ನೆಟ್​​ನಲ್ಲಿ ತರಬೇತಿ ಪಡೆಯುವಾಗಲೂ ಎಬಿಡಿಗೆ ಬೌಲ್​ ಮಾಡೋದು ಕಷ್ಟವಂತೆ..!

ಎಬಿಡಿಯ ಸ್ಫೋಟಕ ಆಟದಿಂದ ಆರ್​ಆರ್​ ವಿರುದ್ಧ ಆರ್​ಸಿಬಿ ಗೆಲುವಿನ ನಗೆ ಬೀರಿದೆ. ಈ ಕುರಿತು ಕ್ರಿಸ್ ಮೋರಿಸ್ ಈ ರೀತಿಯ ಅಭಿಪ್ರಾಯ ನೀಡಿದ್ದಾರೆ.

ದುಬೈ: ಎಬಿ ಡಿ -ವಿಲಿಯರ್ಸ್​​ ಈ ರೀತಿ ಆಟವಾಡಿದರೆ ಯಾವುದೇ ಮೊತ್ತವೂ ಕೂಡಾ ಸುರಕ್ಷಿತವಲ್ಲ ಎಂದು ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡದ ಆಲ್​ರೌಂಡರ್​ ಆಟಗಾರ ಕ್ರಿಸ್ ಮೋರಿಸ್ ಅಭಿಪ್ರಾಯಪಟ್ಟಿದ್ದಾರೆ.

ರಾಜಸ್ಥಾನ್ ರಾಯಲ್ಸ್ ವಿರುದ್ಧ 7 ವಿಕೆಟ್​ಗಳ ಜಯಗಳಿಸಿದ ನಂತರ ಮಾತನಾಡಿದ ಕ್ರಿಸ್ ಮೋರಿಸ್ ಈ ರೀತಿಯಾಗಿ ಅಭಿಪ್ರಾಯಪಟ್ಟಿದ್ದು, ಎಬಿಡಿ ಕ್ರೀಸ್​ನಲ್ಲಿರುವಾಗ ಬೌಲರ್​ಗಳಿಗೆ ಬೌಲಿಂಗ್ ಮಾಡಲು ಕಷ್ಟವಾಗುತ್ತದೆ.

ನೆಟ್​ನಲ್ಲಿ ತರಬೇತಿ ಪಡೆಯುವಾಗಲೆಲ್ಲ ಎಬಿಡಿಗೆ ಬೌಲ್ ಮಾಡಲು ನಾನು ತುಂಬಾ ಕಷ್ಟ ಪಡುತ್ತೇನೆ. ಎಬಿಡಿಗೆ ಬೌಲ್ ಮಾಡಲು ನನ್ನ ಬಳಿ ಯಾವುದೇ ಯೋಜನೆ ಅಥವಾ ತಂತ್ರಗಳಿಲ್ಲ ಎಂದು ಮೋರಿಸ್ ಸ್ಪಷ್ಟನೆ ನೀಡಿದ್ದಾರೆ.

ರಾಜಸ್ಥಾನ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 22 ಎಸೆತಗಳಿಗೆ 55 ರನ್ ಗಳಿಸಿದ ಎಬಿಡಿ ಆರ್​ಸಿಬಿ ಜಯಗಳಿಸಲು ಕಾರಣವಾಗಿದ್ದರು. ಸ್ಫೋಟಕ ಬ್ಯಾಟಿಂಗ್​ನಿಂದ ಆರ್​ ಆರ್​ ತಂಡದ ಹೆಡೆಮುರಿ ಕಟ್ಟಿದ್ದರು.

ಶನಿವಾರ ನಡೆದ ಪಂದ್ಯದಲ್ಲಿ ರಾಜಸ್ಥಾನ್​ ರಾಯಲ್ಸ್ ನೀಡಿದ 178 ರನ್​ಗಳ ಗುರಿಯನ್ನ ಬೆನ್ನತ್ತಿದ ಬೆಂಗಳೂರು ತಂಡ ಎಬಿ ಡಿ ವಿಲಿಯರ್ಸ್ ಅವರ ಅರ್ಧಶತಕ ಹಾಗೂ ನಾಯಕ ಕೊಹ್ಲಿ ಅವರ 43 ರನ್​ಗಳ ನೆರವಿನಿಂದ ಇನ್ನು 2 ಎಸೆತಗಳು ಉಳಿದಿರುವಂತೆ ಗೆಲುವಿನ ನಗೆ ಬೀರಿತ್ತು.