ್ರ ಹರಿದು ಕಾಲು ಕಳೆದುಕೊಂಡಿದ್ದರು. ಇವರು ಟೋಕಿಯೊ ಗೇಮ್ಸ್ನಲ್ಲೂ ಸ್ಪರ್ಧಿಸುತ್ತಿದ್ದ ಮತ್ತೊಂದು ಪದಕದ ಮೇಲೆ ಕಣ್ಣಟ್ಟಿದ್ದಾರೆ.
ದೀಪಾ ಮಲಿಕ್, ಬೆಳ್ಳಿ
ದೀಪಾ ಮಲಿಕ್ ಶಾಟ್ಪುಟ್ನಲ್ಲಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ಪ್ಯಾರಾಲಿಂಪಿಕ್ಸ್ನಲ್ಲಿ ಪದಕ ಗೆದ್ದ ಭಾರತದ ಮೊದಲ ಮಹಿಳಾ ಕ್ರೀಡಾಪಟು ಎಂಬ ದಾಖಲೆಗೆ ಪಾತ್ರರಾಗಿದ್ದಾರೆ. ಅವರು ರಿಯೋದಲ್ಲಿ 4.61 ಮೀಟರ್ ಎಸೆದು ಬೆಳ್ಳಿ ಪದಕ ಪಡೆದಿದ್ದರು.
ವರುಣ್ ಸಿಂಗ್ ಭಾಟಿ, ಕಂಚು
ಹೈಜಂಪ್ನಲ್ಲಿ ತಂಗವೇಲು ಚಿನ್ನದ ಪದಕ ಪಡೆದರೆ, ವರುಣ್ ಸಿಂಗ್ ಮೂರನೇ ಸ್ಥಾನ ಪಡೆದು ಕಂಚಿನ ಪದಕ ಪಡೆದಿದ್ದರು.
