ಕೋಲ್ಕತಾ : ಬಾಲ್ ಟ್ಯಾಂಪರಿಂಗ್ ಸುಳಿಗೆ ಸಿಲುಕಿ ಒಂದು ವರ್ಷ ನಿಷೇಧಕ್ಕೊಳಗಾಗಿದ್ದ ಆಸೀಸ್‌ನ ಡೇವಿಡ್ ವಾರ್ನರ್ ಕಳೆದ ಐಪಿಎಲ್‌ನಿಂದ ಹೊರಗುಳಿದಿದ್ದರು. ಆದರೆ, ಈಗ ಹೈದರಾಬಾದ್ ಸನ್‌ರೈಸರ್ಸ್‌ಗೆ ಮತ್ತೆ ಕಮ್ಬ್ಯಾಕ್ ಮಾಡಿರುವ ವಾರ್ನರ್, ತಾವು ಆಡಿದ ಮೊದಲ ಪಂದ್ಯದಲ್ಲೇ ದಾಖಲೆ ಬರೆದಿದ್ದಾರೆ.
ನಿನ್ನೆ ಕೆಕೆಆರ್ ವಿರುದ್ಧ ನಡೆದ 12ನೇ ಐಪಿಎಲ್ನ 2ನೇ ಪಂದ್ಯದಲ್ಲಿ ಡೇವಿಡ್ ವಾರ್ನರ್ ಸನ್‌ರೈಸರ್ಸ್‌ ಪರ ಆರಂಭಿಕ ಬ್ಯಾಟ್ಸ್‌ಮೆನಾಗಿ ಮೈದಾನಕ್ಕೆ ಎಂಟ್ರಿ ಕೊಟ್ಟಿದ್ದರು. ಅಷ್ಟೇ ಅಲ್ಲ,ಭರ್ಜರಿಯಾಗಿ ಅರ್ಧಶತಕ ಗಳಿಸಿದ್ದರು. 53 ಎಸೆತಗಳಲ್ಲಿ 85 ರನ್ ಸಿಡಿಸಿದ್ದ ಅವರು ಹೈದರಾಬಾದ್ಗೆ ಭರ್ಜರಿ ಆರಂಭ ಒದಗಿಸಿ ಬೃಹತ್ ಮೊತ್ತಕ್ಕೆ ಕಾರಣರಾಗಿದ್ದರು. ಆದರೆ, 181 ರನ್ ಗಳಿಸಿದ್ದರೂ ಕೂಡ ಕೆಕೆಆರ್ ಈ ಸ್ಕೋರ್ ಚೇಸ್ ಮಾಡಿ ಗೆಲುವಿನ ನಗೆ ಬೀರಿತು.
ಹೆಚ್ಚು ಅರ್ಧಶತಕ ಸಿಡಿಸಿ ರೆಕಾರ್ಡ್:
85 ರನ್ ಸಿಡಿಸಿದ್ದ ಡೇವಿಡ್ ವಾರ್ನರ್ ಐಪಿಎಲ್ ಟೂರ್ನಿಯಲ್ಲಿ ಅತೀ ಹೆಚ್ಚು ಅರ್ಧಶತಕ ಗಳಿಸಿದ ಆಟಗಾರ ಎಂಬ ದಾಖಲೆಗೆ ಪಾತ್ರರಾದರು. 37ನೇ ಅರ್ಧಶತಕ ಭಾರಿಸಿ ಗೌತಮ್ ಗಂಭೀರ್ ದಾಖಲೆಯನ್ನು ಅಳಿಸಿಹಾಕಿದರು. ಗಂಭೀರ್ 36 ಫಿಫ್ಟಿ ಗಳಿಸಿರುವ ಸಾಧನೆ ಮಾಡಿದ್ದರು. ಸುರೇಶ್ ರೈನಾ 35, ವಿರಾಟ್ ಕೊಹ್ಲಿ ಹಾಗೂ ರೋಹಿತ್ ಶರ್ಮಾ ತಲಾ 34 ಅರ್ಧಶತಕ ಸಿಡಿಸಿ ನಂತರದ ಸ್ಥಾನದಲ್ಲಿದ್ದಾರೆ.
