ಮುಂಬೈ: ಐಪಿಎಲ್ 2022ರ ಪ್ಲೇ ಆಫ್ ಪ್ರವೇಶಕ್ಕೆ ಶನಿವಾರ ಮುಂಬೈ ವಿರುದ್ಧ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಸೋತ ಡೆಲ್ಲಿ ಕ್ಯಾಪಿಟಲ್ಸ್ ನಿರಾಸೆಯೊಂದಿಗೆ ಟೂರ್ನಿಯಿಂದ ಹೊರಬಿದ್ದಿದೆ. 159 ರನ್ಗಳನ್ನು ಡಿಫೆಂಡ್ ಮಾಡುವಲ್ಲಿ ಮುಗ್ಗರಿಸಿದ ಡೆಲ್ಲಿ, 15ನೇ ಓವರ್ನಲ್ಲಿ ಅಂಪೈರ್ ನೀಡಿದ್ದ ನಾಟೌಟ್ ನಿರ್ಧಾರಕ್ಕೆ ನಾಯಕ ರಿಷಭ್ ಪಂತ್ ಡಿಆರ್ಎಸ್ ಮೊರೆ ಹೋಗದಿರುವುದು ತಂಡ ದೊಡ್ಡ ಬೆಲೆ ತೆರುವಂತಾಯಿತು.
ಡೆವಾಲ್ಡ್ ಬ್ರೆವಿಸ್ ವಿಕೆಟ್ ಪತನದ ಬಳಿಕ ಕ್ರೀಸ್ಗೆ ಬಂದ ಆಕ್ರಮಣಕಾರಿ ಆಟಗಾರ ಟಿಮ್ ಡೇವಿಡ್ ಮೊದಲ ಎಸೆತ ಎದುರಿಸುವಲ್ಲಿ ಸಫಲರಾಗಲಿಲ್ಲ. ಔಟ್ ಎಂದು ಡೆಲ್ಲಿ ಆಟಗಾರರು ಮಾಡಿದ ಮನವಿಗೆ ಸೊಪ್ಪು ಹಾಕದ ಅಂಪೈರ್ ನಾಟೌಟ್ ಎಂದು ತೀರ್ಪು ನೀಡಿದರು. ಈ ನಿರ್ಧಾರದ ಬಗ್ಗೆ ಗೊಂದಲ ಹೊಂದಿದ್ದರೂ ಕೂಡಾ ರಿಷಭ್ ಪಂತ್ ಡಿಆರ್ಎಸ್ ತೆಗೆದುಕೊಳ್ಳಲಿಲ್ಲ. ಆದರೆ ಬಾಲ್ ಬ್ಯಾಟ್ಗೆ ತಗುಲಿ ಪಂತ್ ಕೈಸೇರಿರುವುದು ಬಳಿಕ ರಿಪ್ಲೇಯಲ್ಲಿ ಸ್ಪಷ್ಟವಾಗಿತ್ತು. ಇದು ನಿರ್ಣಾಯಕ ಪಂದ್ಯದಲ್ಲಿ ಡೆಲ್ಲಿ ಆಟಗಾರರ ನಿರಾಸೆಗೆ ಕಾರಣವಾಗಿದೆ.
ಡೇವಿಡ್ ಮೈದಾನಕ್ಕಿಳಿದಾಗ 95 ರನ್ಗೆ 3 ವಿಕೆಟ್ ಕಳೆದುಕೊಂಡಿದ್ದ ಮುಂಬೈ ಗೆಲುವಿಗೆ 33 ಎಸೆತಗಳಲ್ಲಿ 65 ರನ್ ಅಗತ್ಯವಿತ್ತು. ಪಂತ್ ತಪ್ಪು ನಿರ್ಧಾರವನ್ನು ಸದ್ಬಳಕೆ ಮಾಡಿಕೊಂಡ ಡೇವಿಡ್ ಬಳಿಕ ಕೇವಲ 11 ಎಸೆತಗಳಲ್ಲಿ 34 ರನ್ ಚಚ್ಚಿ ಪಂದ್ಯವನ್ನು ಡೆಲ್ಲಿ ಕೈಯಿಂದ ಕಸಿದುಕೊಂಡರು.
ಈ ಬಗ್ಗೆ ಪಂದ್ಯದ ಬಳಿಕ ಮಾತನಾಡಿದ ರಿಷಭ್ ಪಂತ್, 'ಬೌಲ್ ಬ್ಯಾಟ್ಗೆ ತಗುಲಿರುವ ಬಗ್ಗೆ ನಮಗೆ ಅನುಮಾನವಿತ್ತು. ಅಲ್ಲದೆ, ನಾನು ಸಮೀಪದಲ್ಲಿ 30 ಯಾರ್ಡ್ ಸರ್ಕಲ್ನಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದವರ ಬಳಿ ಕೇಳಿದರೂ ಕೂಡ, ಯಾರಿಗೂ ಸ್ಪಷ್ಟತೆ ಇರಲಿಲ್ಲ. ಹೀಗಾಗಿ ಡಿಆರ್ಎಸ್ ಮೊರೆ ಹೋಗಲಿಲ್ಲ' ಎಂದರು.
ಮುಂಬೈ ವಿರುದ್ಧದ ನಿರ್ಣಾಯಕ ಪಂದ್ಯದಲ್ಲಿ 5 ವಿಕೆಟ್ಗಳಿಂದ ಸೋತ ಡೆಲ್ಲಿ ಕ್ಯಾಪಿಟಲ್ಸ್ಗೆ ಮತ್ತೊಮ್ಮೆ ಐಪಿಎಲ್ ಪ್ರಶಸ್ತಿ ಮರೀಚಿಕೆಯಾಗಿದೆ. ತಂಡವು ಕಳೆದ ಮೂರು ಸೀಸನ್‌ಗಳಲ್ಲಿ ಪ್ಲೇಆಫ್‌ಗೆ ತಲುಪಿದ್ದರೂ ಇನ್ನೂ ಕೂಡ ಐಪಿಎಲ್ ಕಿರೀಟ ಗೆದ್ದಿಲ್ಲ. ಮುಂಬೈನ ಈ ಗೆಲುವಿನೊಂದಿಗೆ 16 ಅಂಕ ಹೊಂದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಪ್ಲೇ ಆಫ್ ತಲುಪಿದೆ.
ಇದನ್ನೂ ಓದಿ: ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಮುಂಬೈ ಇಂಡಿಯನ್ಸ್ ವಿನ್... ಪ್ಲೇ ಆಫ್ಗೆ ಆರ್ಸಿಬಿ ಲಗ್ಗೆ
