ದೋಹಾ(ಕತಾರ್): ಇರಾನ್ ವಿರುದ್ಧ 6-2 ಗೋಲುಗಳ ಅಂತರದಲ್ಲಿ ಗೆದ್ದು ಬೀಗಿದ ಇಂಗ್ಲೆಂಡ್ ತಂಡ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಶುಭಾರಂಭ ಮಾಡಿತು. ಇಂಗ್ಲಿಷರ ಗೆಲುವಿಗೆ ಬುಕಾಯೊ ಸಾಕಾ ಮತ್ತು ಮಾರ್ಕಸ್ ರಾಶ್‌ಫೋರ್ಡ್ ಮಿಂಚಿನ ಆಟ ನೆರವಾಯಿತು. ಮೊದಲ ಪಂದ್ಯದಲ್ಲೇ ಎದುರಾದ ಪ್ರಬಲ ದಾಳಿ ಹಿಮ್ಮೆಟ್ಟಿಸುವಲ್ಲಿ ಇರಾನ್ ವಿಫಲವಾಗಿ ಸೋತು ನಿರಾಶೆ ಅನುಭವಿಸಿತು.
ಇಂಗ್ಲೆಂಡ್ ಪರ ಜೂಡ್ ಬೆಲ್ಲಿಂಗ್ಹ್ಯಾಮ್ ಪಂದ್ಯದ 35ನೇ ನಿಮಿಷದಲ್ಲಿ ಮೊದಲ ಗೋಲ್ಗಳಿಸಿ ಖಾತೆ ತೆರೆದರು. ಸಾಕಾ 43 ನೇ ನಿಮಿಷದಲ್ಲಿ ಮತ್ತೊಂದು ಗೋಲ್ ಹೊಡೆದು ಅಭಿಮಾನಿಗಳನ್ನು ಹುಚ್ಚೆಬ್ಬಿಸಿದರು. ಇದಾದ ಬಳಿಕ ರಹೀಮ್ ಸ್ಟರ್ಲಿಂಗ್ ಮತ್ತೊಂದು ಗೋಲ್ ಗಳಿಸಿ 3-0 ರಲ್ಲಿ ಆಂಗ್ಲರಿಗೆ ಮೇಲುಗೈ ತಂದುಕೊಟ್ಟರು.
ಇನ್ನು ಪಂದ್ಯದ ದ್ವಿತೀಯಾರ್ಧದಲ್ಲಿ ಇಂಗ್ಲೆಂಡ್ ತಂಡವು ಇರಾನ್ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿತು. ಹಲವು ಬಾರಿ ಗೋಲ್ ಹೊಡೆಯಲು ವಿಫಲವಾಗಿಯೂ 62 ನೇ ನಿಮಿಷದಲ್ಲಿ ಸಾಕಾ 2ನೇ ಗೋಲ್ ಗಳಿಸಿದರು. ಇದರಿಂದ ಇರಾನ್ ಮತ್ತಷ್ಟು ಒತ್ತಡಕ್ಕೆ ಸಿಲುಕಿತು. ಕೊನೆಯ 71ನೇ ನಿಮಿಷ, 89 ನೇ ನಿಮಿಷದಲ್ಲಿ ರಾಶ್‌ಫೋರ್ಡ್ ಮತ್ತು ಜಾಕ್ ಗ್ರೀಲಿಶ್ ತಲಾ ಒಂದೊಂದು ಗೋಲ್‌ಗಳ ಮೂಲಕ ಇಂಗ್ಲೆಂಡ್ 6 ಗೋಲು ಗಳಿಸಲು ಸಹಕರಿಸಿದರು. ಇದರೊಂದಿಗೆ ಇಂಗ್ಲೆಂಡ್ಗೆ ಪ್ರಚಂಡ ಗೆಲುವು ಖಚಿತವಾಯಿತು.
ಇರಾನ್ ಪರ ಮಹ್ದಿ ತೆರಮಿ 65ನೇ ನಿಮಿಷದಲ್ಲಿ ಮತ್ತು 90 ನೇ ನಿಮಿಷದಲ್ಲಿ 2 ಗೋಲ್ ಗಳಿಸಿ ಸೋಲಿನ ಅಂತರ ಕಡಿಮೆ ಮಾಡಲು ಸಹಕರಿಸಿದರು. ತೆರಮಿ ಹೊರತುಪಡಿಸಿ ತಂಡದ ಯಾರೊಬ್ಬ ಆಟಗಾರನೂ ಒಂದು ಗೋಲ್ ಕೂಡಾ ಗಳಿಸಲಿಲ್ಲ.
ಇದನ್ನೂ ಓದಿ: ಫಿಫಾ ವಿಶ್ವಕಪ್: ನಾಯಕನ ಮಿಂಚಿನಾಟ, ಆತಿಥೇಯ ಕತಾರ್ ಸೋಲಿಸಿ ಇತಿಹಾಸ ಬರೆದ ಈಕ್ವೆಡಾರ್
