ಮುಂಬೈ: ಭಾನುವಾರ ಮುಂಬೈ ಇಂಡಿಯನ್ಸ್ ವಿರುದ್ಧ ವಾಂಖೆಡೆಯಲ್ಲಿ ನಡೆದ 15ನೇ ಐಪಿಎಲ್ ಆವೃತ್ತಿಯ 37ನೇ ಪಂದ್ಯದಲ್ಲಿ ನಿಧಾನಗತಿ ಓವರ್ ಪ್ರದರ್ಶನಕ್ಕಾಗಿ ಲಖನೌ ಸೂಪರ್ ಜೈಂಟ್ಸ್ ತಂಡದ ನಾಯಕ ಕೆಎಲ್ ರಾಹುಲ್ಗೆ ಐಪಿಎಲ್ ಆಡಳಿತ ಮಂಡಳಿ 24 ಲಕ್ಷ ರೂಗಳ ದಂಡ ವಿಧಿಸಿದೆ.
ಭಾನುವಾರ ವಾಂಖೆಡೆ ಮೈದಾನದಲ್ಲಿ ಪಂದ್ಯ ನಡೆದಿದ್ದು, ಮೊದಲು ಬ್ಯಾಟಿಂಗ್ ಮಾಡಿದ ಲಖನೌ ಸೂಪರ್ ಜೈಂಟ್ಸ್ ತಂಡ ನಾಯಕ ಕೆಎಲ್ ರಾಹುಲ್ ಅಜೇಯ ಶತಕದ ನೆರವಿನಿ 20 ಓವರ್ಗಳಲ್ಲಿ 168 ರನ್ಗಳಿಸಿತ್ತು. ಈ ಮೊತ್ತವನ್ನು ಬೆನ್ನಟ್ಟಲಾಗದೇ ಮುಂಬೈ ಕೇವಲ 132 ರನ್ಗಳಿಸಿ 36 ರನ್ಗಳ ಸೋಲು ಕಂಡಿತು.
ಪಂದ್ಯದಲ್ಲಿ ರಾಹುಲ್ ಶತಕಗಳಿಸಿದ್ದಕ್ಕೆ ಪಂದ್ಯಶ್ರೇಷ್ಠ, ಹೆಚ್ಚು ಬೌಂಡರಿ, ಹೆಚ್ಚು ಸಿಕ್ಸರ್, ಡ್ರೀಮ್ ಇಲೆವೆನ್ ಗೇಮ್ ಚೇಂಜರ್, ಸ್ಟ್ರೈಕ್ರೇಟ್ ಸೇರಿದಂತೆ ಈ ಪಂದ್ಯದಲ್ಲಿ ಅವರು 6 ಪ್ರಶಸ್ತಿಗಳ ಪಡೆಯುವ ಮೂಲಕ 6 ಲಕ್ಷ ರೂ.ಗಳನ್ನು ಜೇಬಿಗಿಳಿಸಿದ್ದರು. ಆದರೆ, ಚೇಸಿಂಗ್ ವೇಳೆ ಸ್ಲೋ ಓವರ್ ರೇಟ್ ಕಾಯ್ದುಕೊಂಡಿದ್ದಕ್ಕೆ 24 ಲಕ್ಷ ರೂಗಳನ್ನು ದಂಡವಾಗಿ ತೆರುವಂತಾಗಿದೆ.
ರಾಹುಲ್ ಈ ಬಾರಿಯ ಐಪಿಎಲ್ನಲ್ಲಿ ನಿಧಾನಗತಿ ಓವರ್ ಕಾಯ್ದುಕೊಂಡಿರುವುದಕ್ಕೆ 2ನೇ ಬಾರಿಗೆ ದಂಡ ಕಟ್ಟುತ್ತಿದ್ದಾರೆ. ಮೊದಲು ಕೂಡ ಮುಂಬೈ ವಿರುದ್ಧದ ಪಂದ್ಯದಲ್ಲೇ 12 ಲಕ್ಷ ದಂಡಕಟ್ಟಿದ್ದರು. ಇದೀಗ 2ನೇ ಬಾರಿ 20 ಓವರ್ಗಳನ್ನು ನಿಗದಿತ ಸಮಯದಲ್ಲಿ ಮುಗಿಸದಿದ್ದಕ್ಕೆ ದಂಡ ಕಟ್ಟಿದ್ದಾರೆ. ತಂಡದ ಇತರ ಸದಸ್ಯರಿಗೂ ಕೂಡ 6 ಲಕ್ಷರೂ ಅಥವಾ ಪಂದ್ಯ ಸಂಭಾವನೆಯ ಶೇ.25ರ ಷ್ಟನ್ನು ತಂಡ ವಿಧಿಸಲಾಗಿದೆ.
ಒಂದು ವೇಳೆ ಲೀಗ್ನಲ್ಲಿ ಮತ್ತೊಮ್ಮೆ ಇದೇ ತಪ್ಪನ್ನು ಲಖನೌ ತಂಡ ಮಾಡಿದರೆ ರಾಹುಲ್ ಐಪಿಎಲ್ ನಿಯಮಾವಳಿಗಳ ಪ್ರಕಾರ ಒಂದು ಪಂದ್ಯ ನಿಷೇಧದ ಶಿಕ್ಷೆ ಎದುರಿಸಬೇಕಾಗುತ್ತದೆ.
ಇದನ್ನೂ ಓದಿ:ಫಾರ್ಮ್ ಸಮಸ್ಯೆ ಸಾಮಾನ್ಯ ನನಗೂ ಎದುರಾಗಿತ್ತು, ಕೊಹ್ಲಿ ಶೀಘ್ರವೇ ರಾರಾಜಿಸ್ತಾರೆ: ಪೀಟರ್ಸನ್
