ಮುಂಬೈ: ಹಾಲಿ ಚೆನ್ನೈ ಸೂಪರ್ ಕಿಂಗ್ಸ್ 2022ರ ಐಪಿಎಲ್ನಲ್ಲಿ ಆಡಿರುವ ಎಲ್ಲಾ 4 ಪಂದ್ಯಗಳಲ್ಲೂ ಸೋಲು ಕಂಡು ಹೀನಾಯ ಪ್ರದರ್ಶನ ತೋರಿದೆ. ಪ್ರಸ್ತುತ ಲೀಗ್ನ ಅಂಕಪಟ್ಟಿಯಲ್ಲಿ ಇನ್ನೂ ಖಾತೆಯನ್ನು ತೆರೆಯಲಾಗದೇ ಕೊನೆಯ ಸ್ಥಾನದಲ್ಲಿದೆ. ಶನಿವಾರ ನಡೆದ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಸಿಎಸ್ಕೆ ಸೋಲು ಕಾಣುತ್ತಿದ್ದಂತೆ ಭಾರತ ತಂಡದ ಮಾಜಿ ಕೋಚ್ ರವಿಶಾಸ್ತ್ರಿ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.
'ಸಿಎಸ್ಕೆ, ದಕ್ಷಿಣ ಆಫ್ರಿಕಾ ತಂಡದ ಅನುಭವಿ ಬ್ಯಾಟರ್ ಫಾಫ್ ಡು ಪ್ಲೆಸಿಸ್ರನ್ನು ತಂಡದಿಂದ ಹೊರ ಬಿಟ್ಟು ದೊಡ್ಡ ಪ್ರಮಾದ ಎಸಗಿದೆ. ಜೊತೆಗೆ, ರವೀಂದ್ರ ಜಡೇಜಾ ನಾಯಕತ್ವಕ್ಕಿಂತ ಕ್ರಿಕೆಟ್ನತ್ತ ಹೆಚ್ಚು ಗಮನ ನೀಡಬೇಕಿತ್ತು' ಎಂದರು. 2022ರ ಐಪಿಎಲ್ಗೆ ಕೆಲವೇ ದಿನಗಳಿರುವಾಗ ಎಂ.ಎಸ್.ಧೋನಿ ತಂಡದ ನಾಯಕತ್ವ ತ್ಯಜಿಸಿದ್ದು, ರವೀಂದ್ರ ಜಡೇಜಾ ಆ ಸ್ಥಾನಕ್ಕೆ ಬಡ್ತಿ ಪಡೆದುಕೊಂಡಿದ್ದರು. ಒಂದು ವೇಳೆ ಧೋನಿ ನಾಯಕನಾಗಿ ಮುಂದುವರಿಯಲು ಬಯಸದಿದ್ದರೆ, ಡುಪ್ಲೆಸಿಸ್ ಸಿಎಸ್ಕೆ ತಂಡದ ನಾಯಕನಾಗಬೇಕಿತ್ತು ಎಂದು ಶಾಸ್ತ್ರಿ ಹೇಳಿದ್ದಾರೆ.
'ಜಡೇಜಾರಂತಹ ಆಟಗಾರ ತಮ್ಮ ಕ್ರಿಕೆಟ್ನತ್ತ ಗಮನ ಕೇಂದ್ರೀಕರಿಸಬೇಕೆಂದು ನಾನು ನಂಬುತ್ತೇನೆ. ಚೆನ್ನೈ ತಂಡ ಫಾಫ್ ಡುಪ್ಲೆಸಿಸ್ರನ್ನು ಹೊರ ಹೋಗಲು ಬಿಡಬಾರದಿತ್ತು. ಏಕೆಂದರೆ, ಆತ ಮ್ಯಾಚ್ ವಿನ್ನರ್ ಮತ್ತು ಸಾಕಷ್ಟು ಕ್ರಿಕೆಟ್ ಆಡಿದ್ದರು. ಒಂದು ಧೋನಿ ತಾವು ನಾಯಕತ್ವ ವಹಿಸಿಕೊಳ್ಳುವುದು ಬೇಡ ಎನಿಸಿದ್ದರೆ, ಆಗ ಫಾಫ್ ಸಿಎಸ್ಕೆ ನಾಯಕನಾಗಬೇಕಿತ್ತು. ಜಡೇಜಾ ಆಟಗಾರನಾಗಿ ಆಡಬೇಕಿತ್ತು. ಏಕೆಂದರೆ ಆತ ನಾಯಕತ್ವದ ಹೊರೆಯಿಲ್ಲದೆ, ಮುಕ್ತವಾಗಿ ಆಡುತ್ತಿದ್ದರು ಎಂದು ಇಎಸ್ಪಿಎನ್ಕ್ರಿಕ್ಇನ್ಫೋದ ಟಿ20 ಟೈಮ್ ಔಟ್ನಲ್ಲಿ ತಿಳಿಸಿದರು.
ಈ ಋತುವಿನಲ್ಲಿ ಸಿಎಸ್ಕೆಗೆ ಯಾವುದೂ ಅಂದುಕೊಂಡಂತೆ ನಡೆಯುತ್ತಿಲ್ಲ. ಕಳೆದ ಋತುವಿನಲ್ಲಿ ಆರೆಂಜ್ ಕ್ಯಾಪ್ ಪಡೆದಿದ್ದ ಋತುರಾಜ್ ಗಾಯಕ್ವಾಡ್ ಶೋಚನೀಯವಾಗಿ ಫಾರ್ಮ್‌ ಕಳೆದುಕೊಂಡಿದ್ದಾರೆ. ಇತರ ಆಟಗಾರರು ಕೂಡ ತಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಆಡುವುದಕ್ಕೆ ಹೆಣಗಾಡುತ್ತಿದ್ದಾರೆ.
ಇದನ್ನೂ ಓದಿ: ಮೆಗಾ ಹರಾಜಿಗೂ ಮುಂಬೈ ಇಂಡಿಯನ್ಸ್ಗೂ ಆಗಿಬರಲ್ವಾ? ಹೌದು ಎನ್ನುತ್ತಿವೆ ದಾಖಲೆಗಳು!
