ನವದೆಹಲಿ: ವಿಶ್ವ ಕ್ರಿಕೆಟ್ನಲ್ಲಿ ಅತಿ ಶ್ರೀಮಂತ ಟೂರ್ನಿಯಾಗಿರುವ ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್) ಒಂದಿಲ್ಲೊಂದು ಹೊಸ ನಿಯಮವನ್ನು ಪರಿಚಯಿಸುತ್ತಲೇ ಇರುತ್ತದೆ. 'ಇಂಪ್ಯಾಕ್ಟ್ ಪ್ಲೇಯರ್' ಪರಿಚಯಿಸಿದ ಬಳಿಕ ಇದೀಗ ಇನ್ನೊಂದು ಹೊಸ ನಿಯಮವನ್ನು ತರಲಾಗಿದೆ. ಟಾಸ್ ಬಳಿಕವೂ ತಂಡದ ನಾಯಕ ರೆಫ್ರಿಯ ಗಮನಕ್ಕೆ ತಂದು ಆಡುವ 11 ಆಟಗಾರರನ್ನು ಬದಲಿಸಬಹುದು.
ನಿಯಮದಂತೆ ಟಾಸ್ ವೇಳೆ ಅಂಪೈರ್ಗಳಿಗೆ ಆಡುವ ಹನ್ನೊಂದು ಆಟಗಾರರ ಪಟ್ಟಿಯನ್ನು ನೀಡಬೇಕು. ಬಳಿಕ ಅದನ್ನು ಬದಲಾವಣೆ ಮಾಡುವಂತಿಲ್ಲ. ಆಟಗಾರ ಗಾಯಗೊಂಡು ನಿವೃತ್ತಿಯಾದರೂ ಇನ್ನೊಬ್ಬರನ್ನು ಕಣಕ್ಕಿಳಿಸುವ ಹಾಗಿಲ್ಲ. ಆದರೆ, ಈ ನಿಯಮಕ್ಕೀಗ ತಿದ್ದುಪಡಿ ಮಾಡಲಾಗಿದೆ.
ಟಾಸ್ ಆದ ಬಳಿಕ ತಂಡಗಳ ನಾಯಕರು ಆಡುವ ಪ್ಲೇಯಿಂಗ್ 11 ಬಳಗ ಮತ್ತು 5 ಬದಲಿ ಆಟಗಾರರ ಪಟ್ಟಿಯನ್ನು ಮ್ಯಾಚ್ ರೆಫ್ರಿಗೆ ಬರವಣಿಗೆ ಮೂಲಕ ನೀಡಬೇಕು. ಅದನ್ನು ರೆಫ್ರಿ ಘೋಷಿಸಿದ ಬಳಿಕ ತಂಡವನ್ನು ಯಾವುದೇ ಕಾರಣಕ್ಕೂ ಬದಲಾವಣೆ ಮಾಡುವಂತಿಲ್ಲ. ಬದಲಾವಣೆ ಮಾಡಬೇಕು ಎಂದಿನಿಸಿದಲ್ಲಿ ಎದುರಾಳಿ ತಂಡದ ನಾಯಕನ ಒಪ್ಪಿಗೆ ಪಡೆಯಬೇಕು.
ಹೊಸ ನಿಯಮದ ಅನುಸಾರ, ಟಾಸ್ ಆದ ಬಳಿಕ ಮೈದಾನದ ಸ್ಥಿತಿ ಮತ್ತು ಅಗತ್ಯಕ್ಕೆ ಅನುಗುಣವಾಗಿ ಮೊದಲೇ ನೀಡಿದ ಪಟ್ಟಿಯಂತೆ ಆಡುವ ಹನ್ನೊಂದರಲ್ಲಿ ಬದಲಾವಣೆ ಮಾಡಬೇಕು ಎಂದು ನಾಯಕನಿಗೆ ಅಥವಾ ಕೋಚ್ಗೆ ಅನ್ನಿಸಿದಲ್ಲಿ ಅದನ್ನು ಬದಲಿಸಬಹುದಾಗಿದೆ. ಆದರೆ, ಇದನ್ನು ಪಂದ್ಯ ಆರಂಭಕ್ಕೂ ಮೊದಲೇ ಮಾಡಬೇಕು. ಪಂದ್ಯದಲ್ಲ ಮಧ್ಯದಲ್ಲಿ ಯಾವುದೇ ಪ್ಲೇಯರ್ ಬದಲಾವಣೆ ಮಾಡುವಂತಿಲ್ಲ.
ವಿಕೆಟ್ ಕೀಪರ್ ಮೇಲೆ ನಿಗಾ: ಇನ್ನೊಂದು ನಿಯಮದಂತೆ, ಚೆಂಡು ಬ್ಯಾಟ್ಗೆ ತಾಗುವುದಕ್ಕೂ ಮೊದಲು ವಿಕೆಟ್ ಕೀಪರ್ ಕ್ರೀಸ್ ಬಿಟ್ಟರೆ, ಅದು ಕ್ರೀಡಾ ಮೋಸ ಎಂದು ಪರಿಗಣಿತವಾಗುತ್ತದೆ. ವಿಕೆಟ್ ಕೀಪರ್ ಯಾವುದೇ ಸೂಚನೆ ಇಲ್ಲದೆ ಚೆಂಡು ತೂರಿ ಬರುವ ಮೊದಲೇ ಚಲಿಸಿದರೆ ಅದರ ವಿರುದ್ಧ ಅಂಪೈರ್ ಕ್ರಮ ಕೈಗೊಳ್ಳುವ ಸಂಪೂರ್ಣ ಅಧಿಕಾರವನ್ನು ಹೊಂದಿರುತ್ತಾನೆ.
ಅಂಪೈರ್‌ಗಳು ಆ ಎಸೆತವನ್ನು ಡೆಡ್ ಬಾಲ್‌ ಎಂದು ಪರಿಗಣಿಸಿ, ಬಳಿಕ ಅದನ್ನು ವೈಡ್ ಅಥವಾ ನೋ ಬಾಲ್‌ ಎಂದು ಘೋಷಿಸಬಹುದು. ಅಲ್ಲದೇ, ವಿಕೆಟ್ ಕೀಪರ್ನ ತಂಡಕ್ಕೆ ರನ್ ಪೆನಾಲ್ಟಿ ಅಥವಾ ಬ್ಯಾಟಿಂಗ್ ತಂಡಕ್ಕೆ 5 ಪೆನಾಲ್ಟಿ ರನ್ ನೀಡಲೂ ಅವಕಾಶ ನೀಡಲಾಗಿದೆ. ಇದರ ಬಗ್ಗೆ ಫೀಲ್ಡಿಂಗ್ ತಂಡದ ನಾಯಕನಿಗೆ, ಬ್ಯಾಟರ್‌ಗಳಿಗೆ ತಿಳಿಸಬೇಕು ಎಂದು ನಿಯಮ ರೂಪಿಸಲಾಗಿದೆ.
ಇಂಪ್ಯಾಕ್ಟ್ ಪ್ಲೇಯರ್: ಐಪಿಎಲ್ನಲ್ಲಿ ಈಗಾಗಲೇ ಇಂಪ್ಯಾಕ್ಟ್ ಪ್ಲೇಯರ್ ನಿಯಮವನ್ನು ಘೋಷಿಸಲಾಗಿದೆ. ಅಂದರೆ, ಓರ್ವ ಆಟಗಾರನನ್ನು ಆಟದ ಮಧ್ಯೆ ಇನ್ನೊಬ್ಬ ಆಟಗಾರನ ಬದಲಿಗೆ ಕಣಕ್ಕಿಳಿಸುವುದು. 20 ಓವರ್ಗಳಲ್ಲಿ 14 ಓವರ್ಗಳ ಮೊದಲೇ ಇಂಪ್ಯಾಕ್ಟ್ ಪ್ಲೇಯರ್ನನ್ನು ಕಣಕ್ಕಿಳಿಸಬೇಕು.
ಬದಲಿ ಆಟಗಾರನಾಗಿ ಪ್ಲೇಯಿಂಗ್ ಇಲೆವೆನ್ನಲ್ಲಿ ಇಂಪ್ಯಾಕ್ಟ್ ಪ್ಲೇಯರ್ನನ್ನು ಕಣಕ್ಕಿಳಿಸಿದರೆ, ಮೊದಲು ಗುರುತಿಸಿದ್ದ ಆಟಗಾರರಲ್ಲಿ ಒಬ್ಬರು ಹೊರಗುಳಿಯಬೇಕು. ಹೀಗೆ ಹೊರಬಿದ್ದ ಪ್ಲೇಯರ್ ಮತ್ತೆ ಪಂದ್ಯದಲ್ಲಿ ಯಾವುದೇ ರೂಪದಲ್ಲೂ ಮೈದಾನಕ್ಕಿಳಿಯುವಂತಿಲ್ಲ. ಬದಲಿ ಫೀಲ್ಡರ್, ರನ್ನರ್ ಆಗಿಯೂ ಕೂಡ ಬರಲು ಅವಕಾಶವಿಲ್ಲ. ಇಂಪ್ಯಾಕ್ಟ್ ಪ್ಲೇಯರ್ ಆಯ್ಕೆಯು ಓವರ್‌ನ ಮಧ್ಯದಲ್ಲಿ ಮಾಡುವಂತಿಲ್ಲ. ಪೂರ್ಣ ಓವರ್ ಮುಗಿದು ಹೊಸ ಓವರ್ ಶುರುವಾದಾಗ ಈ ನಿಯಮ ಬಳಸಬೇಕು.
ಫೀಲ್ಡಿಂಗ್ ತಂಡವು ಬೌಲರ್ ಅನ್ನು ಕಣಕ್ಕಿಳಿಸಲು ಬಯಸಿದರೆ, ಸಂಪೂರ್ಣ ಓವರ್ ಎಸೆಯುವ ಅವಕಾಶ ಕೂಡ ಇರಲಿದೆ. ಅಂದರೆ ಒಂದಕ್ಕಿಂತ ಹೆಚ್ಚು ಓವರ್‌ಗಳನ್ನು ಬೌಲ್ ಮಾಡದಿದ್ದರೆ, ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬರುವ ಆಟಗಾರನಿಗೆ ಪೂರ್ಣ 4 ಓವರ್‌ಗಳನ್ನು ಬೌಲ್ ಮಾಡಲು ಅನುಮತಿಸಲಾಗುತ್ತದೆ.
ಇದನ್ನೂ ಓದಿ: 0,0,0 ಚಕ್ರವ್ಯೂಹದಲ್ಲಿ ಸಿಲುಕಿದ ಸೂರ್ಯಕುಮಾರ್ ಯಾದವ್!
