ಆಸ್ಟ್ರೇಲಿಯಾ ವೇಗದ ಬೌಲಿಂಗ್​ನಲ್ಲಿ ಬಲಿಷ್ಠವಾಗಿದೆ.. ಭಾರತದಲ್ಲಿ ಆ ಆಟಗಾರನ ಕೊರತೆ ಕಾಡುತ್ತಿದೆ: ರವಿಶಾಸ್ತ್ರಿ

ಆಸ್ಟ್ರೇಲಿಯಾದ ವೇಗದ ಬೌಲಿಂಗ್​ಗೆ ಹೋಲಿಸಿದರೆ ಭಾರತದ ವೇಗದ ಪಡೆ ದುರ್ಬಲವಾಗಿ ಕಾಣುತ್ತಿದೆ ಎಂದು ರವಿಶಾಸ್ತ್ರಿ ಹೇಳಿದ್ದಾರೆ.

ಲಂಡನ್: ಆಸ್ಟ್ರೇಲಿಯ ವಿರುದ್ಧದ ಜೂನ್ 7 ರಿಂದ ಓವಲ್‌ನಲ್ಲಿ ನಡೆಯಲಿರುವ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಭಾರತದ ದಾಳಿಗೆ ಹೋಲಿಸಿದರೆ ಆಸ್ಟ್ರೇಲಿಯಾದ ವೇಗಿಗಳ ದಾಳಿಯು ಹೆಚ್ಚು ಬಲಶಾಲಿಯಾಗಿದೆ ಎಂದು ಭಾರತದ ಮಾಜಿ ಮುಖ್ಯ ಕೋಚ್ ಮತ್ತು ಆಲ್‌ರೌಂಡರ್ ರವಿಶಾಸ್ತ್ರಿ ಅಭಿಪ್ರಾಯಪಟ್ಟಿದ್ದಾರೆ.

ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ಗೆ ಮುಂಚಿನ ಮಾತುಕತೆಯ ಕಾರ್ಯಕ್ರಮದಲ್ಲಿ ಶಾಸ್ತ್ರಿ ಹೇಳಿದರು. "ಜಸ್ಪ್ರೀತ್ ಬುಮ್ರಾ ಭಾರತೀಯ ತಂಡದಲ್ಲಿದ್ದರೆ, ಎರಡೂ ಬೌಲಿಂಗ್ ದಾಳಿಗಳು ಪ್ರಬಲವಾಗಿವೆ ಎಂದು ನಾನು ಹೇಳುತ್ತಿದ್ದೆ. ಆದರೆ ಆಸ್ಟ್ರೇಲಿಯನ್​ ತಂಡದಲ್ಲಿ ಪ್ಯಾಟ್ ಕಮಿನ್ಸ್ ಮತ್ತು ಮಿಚೆಲ್ ಸ್ಟಾರ್ಕ್ ಇದ್ದಾರೆ. ಅವರಿಗೆ ಭಾರತದಲ್ಲಿ ಸರಿದೂಗಿಸಲು ಬುಮ್ರಾ ಅಗತ್ಯ ಇತ್ತು" ಎಂದಿದ್ದಾರೆ.

ಬೆನ್ನುನೋವಿನಿಂದಾಗಿ ಬುಮ್ರಾ ಕಳೆದ ಎಂಟರಿಂದ ಒಂಬತ್ತು ತಿಂಗಳುಗಳಿಂದ ಹೊರಗುಳಿದಿದ್ದರು. ಏಪ್ರಿಲ್‌ನಲ್ಲಿ, ನ್ಯೂಜಿಲೆಂಡ್‌ನಲ್ಲಿ ಬುಮ್ರಾ ಬೆನ್ನಿನ ಕೆಳಭಾಗಕ್ಕೆ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ವೈದ್ಯಕೀಯ ಪ್ರಕ್ರಿಯೆಯು ಯಶಸ್ವಿಯಾಗಿದೆ. ಆದರೆ ಬುಮ್ರಾ ಇನ್ನೂ ಮೈದಾನಕ್ಕೆ ಇಳಿದಿಲ್ಲ. ವಿಶ್ವಕಪ್​ನ ದೃಷ್ಟಿಕೋನದಿಂದ ಸಂಪೂರ್ಣ ಚೇತರಿಕೆಗೆ ಬಿಸಿಸಿಐ ಎದುರು ನೋಡುತ್ತಿದೆ. ಹೀಗಾಗಿ ಅವರು ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2023 ಅನ್ನು ಸಹ ಆಡಲಿಲ್ಲ.

ಕಳೆದ ಎರಡು ವರ್ಷಗಳಲ್ಲಿ ತಮ್ಮ ಸಂಪೂರ್ಣ ಸ್ಥಿರತೆಯಿಂದಾಗಿ ಉಭಯ ತಂಡಗಳು ವಿಶ್ವದ ಅತ್ಯುತ್ತಮ ಟೆಸ್ಟ್ ತಂಡಗಳಾಗಿವೆ. ಟೆಸ್ಟ್ ಕ್ರಿಕೆಟ್‌ಗೆ ಹೆಚ್ಚಿನ ಜನರು ವೀಕ್ಷಿಸಲು ಕೆಲವು ಸೂಪರ್‌ಸ್ಟಾರ್‌ಗಳು ಮತ್ತು ಆಟಕ್ಕೆ ಜೀವ ತುಂಬುವಂತಹ ಕ್ಷಣಗಳು ನಿರ್ಮಾಣ ಆಗಬೇಕು ಎಂದು ರವಿಶಾಸ್ತ್ರಿ ನಿರೀಕ್ಷಿಸುತ್ತಾರೆ.

"ಪಂದ್ಯಗಳು ಆಕರ್ಷಣೀಯವಾಗಲು ನಮಗೆ ಪಾತ್ರಗಳು ಅಂದರೆ ಆಟಗಾರರು ಮುಖ್ಯವಾಗುತ್ತಾರೆ. ರನ್​, ವಿಕೆಟ್​ ಸರಾಸರಿ ಬಗ್ಗೆ ಜನರು ಹೆಚ್ಚು ಚಿಂತಿಸುವುದಿಲ್ಲ. ಉತ್ತಮ ಪ್ರದರ್ಶನ ಮತ್ತು ಕ್ಷಣಗಳು ಕ್ರಿಕೆಟ್​ನ್ನು ಉಳಿಸುತ್ತದೆ. ಜನರು ಆಟವನ್ನು ವೀಕ್ಷಿಸುವಂತೆ ಮಾಡಲು ನಿಮಗೆ ಪಾತ್ರಗಳು ಬೇಕು. ನಾನು 1981 ರಲ್ಲಿ ಇಲ್ಲಿಗೆ ಬಂದಿದ್ದೇನೆ, ಇಂಗ್ಲೆಂಡ್ ತನ್ನ ಕೆಟ್ಟ ಕ್ರಿಕೆಟ್ ಅನ್ನು ಆಡುತ್ತಿತ್ತು, ಆದರೆ ಇಯಾನ್ ಬೋಥಂ ಆಶಸ್​ ಸರಣಿಯನ್ನು ಆರಂಭಿಸಿದ ನಂರತ ಆಸ್ಟ್ರೇಲಿಯಾ ಇಂಗ್ಲೆಂಡ್​ ಕ್ರಿಕೆಟ್​ನ ವೀಕ್ಷಣೆಯ ರೀತಿಯೇ ಬದಲಾಗಿತ್ತು. ಟೆಸ್ಟ್​ ನೋಡಲು ಮೈದಾನದ ಆಸನಗಳು ತುಂಬುತ್ತಿದ್ದವು" ಎಂದು ಶಾಸ್ತ್ರಿ ಹೇಳಿದ್ದಾರೆ.

ಆಸ್ಟ್ರೇಲಿಯಾ 19 ಪಂದ್ಯಗಳಲ್ಲಿ 11 ಗೆಲುವು, ಮೂರು ಸೋಲು, ಐದು ಡ್ರಾಗಳೊಂದಿಗೆ ಡಬ್ಲ್ಯೂಟಿಸಿ ಪಾಯಿಂಟ್​ ಟೇಬಲ್‌ನಲ್ಲಿ ಅಗ್ರಸ್ಥಾನ ಗಳಿಸಿದರೆ, ಭಾರತ 10 ಗೆಲುವು, ಐದು ಸೋಲು ಮತ್ತು ಮೂರು ಡ್ರಾಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ.

ಭಾರತ ತಂಡ: ರೋಹಿತ್ ಶರ್ಮಾ (ನಾಯಕ), ಶುಭಮನ್ ಗಿಲ್, ಚೇತೇಶ್ವರ ಪೂಜಾರ, ವಿರಾಟ್ ಕೊಹ್ಲಿ, ಅಜಿಂಕ್ಯ ರಹಾನೆ, ಕೆಎಸ್ ಭರತ್ (ವಿಕೆಟ್​ ಕೀಪರ್​​), ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜಾ, ಅಕ್ಷರ್ ಪಟೇಲ್, ಶಾರ್ದೂಲ್ ಠಾಕೂರ್, ಮೊಹಮ್ಮದ್. ಶಮಿ, ಮೊಹಮ್ಮದ್ ಸಿರಾಜ್, ಉಮೇಶ್ ಯಾದವ್, ಜಯದೇವ್ ಉನದ್ಕತ್, ಇಶಾನ್ ಕಿಶನ್

ಸ್ಟ್ಯಾಂಡ್-ಬೈ: ಸೂರ್ಯಕುಮಾರ್ ಯಾದವ್, ಮುಖೇಶ್ ಕುಮಾರ್ ಮತ್ತು ಯಶಸ್ವಿ ಜೈಸ್ವಾಲ್ ಅವರನ್ನು ಹೈ-ಸ್ಟೇಕ್ ಪಂದ್ಯಕ್ಕೆ ಸ್ಟ್ಯಾಂಡ್-ಬೈ ಆಟಗಾರರನ್ನಾಗಿ ಹೆಸರಿಸಲಾಗಿದೆ.

ಇದನ್ನೂ ಓದಿ: ಟೆಸ್ಟ್ ಚಾಂಪಿಯನ್​ಶಿಪ್​ ಫೈನಲ್​: ಧೋನಿ ದಾಖಲೆ ಮುರಿಯಲಿರುವ ವಿರಾಟ್​ ಮತ್ತು ರೋಹಿತ್..