ಇಂದೋರ್: ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿ ನಂತರ ವಿಶ್ರಾಂತಿ ಪಡೆದಿದ್ದ ವಿರಾಟ್ ಕೊಹ್ಲಿ ಬಾಂಗ್ಲಾ ವಿರುದ್ಧದ ಟೆಸ್ಟ್ ಸರಣಿಗೆ ತಂಡಕ್ಕೆ ವಾಪಾಸ್ ಆಗಿದ್ದು, ಇಂದೋರ್ನಲ್ಲಿ ಇತರ ಆಟಗಾರರ ಜೊತೆ ಅಭ್ಯಾಸ ನಡೆಸಿದ್ದಾರೆ.
ಭಾರತ ತಂಡಕ್ಕೆ ಹಿಂತಿರುಗಿರುವ ಕೊಹ್ಲಿ ಪಿಂಕ್ ಬಾಲ್ ಟೆಸ್ಟ್ ಕುರಿತು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ್ದು, ಇಷ್ಟು ದಿನಗಳ ಕಾಲ ರೆಡ್ ಬಾಲ್ನಲ್ಲಿ ಆಡಿ ಅಭ್ಯಾಸವಿರುವುದರಿಂದ ಏಕಾಏಕಿ ಪಿಂಕ್ಬಾಲ್ಗೆ ಹೊಂದಿಕೊಳ್ಳುವುದು ಕಷ್ಟ. ಪಿಂಕ್ಬಾಲ್ನಲ್ಲಿ ಆಡಲು ಹೆಚ್ಚಿನ ಏಕಾಗ್ರತೆ ಅಗತ್ಯವಾಗಿದೆ. ನಾನು ನಿನ್ನೆ ಪಿಂಕ್ ಬಾಲಿನಲ್ಲಿ ಅಭ್ಯಾಸ ಮಾಡಿದ್ದೆ. ರೆಡ್ ಬಾಲ್ಗೆ ಹೋಲಿಸಿದರೆ ಪಿಂಕ್ ಬಾಲ್ ಹೆಚ್ಚು ಸ್ವಿಂಗ್ ಆಗುತ್ತದೆ, ಅಲ್ಲದೆ ರೆಡ್ ಬಾಲ್ನಷ್ಟು ವೇಗ ಹೊಂದಿಲ್ಲ. ಇದು ಬೌಲರ್ ಸ್ನೇಹಿಯಾಗಿದ್ದು, ಪಿಚ್ ಬೌಲರ್ಗಳಿಗಾಗಿ ತಯಾರಿಸಿದರೆ ಪಂದ್ಯವನ್ನು ಬೌಲರ್ಗಳು ಗೆಲ್ಲಿಸಿಕೊಡಲಿದ್ದಾರೆ ಎಂದು ತಿಳಿಸಿದ್ದಾರೆ.
ಶ್ರೇಯಾಂಕದಲ್ಲಿ 9ನೇ ಸ್ಥಾನದಲ್ಲಿರುವ ಬಾಂಗ್ಲಾದೇಶ ಭಾರತಕ್ಕೆ ಸವಾಲೆಸೆಯಬಲ್ಲದೇ ಎಂಬ ವಿಚಾರ ಕುರಿತು ಮಾತನಾಡಿರುವ ಕೊಹ್ಲಿ ."ನಾವು ನಮ್ಮ ಯಾವುದೇ ಎದುರಾಳಿ ತಂಡ, ಬ್ಯಾಟ್ಸ್ಮನ್ ಹಾಗೂ ಬೌಲರ್ಗಳನ್ನು ಹಗುರವಾಗಿ ಕಾಣುವುದಿಲ್ಲ. ಬಾಂಗ್ಲಾದೇಶ ಕೂಡ ಉತ್ತಮ ಕೌಶಲ್ಯವುಳ್ಳ ತಂಡವಾಗಿದೆ, ಅವರಿಂದ ಉತ್ತಮ ಪೈಪೋಟಿಯನ್ನು ನಿರೀಕ್ಷಿಸಿದ್ದೇವೆ ಎಂದಿದ್ದಾರೆ.
ಭಾರತ ತಂಡ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ಆಡಿರುವ 5 ಪಂದ್ಯಗಳಲ್ಲೂ ಗೆಲುವು ಸಾಧಿಸಿದ್ದು 240 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ.
