ಮುಂಬೈ: ಬೆಂಗಳೂರು ತಂಡದ ಆಲ್ರೌಂಡರ್ ವನಿದು ಹಸರಂಗ ಮಾರಕ ಬೌಲಿಂಗ್ ದಾಳಿಗೆ ತತ್ತರಿಸಿರುವ ಕೋಲ್ಕತ್ತಾ ನೈಟ್ ರೈಡರ್ಸ್ ಬೆಂಗಳೂರು ತಂಡದ ಗೆಲುವಿಗೆ 129 ರನ್ಗಳ ಸುಲಭ ಟಾರ್ಗೆಟ್ ನೀಡಿದೆ. ಡಿ.ವೈ.ಪಾಟೀಲ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ನಡೆಸಿದ ಶ್ರೇಯಸ್ ಅಯ್ಯರ್ ಪಡೆ, ಆರ್ಸಿಬಿ ಬೌಲಿಂಗ್ ದಾಳಿಗೆ ಸಂಪೂರ್ಣವಾಗಿ ತತ್ತರಿಸಿ ಹೋಯಿತು.
ಆರಂಭಿಕರಾಗಿ ಕಣಕ್ಕಿಳಿದ ವೆಂಕಟೇಶ್ ಅಯ್ಯರ್(10) ಹಾಗೂ ರಹಾನೆ(9) ಮೊದಲ ಮೂರು ಓವರ್ಗಳಲ್ಲೇ ವಿಕೆಟ್ ಕಳೆದುಕೊಂಡರು. ಅಯ್ಯರ್ ವಿಕೆಟ್ ಕೀಳುವಲ್ಲಿ ಆಕಾಶ್ ದೀಪ್ ಯಶಸ್ವಿಯಾದರೆ, ರಹಾನೆ ವಿಕೆಟ್ ಸಿರಾಜ್ ಪಡೆದುಕೊಂಡರು. ಇದಾದ ಬಳಿಕ ಯಾವುದೇ ಆಟಗಾರ ಹೇಳಿಕೊಳ್ಳುವಂತಹ ಆಟ ಪ್ರದರ್ಶನ ನೀಡಲಿಲ್ಲ. ಕ್ಯಾಪ್ಟನ್ ರಹಾನೆ(13), ನಿತೀಶ್ ರಾಣಾ(10), ಸುನಿಲ್ ನರೈನ್(12), ಬಿಲ್ಲಿಂಗ್ಸ್(14)ರನ್ಗಳಿಕೆ ಮಾಡಿ ವಿಕೆಟ್ ಒಪ್ಪಿಸಿದರು. ಹೀಗಾಗಿ ಮೊದಲ 10 ಓವರ್ಗಳಲ್ಲಿ ಪ್ರಮುಖ 6 ವಿಕೆಟ್ ಕಳೆದುಕೊಂಡು 76ರನ್ಗಳಿಕೆ ಮಾಡಿತು.
ಕೆಕೆಆರ್ಗೆ ಮಾರಕವಾದ ಹಸರಂಗ: ಕೋಲ್ಕತ್ತಾ ನೈಟ್ ರೈಡರ್ಸ್ ಬ್ಯಾಟಿಂಗ್ ಪಡೆಗೆ ಮಾರಕವಾಗಿ ಕಾಡಿದ ವನಿದು ಹಸರಂಗ ಪ್ರಮುಖ ನಾಲ್ಕು ವಿಕೆಟ್ ಕಿತ್ತರು. ಕ್ಯಾಪ್ಟನ್ ಶ್ರೇಯಸ್ ಅಯ್ಯರ್, ಸುನಿಲ್ ನರೈನ್, ಜಾಕ್ಸನ್, ಸೌಥಿ ವಿಕೆಟ್ ಕಬಳಿಸಿ, ತಂಡಕ್ಕೆ ಮೇಲುಗೈ ತಂದುಕೊಟ್ಟರು. ಇವರಿಗೆ ಸಾಥ್ ನೀಡಿದ ಆಕಾಶ್ ದೀಪ್ 3 ವಿಕೆಟ್, ಹರ್ಷಲ್ ಪಟೇಲ್ 2 ವಿಕೆಟ್ ಪಡೆದುಕೊಂಡರೆ, ಸಿರಾಜ್ 1 ವಿಕೆಟ್ ಪಡೆದು ಗಮನ ಸೆಳೆದರು.
ಬಾಲಂಗೋಚಿಗಳಾದ ಉಮೇಶ್ ಯಾದವ್(18), ವರುಣ್ ಚಕ್ರವರ್ತಿ(10) ಕೊನೆಯಲ್ಲಿ ಅಲ್ಪಮಟ್ಟದ ವಿರೋಧ ತೋರಿದ್ದರಿಂದ ಕೆಕೆಆರ್ ತಂಡ 18.5 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 128ರನ್ಗಳಿಕೆ ಮಾಡಿದೆ. ತಂಡದ ಪರವಾಗಿ ಆಲ್ರೌಂಡರ್ ರಸೆಲ್ 25ರನ್ಗಳಿಕೆ ಮಾಡಿರುವುದು ವೈಯಕ್ತಿಕ ಗರಿಷ್ಠ ಸ್ಕೋರ್ ಆಗಿದೆ.
