ಅಡಿಲೇಡ್(ಆಸ್ಟ್ರೇಲಿಯಾ) : ಟೋಕಿಯೋ ಒಲಿಂಪಿಕ್ಸ್‌ ಕ್ರೀಡಾಕೂಟಕ್ಕೂ ಮುನ್ನ ನಡೆದ ಟ್ರಯಲ್ಸ್‌ನಲ್ಲಿ ಆಸ್ಟ್ರೇಲಿಯಾ ಈಜುಗಾರ್ತಿಯೊಬ್ಬಳು ಬ್ಯಾಕ್‌ ಸ್ಟ್ರೋಕ್‌ನಲ್ಲಿ ವಿಶ್ವದಾಖಲೆ ನಿರ್ಮಿಸಿದ್ದಾಳೆ. ದಕ್ಷಿಣ ಆಸ್ಟ್ರೇಲಿಯಾದ ಆಕ್ವಾಟಿಕ್ ಕೇಂದ್ರದಲ್ಲಿ ನಡೆದ ಸ್ಪರ್ಧೆಯಲ್ಲಿ 19 ವರ್ಷದ ಮೆಕಾನ್ 100 ಮೀಟರ್ ದೂರವನ್ನು 57.45 ಸೆಕೆಂಡುಗಳಲ್ಲಿ ಕ್ರಮಿಸಿದರು. ಈ ಹಿಂದೆ ಅಮೆರಿಕದ ಈಜುಗಾರ ರೆಗಾನ್ ಸ್ಮಿತ್‌ ಇದೇ ಗುರಿಯನ್ನು 2019ರಲ್ಲಿ 57.57 ಸೆಕೆಂಡುಗಳಲ್ಲಿ ತಲುಪಿದ್ದರು.
ತನ್ನ ಸಾಧನೆಯ ಬಗ್ಗೆ ಮಾತನಾಡಿದ ಮೆಕಾನ್, ಹತ್ತು ತಿಂಗಳ ಹಿಂದೆ ನನ್ನ ತಂದೆ ಕೋವಿಡ್‌ನಿಂದ ಪ್ರಾಣ ಕಳೆದುಕೊಂಡರು. ಅವರು ನನಗೆ ನೀಡಿದ ಪ್ರೇರಣೆಯೇ ಈ ಸಾಧನೆಗೆ ಮೂಲ ಕಾರಣವಾಯ್ತು. ಇದಾದ ಬಳಿಕ ಸಾಧನೆಯ ತುಡಿತ ನನ್ನನ್ನು ಈ ಹಂತಕ್ಕೆ ತಲುಪಿಸಿತು. ಪ್ರತಿದಿನ ಬೆಳಗಾಗುತ್ತಲೇ ಸಾಧನೆಯ ಹಸಿವು, ನನ್ನೊಳಗಿನ ಸ್ವಯಂಪ್ರೇರಣೆ ಹಾಗೂ ಕಠಿಣ ಪರಿಶ್ರಮವೇ ಇದಕ್ಕೆಲ್ಲ ಕಾರಣ ಎಂದು ಭಾವುಕರಾದರು.
ಮೆಕಾನ್ ಕಳೆದ ತಿಂಗಳು ಕಾಮನ್‌ವೆಲ್ತ್‌ ಮತ್ತು ಆಸ್ಟ್ರೇಲಿಯಾ ಆಟಗಾರ್ತಿಯಾಗಿ 100 ಮೀಟರ್ ಬ್ಯಾಕ್‌ ಸ್ಟ್ರೋಕ್ ವಿಭಾಗವನ್ನು 57.63 ಸೆಕೆಂಡುಗಳಲ್ಲಿ ಕ್ರಮಿಸಿ ದಾಖಲೆಯ ಸಾಧನೆ ಮಾಡಿದ್ದರು. ಭಾನುವಾರ ನಡೆದ ವಿಶ್ವದಾಖಲೆಗೂ ಮುನ್ನ ಆಕೆಯ ಕೋಚ್‌ ಮಾತನಾಡುತ್ತಾ, ಆಕೆಯ ಮುಂದಿನ ಗುರಿ ಹೊಸ ವಿಶ್ವದಾಖಲೆ ಎಂಬ ಸುಳಿವು ನೀಡಿದ್ದರು.
ಮೆಕಾನ್‌ಳ ಈ ಸಾಧನೆ ಮುಂದಿನ ತಿಂಗಳು ಜಪಾನ್‌ನಲ್ಲಿ ನಡೆಯುವ ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಅಮೆರಿಕ ಸ್ಪರ್ಧಿಯೊಂದಿಗೆ ತುರುಸಿನ ಪೈಪೋಟಿ ನೀಡುವ ಸೂಚನೆ ಕೊಟ್ಟಿದೆ. ಈ ಬಗ್ಗೆ ಮಾತನಾಡಿದ ಮೆಕಾನ್, ಮುಂದಿನ ಐದಾರು ವಾರಗಳಲ್ಲಿ ಏನು ಬೇಕಾದರೂ ನಡೆಯಬಹುದು. ಅದನ್ನು ಈಗಲೇ ಊಹಿಸಲು ಸಾಧ್ಯವಿಲ್ಲ ಎಂದರು.
