ನವದೆಹಲಿ: ಜೋರ್ಡಾನ್‌ನ ಅಮ್ಮನ್‌ನಲ್ಲಿ ನಡೆಯುತ್ತಿರುವ ಏಷ್ಯನ್ ಬಾಕ್ಸಿಂಗ್ ಚಾಂಪಿಯನ್‌ಶಿಪ್ನಲ್ಲಿ ಭಾರತೀಯ ಬಾಕ್ಸರ್ಗಳಾದ ಮಿನಾಕ್ಷಿ ಮತ್ತು ಪ್ರೀತಿ ಸೆಮಿಫೈನಲ್ ಪ್ರವೇಶಿಸಿದ್ದು, ಎರಡು ಬೆಳ್ಳಿ ಪದಕಗಳನ್ನು ಖಚಿತ ಪಡಿಸಿದ್ದಾರೆ.
ಮಹಿಳೆಯರ 52 ಕೆಜಿ ವಿಭಾಗದ ಬಾಕ್ಸಿಂಗ್ನಲ್ಲಿ ಮಿನಾಕ್ಷಿ ಕ್ವಾರ್ಟರ್ ಫೈನಲ್‌ನಲ್ಲಿ ನಾಲ್ಕು ಬಾರಿ ಆಗ್ನೇಯ ಏಷ್ಯನ್ ಗೇಮ್ಸ್ ಪದಕ ವಿಜೇತೆ ಫಿಲಿಪ್ಪೀನ್ಸ್‌ನ ಐರಿಶ್ ಮ್ಯಾಗ್ನೊ ಅವರನ್ನು 4-1ರಿಂದ ಸೋಲಿಸಿದರು. ಇತ್ತ, ಪ್ರೀತಿ ಕೂಡ 57 ಕೆಜಿ ವಿಭಾಗದಲ್ಲಿ ಉಜ್ಬೇಕಿಸ್ತಾನ್‌ನ ತುರ್ಡಿಬೆಕೋವಾ ಸಿಟೋರಾ ವಿರುದ್ಧ 5-0ರಿಂದ ಗೆದ್ದು, ಸೆಮಿಫೈನಲ್ಗೆ ಲಗ್ಗೆ ಇಟ್ಟರು.
ನವೆಂಬರ್ 9ರಂದು ನಡೆಯಲಿರುವ ಸೆಮಿಫೈನಲ್‌ನಲ್ಲಿ ಮಿನಾಕ್ಷಿ ಅವರು ಮಂಗೋಲಿಯಾದ ಲುಟ್ಸಾಯಿಖಾನ್ ಅಲ್ಟಾನ್ಸೆಟ್ಸೆಗ್ ಅವರನ್ನು ಹಾಗೂ ಪ್ರೀತಿ ಜಪಾನ್‌ನ ಐರಿ ಸೇನಾ ಅವರನ್ನು ಎದುರಿಸಲಿದ್ದಾರೆ ಎಂದು ಬಾಕ್ಸಿಂಗ್ ಫೆಡರೇಶನ್ ಆಫ್ ಇಂಡಿಯಾ (ಬಿಎಫ್‌ಐ) ತಿಳಿಸಿದೆ.
ಇದನ್ನೂ ಓದಿ: ಟಿ 20 ವಿಶ್ವಕಪ್: ನ್ಯೂಜಿಲ್ಯಾಂಡ್, ಇಂಗ್ಲೆಂಡ್ ವಿರುದ್ಧ ಸೆಣಸೋರ್ಯಾರು?
