ನವದೆಹಲಿ: ಮೂರನೇ ವ್ಯಕ್ತಿಗಳ ಹಸ್ತಕ್ಷೇಪದ ಕಾರಣ ನೀಡಿ ಅಖಿಲ ಭಾರತ ಫುಟ್ಬಾಲ್ ಫೆಡರೇಷನ್ ಅನ್ನು ನಿಷೇಧಿಸಿದ್ದ ವಿಶ್ವ ಫುಟ್ಬಾಲ್ ಆಡಳಿತ ಮಂಡಳಿ ಅಮಾನತನ್ನು ಶುಕ್ರವಾರ ಹಿಂಪಡೆದಿದೆ. ಇದರಿಂದ ಇಲ್ಲಿಯೇ ನಡೆಯಲಿರುವ 17 ವರ್ಷದೊಳಗಿನ ಮಹಿಳಾ ವಿಶ್ವಕಪ್ಗೆ ಜೀವ ಬಂದಿದೆ.
ಎಐಎಫ್ಎಫ್ ಆಡಳಿಗಾರರ ಸಮಿತಿಯನ್ನು(ಸಿಒಎ) ರದ್ದು ಮಾಡುವ ಸುಪ್ರೀಂಕೋರ್ಟ್ ತೀರ್ಮಾನದ ಬೆನ್ನಲ್ಲೇ ಫಿಫಾ ನಿಷೇಧ ವಾಪಸ್ ಪಡೆದಿದೆ. ಇದು ಭಾರತೀಯ ಫುಟ್ಬಾಲ್ ಲೋಕಕ್ಕೆ ಸಂತಸ ತಂದಿದೆ.
ಭಾರತೀಯ ಫುಟ್ಬಾಲ್ ಕ್ಷೇತ್ರದಲ್ಲಿ ಮೂರನೇ ವ್ಯಕ್ತಿಗಳ ಹಸ್ತಕ್ಷೇಪ ನಡೆಯುತ್ತಿದೆ ಎಂದು ಹೇಳಿ ಆ.15 ರಂದು ಭಾರತೀಯ ಫುಟ್ಬಾಲ್ ಸಂಸ್ಥೆಯನ್ನು ಫಿಫಾ ನಿಷೇಧಿಸಿತ್ತು. ಇದರಿಂದ ಅಕ್ಟೋಬರ್ನಲ್ಲಿ ಭಾರತದಲ್ಲೇ ನಡೆಯುವ 17 ವರ್ಷದೊಳಗಿನ ಮಹಿಳಾ ವಿಶ್ವಕಪ್ ರದ್ದಾಗುವ ಸಾಧ್ಯತೆ ಇತ್ತು. ಆದರೀಗ ನಿರ್ಧಾರ ವಾಪಸ್ ಕಾರಣ ನಿಗದಿಯಂತೆ ಅಕ್ಟೋಬರ್ 11 ರಿಂದ 30 ರವರೆಗೆ ವಿಶ್ವಕಪ್ ನಡೆಯಲಿದೆ ಎಂದು ಫಿಫಾ ತಿಳಿಸಿದೆ.
ಎಐಎಫ್ಎಫ್ನ ದೈನಂದಿನ ಚಟುವಟಿಕೆಗಳ ಮೇಲೆ ನಿಗಾ ವಹಿಸಲಾಗುವುದು. ಚುನಾವಣೆ ನಿಗದಿಯಂತೆ ನಡೆಯಲು ಸಹಕರಿಸಲಾಗುವುದು. ಈ ಬಗ್ಗೆ ಫಿಫಾಗೆ ವರದಿ ನೀಡಬೇಕು ಎಂದು ಅದು ಸೂಚಿಸಿದೆ.
ಇನ್ನು ಫಿಫಾದ ನಿರ್ಧಾರವನ್ನು ಭಾರತದ ಫುಟ್ಬಾಲ್ ಸಂಸ್ಥೆ ಸ್ವಾಗತಿಸಿದೆ. ಎಐಎಫ್ಎಫ್ ಮೇಲಿನ ನಿರ್ಬಂಧ ವಾಪಸ್ ಪಡೆದಿದ್ದಕ್ಕೆ ಸಂಸ್ಥೆಯ ಹಂಗಾಮಿ ಪ್ರಧಾನ ಕಾರ್ಯದರ್ಶಿ ಸುನಂದೋ ಧರ್ ಸಂತಸ ವ್ಯಕ್ತಪಡಿಸಿದರು.
ಓದಿ: ಡೈಮಂಡ್ ಲೀಗ್ ಗೆದ್ದು ಇತಿಹಾಸ ನಿರ್ಮಿಸಿದ ಭರ್ಜಿ ದೊರೆ ನೀರಜ್ ಚೋಪ್ರಾ
