ಲಂಡನ್: ಭಾರತ ತಂಡದ ಟೆಸ್ಟ್ ಸ್ಪೆಷಲಿಸ್ಟ್ ಚೇತೇಶ್ವರ್ ಪೂಜಾರ ಅವರನ್ನು ಸ್ಟೀವ್ ಎಂದು ಅಡ್ಡ ಹೆಸರಿನಿಂದ ಕರೆದಿದ್ದಕ್ಕೆ ಇಂಗ್ಲೆಂಡ್ ಕೌಂಟಿ ಕ್ಲಬ್ ಸಮರ್ಸೆಟ್ ಬೌಲರ್ ಜಾಕ್ ಬ್ರೂಕ್ಸ್ ಕ್ಷಮೆಯಾಚಿಸಿದ್ದಾರೆ. 2012ರಲ್ಲಿ ತಾವೂ ಮಾಡಿರುವ ಜನಾಂಗೀಯ ನಿಂದನೆ ಎಂದು ಬಿಂಬಿಸುವ ಟ್ವೀಟ್ಗಳಿಗೂ ಕ್ಷಮೆಯಾಚಿಸಿದ್ದಾರೆ.
ಪೂಜಾರ ಅವರು ಯಾರ್ಕ್ಶೈರ್ ತಂಡದಲ್ಲಿ ಆಡುತ್ತಿದ್ದ ಸಂದರ್ಭದಲ್ಲಿ ಬ್ರೂಕ್ಸ್ ಭಾರತೀಯ ಕ್ರಿಕೆಟಿಗನ ಹೆಸರನ್ನು ಕರೆಯಲು ಕಷ್ಟ ಎಂದು ಸ್ಟೀವ್ ಎಂದು ಕರೆಯುತ್ತಿದ್ದರು. ಕಳೆದ ವರ್ಷ ವರ್ಣಬೇಧ ನೀತಿ ವಿರುದ್ಧ ಸಿಡಿದೆದ್ದು ಯಾರ್ಕ್ಶೈರ್ ಕ್ಲಬ್ನಿಂದ ಹೊರಬಂದಿದ್ದ ಅಜೀಮ್ ರಫೀಕ್ ಕ್ಲಬ್ನಲ್ಲಿ ತಮ್ಮನ್ನಲ್ಲದೆ ಪೂಜಾರ ಅವರನ್ನು ಕೂಡ ಜನಾಂಗೀಯವಾಗಿ ನಿಂದಿಸಿದ್ದರು ಎಂದು ಆರೋಪಿಸಿದ್ದರು.
ಅಲ್ಲದೆ ತಾವೂ ಕ್ಲಬ್ನಲ್ಲಿನ ಇಂಗ್ಲಿಷ್ ಕ್ರಿಕೆಟಿಗರ ನಿಂದನೆಯಿಂದ ಬೇಸತ್ತು ಆತ್ಮಹತ್ಯೆಗೂ ಯತ್ನಿಸಿದ್ದೆ ಎಂದು ಹೇಳಿದ್ದರು. ಇದೀಗ ವರ್ಣಬೇಧ ನೀತಿ ವಿವಾದ ಕಳೆದೊಂದು ವಾರದಿಂದ ಇಂಗ್ಲೆಂಡ್ ಕ್ರಿಕೆಟ್ನಲ್ಲಿ ಬಿರುಗಾಳಿ ಎಬ್ಬಿದ್ದು, ತನಿಖೆ ನಡೆಯುತ್ತಿದೆ.
ಉಚ್ಚರಿಸಲು ಕಷ್ಟಪಡುವವರ ಹೆಸರಿನ ಬದಲಿಗೆ ನಾವು 'ಸ್ಟೀವ್' ಎಂದು ಕರೆಯುತ್ತಿದ್ದೆವು. ಪೂಜಾರ ಅವರನ್ನು ಹಾಗೆಯೇ ಕರೆಯಲಾಗಿತ್ತು. ಹಾಗೆ ಮಾಡಿರುವುದು ಅಗೌರವ. ನಮ್ಮಿಂದ ತಪ್ಪಾಗಿದೆ. ಈಗ ನಾನು ಈ ವಿಷಯಕ್ಕಾಗಿ ಪೂಜಾರ ಬಳಿ ಕ್ಷಮೆಯಾಚಿಸುತ್ತೇನೆ ಎಂದು ಬ್ರೂಕ್ಸ್ ಹೇಳಿದ್ದಾರೆ.
