ಚಾಂಪಿಯನ್ಸ್​ ಟ್ರೋಫಿ: ಕಿವೀಸ್​ ವಿರುದ್ಧ ಪಾಕ್​ಗೆ ಹೀನಾಯ ಸೋಲು​

ICC Champions Trophy: ಐಸಿಸಿ ಚಾಂಪಿಯನ್ಸ್​ ಟ್ರೋಫಿಯ ಮೊದಲ ಪಂದ್ಯದಲ್ಲಿಂದು ನ್ಯೂಜಿಲೆಂಡ್​ ವಿರುದ್ಧ ಪಾಕಿಸ್ತಾನ ಹೀನಾಯವಾಗಿ ಸೋಲನುಭವಿಸಿದೆ.

PAK vs NZ: ಚಾಂಪಿಯನ್ಸ್​ ಟ್ರೋಫಿಯ ಮೊದಲ ಪಂದ್ಯದಲ್ಲಿ ನ್ಯೂಜಿಲೆಂಡ್​ ವಿರುದ್ಧ ಪಾಕಿಸ್ತಾನ ಹೀನಾಯವಾಗಿ ಸೋಲು ಕಂಡಿದೆ. ಕರಾಚಿಯ ನ್ಯಾಷನಲ್​ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಪಾಕ್​ 60 ರನ್​ಗಳಿಂದ ಸೋಲನುಭವಿಸಿತು.

ನ್ಯೂಜಿಲೆಂಡ್​ ನೀಡಿದ್ದ 320 ರನ್​ಗಳ ಗುರಿ ಬೆನ್ನತ್ತಿದ್ದ ಪಾಕ್​ ಮೊದಲಿನಿಂದಲೇ ವಿಕೆಟ್​​ಗಳನ್ನು ಕೈಚೆಲ್ಲುತ್ತಾ ಬಂತು. 69 ರನ್​ಗಳಲ್ಲಿ ಅಗ್ರ 3 ವಿಕೆಟ್​ ಕಳೆದುಕೊಂಡಿತು. ಆರಂಭಿಕ ಬ್ಯಾಟರ್​ ಸೌದ್​ ಶಕೀಲ್​ (6), ಮೊಹಮ್ಮದ್​ ರಿಜ್ವಾನ್ (3), ಫಕರ್​ ಜಮಾನ್​ (24) ಬಹುಬೇಗ ತಮ್ಮ ಇನ್ನಿಂಗ್ಸ್​ ಮುಗಿಸಿ ಕ್ರೀಸ್​ ತೊರೆದರು.

Clinical New Zealand down Pakistan in #ChampionsTrophy 2025 opener 👏#PAKvNZ 📝: https://t.co/E5MS83KLLA pic.twitter.com/JpcqY5664Q

— ICC (@ICC) February 19, 2025

ಆದರೆ, ಬಾಬರ್​ ಅಜಾಮ್​ ನಿಧಾನಗತಿಯ ಬ್ಯಾಟಿಂಗ್​ ಮೂಲಕ 64 ರನ್​ ಕಲೆಹಾಕಿ ಔಟಾದರು. ಈ ವೇಳೆಗಾಗಲೇ ತಂಡ ಒತ್ತಡಕ್ಕೆ ಸಿಲುಕಿತ್ತು. ಬಳಿಕ ಬಂದ ಅಘಾ ಸಲ್ಮಾನ್​ (42) ಕೊನೆಯಲ್ಲಿ ಖುಷ್​ದಿಲ್​ (69) ಹೋರಾಡಿದರೂ ತಂಡಕ್ಕೆ ಗೆಲುವು ದಕ್ಕಲಿಲ್ಲ. ಅಂತಿಮವಾಗಿ ತನ್ನೆಲ್ಲ ವಿಕೆಟ್​ ಕಳೆದುಕೊಂಡು ಕಿವೀಸ್​ಗೆ ಶರಣಾಯಿತು.

ನ್ಯೂಜಿಲೆಂಡ್​ ಪರ ಮಿಚೆಲ್​ ಸ್ಯಾಂಟ್ನರ್​, ಓ ರೂರ್ಕಿ ತಲಾ 3 ವಿಕೆಟ್​ ಪಡೆದರೆ, ಮ್ಯಾಟ್​ ಹೆನ್ರಿ 2, ಬ್ರೇಸ್​ವೆಲ್​, ನಥನ್​ ಸ್ಮಿತ್​ ತಲಾ ಒಂದು ವಿಕೆಟ್​ ಉರುಳಿಸಿದರು.

ಕಿವೀಸ್​ ಭರ್ಜರಿ ಬ್ಯಾಟಿಂಗ್​: ಇದಕ್ಕೂ ಮೊದಲು ಟಾಸ್​ ಸೋತು ಬ್ಯಾಟ್​ ಮಾಡಿದ್ದ ಕಿವೀಸ್​ ಪಡೆ 320 ರನ್​ಗಳ ಬೃಹತ್​ ಮೊತ್ತವನ್ನು ಕಲೆಹಾಕಿತು. ಆರಂಭದಲ್ಲಿ ಸಂಕಷ್ಟಕ್ಕೆ ಸಿಲುಕಿದ್ದರೂ ಬಳಿಕ ಚೇತರಿಸಿಕೊಂಡ ನ್ಯೂಜಿಲೆಂಡ್​ ಉತ್ತಮ ಸ್ಕೋರ್​ ಗಳಿಸಿತು. ಆರಂಭದಲ್ಲಿ 73 ರನ್​ಗಳಿಗೆ 3 ವಿಕೆಟ್​ ಕಳೆದುಕೊಂಡಿತ್ತು. ಓಪನರ್​ ಕಾನ್ವೆ (10), ಕೇನ್​ ವಿಲಿಯಮ್ಸನ್​ (1), ಡ್ಯಾರಿಲ್​ ಮಿಚೆಲ್​ (10) ವಿಕೆಟ್​ ಬೀಳುತ್ತಿದ್ದಂತೆ ತಂಡ ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿ ಎದುರಾಗಿತ್ತು.

ಆದರೆ ಆರಂಭಿಕ ಬ್ಯಾಟರ್​ ವಿಲ್​ ಯಂಗ್​ (107), ಟಾಮ್​ ಲ್ಯಾಥಮ್​ (118) ಸಮಯೋಚಿತ ಬ್ಯಾಟಿಂಗ್​ ಮೂಲಕ ಶತಕ ಸಿಡಿಸಿದರೇ, ಗ್ಲೆನ್​ ಫಿಲಿಫ್​ (61) ಅರ್ಧಶತಕ ಸಿಡಿಸಿ ತಂಡದ ಸ್ಕೋರ್​ ಬೋರ್ಡ್​ ಬದಲಾಯಿಸುವಲ್ಲಿ ಯಶಸ್ವಿಯಾದರು.

New Zealand win the opening match of ICC Champions Trophy 2025#PAKvNZ | #ChampionsTrophy | #WeHaveWeWill pic.twitter.com/MvD3upTSoZ

— Pakistan Cricket (@TheRealPCB) February 19, 2025

12 ದಿನಗಳಲ್ಲಿ 3 ಬಾರಿ ಸೋಲು: ಪಾಕಿಸ್ತಾನ 12 ದಿನಗಳಲ್ಲಿ ನ್ಯೂಜಿಲೆಂಡ್​ ವಿರುದ್ಧ ಒಟ್ಟು 3 ಬಾರಿ ಸೋಲನುಭವಿಸಿದೆ. ಇದಕ್ಕೂ ಮುನ್ನ ನಡೆದಿದ್ದ ತ್ರಿಕೋನ ಸರಣಿಯಲ್ಲಿ 2 ಪಂದ್ಯಗಳಲ್ಲಿ ಸೋಲನ್ನು ಕಂಡಿದ್ದ ಪಾಕ್​ ಇದೀಗ ಚಾಂಪಿಯನ್ಸ್​ ಟ್ರೋಫಿಯಲ್ಲೂ ಸೋಲು ಕಂಡಿದೆ. ಅಲ್ಲದೇ ಚಾಂಪಿಯನ್ಸ್​ ಟ್ರೋಫಿಯಲ್ಲಿ ಸತತ ನಾಲ್ಕನೇ ಸೋಲಾಗಿದೆ. ಈ ಹಿಂದೆ ನಡೆದಿದ್ದ ಇದೇ ಟೂರ್ನಿಯಲ್ಲಿ ಪಾಕ್​ ಮೂರು ಬಾರಿ ಸೋಲು ಕಂಡಿತ್ತು.

ಇದನ್ನೂ ಓದಿ: ನಾಳೆ ಭಾರತ-ಬಾಂಗ್ಲಾ ಕದನ​​: ಕನ್ನಡಿಗನಿಗೆ ತಂಡದಲ್ಲಿ ಮಹತ್ವದ ಜವಾಬ್ದಾರಿ!