ಪಾಕ್​ ಆಟಗಾರರಿಂದ ಟೀಂ ಇಂಡಿಯಾ ಗುಣಗಾನ: ಫೈನಲ್​ಗೆ ಭಾರತ - ಇಂಗ್ಲೆಂಡ್ ಫಿಕ್ಸ್ ಎಂದ ಪಾಕ್​​​ನ ಈ ಆಟಗಾರ!

ಬ್ಯಾಟಿಂಗ್​ ಮತ್ತು ಬೌಲಿಂಗ್​ ವಿಭಾಗದಲ್ಲಿ ಭಾರತದ ಆಟಗಾರರು ಅದ್ಭುತ ಪ್ರದರ್ಶನ ತೋರುತ್ತಿದ್ದಾರೆ ಎಂದು ಪಾಕಿಸ್ತಾನ ತಂಡದ ಮಾಜಿ ಆಟಗಾರ ಶಾಹಿದ್ ಅಫ್ರಿದಿ ಮೆಚ್ಚುಗೆ ಸೂಚಿಸಿದ್ದಾರೆ.

ಹೈದರಾಬಾದ್: ಪಾಕಿಸ್ತಾನ ಕ್ರಿಕೆಟ್​ನ ಮಾಜಿ ಆಟಗಾರರಾದ ಶೋಯೆಬ್ ಅಖ್ತರ್ ಮತ್ತು ಶಾಹಿದ್ ಅಫ್ರಿದಿ ಭಾರತ ಕ್ರಿಕೆಟ್ ತಂಡದ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

• " class="align-text-top noRightClick twitterSection" data="">

2019 ಐಸಿಸಿ ಏಕದಿನ ಕ್ರಿಕೆಟ್​ ಟೂರ್ನಿಯಲ್ಲಿ ನೀರಸ ಪ್ರದರ್ಶನ ತೋರುತ್ತಿರುವ ಪಾಕಿಸ್ತಾನ ತಂಡದ ವಿರುದ್ಧ ಭಾರೀ ಟೀಕೆಗಳು ಕೇಳಿ ಬರುತ್ತಿದ್ದು, ಸ್ವತಃ ಪಾಕ್​ ಮಾಜಿ ಆಟಗಾರರೇ ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.

ಶೋಯೆಬ್ ಅಖ್ತರ್ ಯೂಟ್ಯೂಬ್​ನಲ್ಲಿ ಹಂಚಿಕೊಂಡಿರುವ ವಿಡಿಯೋದಲ್ಲಿ ಮಾತನಾಡಿರುವ ಶಾಹಿದ್ ಅಫ್ರಿದಿ ಟೀಂ ಇಂಡಿಯಾವನ್ನ ಹೊಗಳಿದ್ದಾರೆ. ಭಾರತ ತಂಡದ ಪ್ರತಿಯೊಬ್ಬ ಆಟಗಾರರೂ ಆತ್ಮ ವಿಶ್ವಾಸದಿಂದ ಆಡುತ್ತಿದ್ದಾರೆ. ಬ್ಯಾಟಿಂಗ್​ ಮತ್ತು ಬೌಲಿಂಗ್​ ವಿಭಾಗದಲ್ಲಿ ಭಾರತ ಅದ್ಭುತ ಪ್ರದರ್ಶನ ತೋರುತ್ತಿದ್ದಾರೆ ಎಂದು ಮೆಚ್ಚುಗೆ ಸೂಚಿಸಿದ್ದಾರೆ.

ದ್ರಾವಿಡ್ ಗುಣಗಾನ:
ಭಾರತದಲ್ಲಿ ರಾಹುಲ್​ ದ್ರಾವಿಡ್​ ಅವರಂತ ಅನುಭವಿ ಆಟಗಾರರನ್ನ ಅಂಡರ್-19 ತಂಡಕ್ಕೆ ತರಬೇತುದಾರನಾಗಿ ನೇಮಿಸಿದ್ದಾರೆ. ಅವರು ಉತ್ತಮವಾಗಿ ಆಟಗಾರರನ್ನ ತಯಾರು ಮಾಡುತ್ತಿದ್ದಾರೆ. ನಮ್ಮಲ್ಲೂ ಅನುಭವಿ ಆಟಗಾರರಿದ್ದಾರೆ, ಆದರೂ ಇಂಥಾ ಕೆಲಸಗಳು ಆಗುತ್ತಿಲ್ಲ, ಅದಕ್ಕೆ ನಮ್ಮ ತಂಡದ ಸ್ಥಿತಿ ಹೀಗಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಇನ್ನು ಸೆಮಿಫೈನಲ್​ ಮತ್ತು ಫೈನಲ್​ ತಲುಪುವ ತಂಡಗಳು ಯಾವುವು ಎಂದು ಅಖ್ತರ್​ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅಫ್ರಿದಿ, ಭಾರತ, ಆಸ್ಟ್ರೇಲಿಯಾ, ನ್ಯೂಜಿಲ್ಯಾಂಡ್​ ಮತ್ತು ಇಂಗ್ಲೆಂಡ್ ತಂಡಗಳು ಸೆಮಿಫೈನಲ್​ ತಲುಪುತ್ತವೆ. ಅಂತಿಮವಾಗಿ ಭಾರತ ಮತ್ತು ಇಂಗ್ಲೆಂಡ್​ ತಂಡಗಳು ಫೈನಲ್​ನಲ್ಲಿ ಮುಖಾಮುಖಿಯಾಗುತ್ತವೆ ಎಂದು ಭವಿಷ್ಯ ನುಡಿದಿದ್ದಾರೆ.

ಸೌಜನ್ಯಕ್ಕಾದರೂ ಪಾಕ್​ ಹೆಸರೇಳದ ಅಫ್ರಿದಿ:
ಸೆಮಿಫೈನಲ್​ ಮತ್ತು ಫೈನಲ್ ತಲುಪುವ ತಂಡಗಳ ಹೆಸರನ್ನ ಸೂಚಿಸಿದ ಅಫ್ರಿದಿ, ಸೌಜನ್ಯಕ್ಕಾದರೂ ಪಾಕಿಸ್ತಾನ ತಂಡದ ಹೆಸರೇಳದೆ, ತವರಿನ ತಂಡದ ವಿರುದ್ಧ ಬೇಸರ ವ್ಯಕ್ತಪಡಿಸಿದ್ದಾರೆ.

ಕಳೆದ ಕೆಲ ದಿನಗಳ ಹಿಂದೆಯಷ್ಟೆ ಮಾಜಿ ಆಟಗಾರ ಕಮ್ರಾನ್​ ಅಕ್ಮಲ್​ ಕೂಡ ಪಾಕ್​ ತಂಡದ ವಿರುದ್ಧ ಬೇಸರ ವ್ಯಕ್ತಪಡಿಸಿದ್ದರು. ವಿಶ್ವಕಪ್​ ಟೂರ್ನಿಯಲ್ಲಿ ಕಳಪೆ ಪ್ರದರ್ಶನ ತೋರುತ್ತಿರುವ ತಂಡದ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿದ್ದರು.