ನವದೆಹಲಿ: ಬ್ಯಾಟಿಂಗ್ ಕಿಂಗ್ ಕೊಹ್ಲಿ ತಮ್ಮ ಟೆಸ್ಟ್ ಬದುಕಿನ 100ನೇ ಪಂದ್ಯಕ್ಕೆ ಸಿದ್ಧರಾಗಿದ್ದಾರೆ. ಅವರ ಈ ಸಾಧನೆಗೆ ಕ್ರೀಡಾಲೋಕ ಬಹುಪರಾಕ್ ಹೇಳಿದೆ. ಅಂತೆಯೇ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಕೂಡ ವಿರಾಟ್ ಕೊಹ್ಲಿಯ ಸಾಧನೆ ಕೊಂಡಾಡಿದ್ದಾರೆ. 'ವಿರಾಟ್ ಸಾಧನೆ ಇಂದಿನ ಯುವ ಪೀಳಿಗೆಗೆ ಮಾದರಿ' ಎಂದು ಬಣ್ಣಿಸಿದ್ದಾರೆ.
ಬಿಸಿಸಿಐ ಟಿವಿಗೆ ನೀಡಿದ ಸಂದರ್ಶನದಲ್ಲಿ ವಿರಾಟ್ ಜೊತೆಗಿನ ಕ್ಷಣಗಳನ್ನು ನೆನಪಿಸಿಕೊಂಡ ಸಚಿನ್, 2007- 08ರಲ್ಲಿ ಮಲೇಷ್ಯಾದಲ್ಲಿ ಅಂಡರ್-19 ಕ್ರಿಕೆಟ್ನಲ್ಲಿ ನೀವು ತೋರಿದ ಪ್ರದರ್ಶನದ ಬಗ್ಗೆ ಆಸ್ಟ್ರೇಲಿಯಾದಲ್ಲಿದ್ದ ನಮಗೆ ತಿಳಿಯಿತು. 'ಇವನು ಒಬ್ಬ ಗಮನಾರ್ಹ ಆಟಗಾರ, ಅದ್ಭುತವಾಗಿ ಆಡುತ್ತಾನೆ' ಎಂದು ನಮ್ಮ ಕೆಲ ಆಟಗಾರರು ನಿಮ್ಮ ಬಗ್ಗೆ ಚರ್ಚಿಸಿದರು. ಅದರ ಬಳಿಕ ನಾನು- ವಿರಾಟ್ ಭಾರತಕ್ಕಾಗಿ ಆಡಿದ್ದೇವೆ. ಅವರು ಕ್ರಿಕೆಟ್ ಮೈದಾನದಲ್ಲಿ ಕೌಶಲ್ಯಗಳನ್ನು ಕರಗತ ಮಾಡಿಕೊಳ್ಳಲು ಯಾವಾಗಲೂ ಉತ್ಸುಕರಾಗಿರುತ್ತಿದ್ದರು ಎಂದು ತಿಳಿಸಿದ್ದಾರೆ.
ವಿರಾಟ್ ಕೊಹ್ಲಿ, ಭಾರತ ತಂಡದ ಪ್ರಮುಖ ಆಟಗಾರ ಎಂಬುದಕ್ಕೆ ಅವರ ದಾಖಲೆಗಳೇ ಸಾಕ್ಷಿ. ಅವರಲ್ಲಿ ಇನ್ನೂ ಹಲವು ವರ್ಷಗಳ ಕ್ರಿಕೆಟ್ ಬಾಕಿ ಇದೆ. ಭಾರತೀಯ ಕ್ರಿಕೆಟ್ಗೆ ಅವರ ಅಗತ್ಯವಿದೆ ಎಂದು ಹೇಳಿದ್ದಾರೆ.
ಫಿಟ್ನೆಸ್ ಬಗ್ಗೆ ಮೆಚ್ಚುಗೆ: ವಿರಾಟ್ ಕೊಹ್ಲಿಯ ಫಿಟ್ನೆಸ್ ಬಗ್ಗೆ ಮಾತನಾಡಿದ ಸಚಿನ್, ವಿಶ್ವದ ಸದೃಢ ಕ್ರಿಕೆಟಿಗರಲ್ಲಿ ಕೊಹ್ಲಿ ಒಬ್ಬರು. ಓರ್ವ ಕ್ರೀಡಾಳುವಾಗಿ ಫಿಟ್ನೆಸ್ ಹೇಗೆ ಕಾಪಾಡಿಕೊಳ್ಳಬೇಕು ಎಂಬುದನ್ನು ವಿರಾಟ್ ತೋರಿಸಿಕೊಟ್ಟಿದ್ದಾರೆ. ಇದು ಅನೇಕರಿಗೆ ಸ್ಪೂರ್ತಿ ಕೂಡ ಎಂದಿದ್ದಾರೆ. ಇದಕ್ಕೆ ಸಂಬಂಧಿಸಿದ ಘಟನೆ ನೆನಪಿಸಿಕೊಂಡ ಸಚಿನ್, 2011 ರಲ್ಲಿ ನಾವು ಕ್ಯಾನ್ಬೆರಾದಲ್ಲಿದ್ದಾಗ ಹೋಟೆಲ್ ಒಂದಕ್ಕೆ ಹೋಗಿ ಊಟ ಮುಗಿಸಿಕೊಂಡು ವಾಪಸ್ ಬರುತ್ತಿದ್ದಾಗ ವಿರಾಟ್, 'ಸರ್ ಇನ್ನು ಹೆಚ್ಚಾಯಿತು. ದೈಹಿಕ ಕ್ಷಮತೆಯ ಕಡೆಗೆ ಗಮನ ನೀಡುವೆ' ಎಂದರು. ಅಂದಿನಿಂದಲೂ ವಿರಾಟ್ ಎಂದೂ ಫಿಟ್ನೆಸ್ನಲ್ಲಿ ರಾಜಿ ಮಾಡಿಕೊಂಡಿಲ್ಲ ಎಂದು ಹೇಳಿದ್ದಾರೆ.
ಮೊಹಾಲಿಯಲ್ಲಿ ಶುಕ್ರವಾರ ಆರಂಭವಾಗಲಿರುವ ಶ್ರೀಲಂಕಾ ವಿರುದ್ಧದ 2 ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲ ಪಂದ್ಯ ವಿರಾಟ್ ಕೊಹ್ಲಿಗೆ 100 ನೇ ಟೆಸ್ಟ್ ಪಂದ್ಯವಾಗಿದೆ. ಈ ವಿಶೇಷ ಪಂದ್ಯಕ್ಕೆ ಬಿಸಿಸಿಐ ಶೇ.50 ರಷ್ಟು ಪ್ರೇಕ್ಷಕರಿಗೆ ಅವಕಾಶ ಮಾಡಿಕೊಟ್ಟಿದೆ.
ಓದಿ: ವಿರಾಟ್ 100ನೇ ಟೆಸ್ಟ್: ಕ್ರಿಕೆಟ್ ದಿಗ್ಗಜರಿಂದ ಕೊಹ್ಲಿ ಗುಣಗಾನ, ಶುಭಹಾರೈಕೆ
