ಬೆಂಗಳೂರು : ಕೆಎಲ್ ಶ್ರೀಜಿತ್ ಅರ್ಧಶತಕ ಮತ್ತು ಮನ್ವಂತ್ ಕುಮಾರ್ ಆಲ್ರೌಂಡ್ ಆಟದ ನೆರವಿನಿಂದ ಶಿವಮೊಗ್ಗ ಲಯನ್ಸ್ ತಂಡವನ್ನು 3 ವಿಕೆಟ್‌ಗಳಿಂದ ಸೋಲಿಸಿದ ಹುಬ್ಬಳ್ಳಿ ಟೈಗರ್ಸ್, ಮಹಾರಾಜ ಟ್ರೋಫಿ ಟೂರ್ನಿಯಲ್ಲಿ ಮೊದಲ ತಂಡವಾಗಿ ಸೆಮಿಫೈನಲ್ ಹಂತ ಪ್ರವೇಶಿಸಿದೆ.
ಮೊದಲು ಬ್ಯಾಟಿಂಗ್ ಮಾಡಿದ ಶಿವಮೊಗ್ಗ ಲಯನ್ಸ್ ಪವರ್ ಪ್ಲೇನಲ್ಲಿ 3 ವಿಕೆಟ್ ಕಳೆದುಕೊಂಡು 44 ರನ್ ಗಳಿಸಿ ಸಾಧಾರಣ ಆರಂಭ ಪಡೆಯಿತು. ಹುಬ್ಬಳ್ಳಿ ಪರ ಮೂರನೇ ಓವರ್‌ ಎಸೆದ ಸಂತೋಖ್ ಸಿಂಗ್ ಸತತ ಎಸೆತಗಳಲ್ಲಿ ನಿಹಾಲ್ ಉಲ್ಲಾಳ್ (9) ಮತ್ತು ವಿನಯ್ ಸಾಗರ್ (0) ವಿಕೆಟ್ ಕಿತ್ತರು. ಉತ್ತಮ ಬ್ಯಾಟಿಂಗ್ ತೋರುತ್ತಿದ್ದ ರೋಹನ್ ಕದಮ್ (17) ರನೌಟ್ಗೆ ಬಲಿಯಾದರು.
ರೋಹಿತ್ ಕುಮಾರ್ (18) ರನ್ ಗಳಿಸಿ ಹತ್ತನೇ ಓವರ್‌ನಲ್ಲಿ ಪ್ರವೀಣ್ ದುಬೆಗೆ ವಿಕೆಟ್ ಒಪ್ಪಿಸಿದರು. ಅಭಿನವ್ ಮನೋಹರ್ (1) ಮತ್ತು ಪ್ರಣವ್ ಭಾಟಿಯಾ (0) ಹುಬ್ಬಳ್ಳಿ ತಂಡದ ಅನುಭವಿ ಸ್ಪಿನ್ನರ್ ಕೆ.ಸಿ ಕಾರಿಯಪ್ಪಗೆ ಬಲಿಯಾದರು. ಆದರೆ, ಕೆಳ ಕ್ರಮಾಂಕದಲ್ಲಿ ಕ್ರಾಂತಿ ಕುಮಾರ್ (34) ನಾಯಕ ಶ್ರೇಯಸ್ ಗೋಪಾಲ್ 31 ರನ್ ಗಳಿಸುವ ಮೂಲಕ, 38 ಎಸೆತಗಳಲ್ಲಿ 44 ರನ್‌ಗಳ ಜೊತೆಯಾಟವಾಡಿದರು. ಅಂತಿಮವಾಗಿ ಶಿವಮೊಗ್ಗ 20 ಓವರ್‌ಗಳಲ್ಲಿ 130 ರನ್‌ಗಳಿಗೆ ಆಲೌಟ್ ಆಯಿತು. ಹುಬ್ಬಳ್ಳಿ ಪರ ಕೆ.ಸಿ ಕಾರಿಯಪ್ಪ (2/17), ಮನ್ವಂತ್ ಕುಮಾರ್ (2/20) ಮತ್ತು ಸಂತೋಖ್ ಸಿಂಗ್ (2/26) ತಲಾ ಎರಡು ವಿಕೆಟ್ ಪಡೆದರು.
ಸಾಧಾರಣ ಗುರಿ ಪಡೆದ ಹುಬ್ಬಳ್ಳಿ ಟೈಗರ್ಸ್ ಸಹ ಉತ್ತಮ ಆರಂಭ ಪಡೆಯಲಿಲ್ಲ. ಎಂ.ಬಿ. ಶಿವಂ (0) ಮೊಹಮ್ಮದ್ ತಾಹಾ (12) ರನ್ ಗಳಿಸಿ ಶಿವಮೊಗ್ಗ ಲಯನ್ಸ್ ನಾಯಕ ಶ್ರೇಯಸ್ ಗೋಪಾಲ್ಗೆ ವಿಕೆಟ್ ಒಪ್ಪಿಸಿದರು. ನಾಗ ಭರತ್ (0) ಮತ್ತು ಮನೀಶ್ ಪಾಂಡೆ (3) ಸಹ ನಿರಾಸೆ ಮೂಡಿಸಿ ಪೆವಿಲಿಯನ್ ಸೇರಿದರು. ಆದರೆ ಇನ್ನೊಂದು ತುದಿಯಲ್ಲಿ ಏಕಾಂಗಿ ಹೋರಾಟ ನಡೆಸಿದ ಕೆ.ಎಲ್ ಶ್ರೀಜಿತ್ ಅರ್ಧಶತಕ ದಾಖಲಿಸಿ ಮಿಂಚಿದರು. ಪ್ರವೀಣ್ ದುಬೆ (18) ರನ್ ಗಳಿಸುವ ಮೂಲಕ ಶ್ರೀಜಿತ್ಗೆ ಕೊಂಚ ಹೊತ್ತು ಬೆಂಬಲವಾಗಿ ನಿಂತರು.
ತದನಂತರ ಕೆ.ಎಲ್ ಶ್ರೀಜಿತ್ (50) ವಿಕೆಟ್ ಒಪ್ಪಿಸಿ ಹೊರನಡೆದರು. 17ನೇ ಓವರ್‌ನಲ್ಲಿ ಮನ್ವಂತ್ ಕುಮಾರ್ (27) ಸಹ ಔಟ್ ಆಗುವ ಮೂಲಕ ಶಿವಮೊಗ್ಗ ಬೌಲರ್‌ಗಳು ಮೇಲುಗೈ ಸಾಧಿಸಿದರು. ಕೊನೆಯ ಮೂರು ಓವರ್‌ಗಳಲ್ಲಿ ಹುಬ್ಬಳ್ಳಿ ಗೆಲುವಿಗೆ ಕೇವಲ 17 ರನ್ ಅಗತ್ಯವಿದ್ದು, ವೇಗಿ ಲವಿಶ್ ಕೌಶಾಲ್ ಎರಡು ಸಿಕ್ಸರ್ ಸಹಿತ (14*) ರನ್ ಬಾರಿಸಿ, ಇನ್ನೂ ಎಂಟು ಎಸೆತಗಳು ಬಾಕಿ ಇರುವಂತೆಯೇ ಹುಬ್ಬಳ್ಳಿ ಟೈಗರ್ಸ್ ತಂಡವನ್ನು ಮೂರು ವಿಕೆಟ್‌ಗಳ ಗೆಲುವಿನ ದಡ ಸೇರಿಸಿದರು.
ಸಂಕ್ಷಿಪ್ತ ಸ್ಕೋರ್: ಶಿವಮೊಗ್ಗ ಲಯನ್ಸ್ - 130 (20 ಓವರ್‌ಗಳಲ್ಲಿ ಆಲೌಟ್); ಕ್ರಾಂತಿ ಕುಮಾರ್ - 34 (25 ಎಸೆತ), ಶ್ರೇಯಸ್ ಗೋಪಾಲ್ - 31 (31), ಕೆ.ಸಿ. ಕಾರಿಯಪ್ಪ - 2/17(4), ಮನ್ವಂತ್ ಕುಮಾರ್ - 2/20(4), ಸಂತೋಖ್ ಸಿಂಗ್ - 2/26(3)
ಹುಬ್ಬಳ್ಳಿ ಟೈಗರ್ಸ್ - 131-7 (18.4 ಓವರ್‌ ) ಕೆಎಲ್ ಶ್ರೀಜಿತ್ - 50 (41 ಎಸೆತ), ಮನ್ವಂತ್ ಕುಮಾರ್ - 27(21), ಪ್ರವೀಣ್ ದುಬೆ - 18 (17)
ಶ್ರೇಯಸ್ ಗೋಪಾಲ್ 4/30(4), ವಿ.ಕೌಶಿಕ್ 1/15(4); ಪಂದ್ಯ ಶ್ರೇಷ್ಠ - ಕೆ.ಎಲ್. ಶ್ರೀಜಿತ್
ಇದನ್ನೂ ಓದಿ: ಮಹಾರಾಜ ಟ್ರೋಫಿ: ಅಗರ್ವಾಲ್ ಆಕರ್ಷಕ ಶತಕ; ಟೂರ್ನಿಯಿಂದ ಹೊರಬಿದ್ದ ಬೆಂಗಳೂರಿಗೆ ಮೊದಲ ಜಯ
