ಪಾಕ್​ ತಂಡಕ್ಕೆ​ ಮಣ್ಣು ಮುಕ್ಕಿಸಿ ಚೊಚ್ಚಲ ಟಿ20 ವಿಶ್ವಕಪ್​ ಎತ್ತಿ ಹಿಡಿದು ಇಂದಿಗೆ 12 ವರ್ಷ

ಇಂದಿಗೆ ಸರಿಯಾಗಿ 12 ವರ್ಷಗಳ ಹಿಂದೆ ಟೀಂ​ ಇಂಡಿಯಾ ಜೋಹಾನ್​ಬರ್ಗ್​ನಲ್ಲಿ ನಡೆದಿದ್ದ ಫೈನಲ್​ ಪಂದ್ಯದಲ್ಲಿ ಪಾಕಿಸ್ತಾನ ತಂಡವನ್ನು ಮಣಿಸಿ ಚೊಚ್ಚಲ ಟಿ20 ವಿಶ್ವಕಪ್​ ಮುಡಿಗೇರಿಸಿಕೊಂಡಿತ್ತು.

ಮುಂಬೈ: ದಕ್ಷಿಣ ಆಫ್ರಿಕಾದಲ್ಲಿ ನಡೆದಿದ್ದ ಟಿ20 ಕ್ರಿಕೆಟ್​ ವಿಶ್ವಕಪ್​ನ ಫೈನಲ್​ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡವನ್ನು ಮಣಿಸಿ ಚೊಚ್ಚಲ ಟ್ರೋಫಿ ಎತ್ತಿ ಹಿಡಿದಿದ್ದ ಸಾಧನೆಗೀಗ 12 ವರ್ಷಗಳ ಸಂಭ್ರಮ. ಅಂದು ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಹೆಡೆಮುರಿಕಟ್ಟಿದ್ದ ಫೈನಲ್​ ಪಂದ್ಯ ಇಂದಿಗೂ ನಮ್ಮ ಕಣ್ಣುಮುಂದಿದೆ.

ಚೊಚ್ಚಲ ಟಿ20 ವಿಶ್ವಕಪ್​ಗೆ ಸಚಿನ್​, ದ್ರಾವಿಡ್​, ಗಂಗೂಲಿ ಅನಿಲ್​ ಕುಂಬ್ಳೆಯಂತಹ ಹಿರಿಯ ಆಟಗಾರರ ಅನುಪಸ್ಥತಿಯಲ್ಲಿ ವಿಕೆಟ್​ ಕೀಪರ್​ ಧೋನಿ ನೇತೃತ್ವದಲ್ಲಿ ಯುವ ತಂಡವನ್ನು ದಕ್ಷಿಣ ಆಫ್ರಿಕಾಗೆ ಕಳುಹಿಸಲಾಗಿತ್ತು. ಈ ಟೂರ್ನಿಯಲ್ಲಿ ಭಾರತ ತಂಡದಿಂದ ಚಾಂಪಿಯನ್​ ಪಟ್ಟವಿರಲಿ ಲೀಗ್​ನಲ್ಲಿ ಹೊರಬರದಿದ್ದರೆ ಸಾಕು ಎನ್ನುವಂತ ಪರಿಸ್ಥಿತಿ ಇತ್ತು. ಏಕೆಂದರೆ ಅದಾಗಲೇ ಏಕದಿನ ವಿಶ್ವಕಪ್​ನಲ್ಲಿ ಲೀಗ್​ ಹಂತದಲ್ಲೇ ಟೀಂ ಇಂಡಿಯಾ ಹೊರಬಿದ್ದಿತ್ತು.

ಕ್ಯಾಪ್ಟನ್​ ಕೂಲ್​ ಧೋನಿ

ಆದರೆ ಭಾರತದ ಯುವ ಪಡೆ ಇಡೀ ವಿಶ್ವವನ್ನೇ ಬೆರಗುಗೊಳಿಸುವಂತಹ ಪ್ರದರ್ಶನ ನೀಡಿತ್ತು. ಸ್ಕಾಟ್ಲೆಂಡ್ ವಿರುದ್ಧ​ ಮೊದಲ ಪಂದ್ಯ ಮಳೆಗೆ ಆಹುತಿಯಾಗಿತ್ತು. 2ನೇ ಪಂದ್ಯದಲ್ಲಿ ಪಾಕಿಸ್ತಾನದ ವಿರುದ್ಧ ಟೈ ಸಾಧಿಸಿ ಬಾಲ್​ ಔಟ್​ನಲ್ಲಿ ಜಯಗಳಿಸುವ ಮೂಲಕ ಸೂಪರ್​ 8 ಪ್ರವೇಶಿಸಿತ್ತು. ನಂತರ ಸೂಪರ್​ 8 ನಲ್ಲಿ ನ್ಯೂಜಿಲ್ಯಾಂಡ್​ ವಿರುದ್ಧ 10 ರನ್​ಗಳಿಂದ ಸೋತಿದ್ದ ಟೀಂ​ ಇಂಡಿಯಾ ನಂತರದ ಪಂದ್ಯದಲ್ಲಿ ಯುವರಾಜ್​ ಸಿಂಗ್(6 ಬಾಲಿಗೆ 6 ಸಿಕ್ಸರ್​)​ ಅಬ್ಬರದ ನೆರವಿನಿಂದ ಇಂಗ್ಲೆಂಡ್​ ವಿರುದ್ಧ 18 ರನ್​ಗಳಿಂದ, ದಕ್ಷಿಣ ಆಫ್ರಿಕಾ ವಿರುದ್ಧ 37 ರನ್​ಗಳಿಂದ ಜಯ ಸಾಧಿಸುವ ಮೂಲಕ ಸೆಮಿಫೈನಲ್​ ಪ್ರವೇಶ ಪಡೆದಿತ್ತು.

ಚಾಂಪಿಯನ್ನರ ಸಂಭ್ರಮ

ಆಸ್ಟ್ರೇಲಿಯಾ ವಿರುದ್ಧ 15 ರನ್​ಗಳ ಜಯ, ಫೈನಲ್​ಗೆ ಎಂಟ್ರಿ:

ಸೆಮಿಫೈನಲ್ ಪಂದ್ಯದಲ್ಲಿ ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಕಣಕ್ಕಿಳಿದಿದ್ದ ಭಾರತ ತಂಡ, ಮೊದಲು ಬ್ಯಾಟಿಂಗ್​ ನಡೆಸಿ 189 ರನ್​ಗಳ ಟಾರ್ಗೆಟ್​ ನೀಡಿತ್ತು. ಈ ಮೊತ್ತವನ್ನು ಬೆನ್ನೆತ್ತಿದ್ದ ಆಸ್ಟ್ರೇಲಿಯಾ 20 ಓವರ್​ಗಳಲ್ಲಿ 173 ರನ್ ​ಗಳಿಸಲಷ್ಟೇ ಶಕ್ತವಾಗಿ 15 ರನ್​ಗಳಿಂದ ಸೋಲನುಭವಿಸಿತ್ತು. ಈ ಪಂದ್ಯದಲ್ಲಿ ಕೇವಲ 35 ಎಸೆತಗಳಲ್ಲಿ 70 ರನ್ ​ಗಳಿಸಿದ್ದ ಯುವರಾಜ್​ ಸಿಂಗ್​ ಭಾರತದ ಗೆಲುವಿಗೆ ಕಾರಣರಾಗಿದ್ದರು.

ಫೈನಲ್​ನಲ್ಲಿ ಪಾಕ್​-ಭಾರತ ಮುಖಾಮುಖಿ

50 ಓವರ್​ಗಳ ವಿಶ್ವಕಪ್​ನಲ್ಲಿ ಲೀಗ್​ ಹಂತದಲ್ಲೇ ಹೊರಬಿದ್ದಿದ್ದ ಎರಡು ತಂಡಗಳು ಫೈನಲ್​ ಪ್ರವೇಶಿಸಿದ್ದವು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್​ ನಡೆಸಿದ್ದ ಭಾರತ ಗಂಭೀರ್​ ಅವರ 75 ರನ್​ಗಳ ನೆರವಿನಿಂದ 157 ರನ್ ​ಗಳಿಸಿತ್ತು. ಈ ಮೊತ್ತವನ್ನು ಬೆನ್ನತ್ತಿದ ಪಾಕಿಸ್ತಾನ 152 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ 5 ರನ್​ಗಳಿಂದ ಸೋಲನ್ನಪ್ಪಿತ್ತು. ಭಾರತ ಚೊಚ್ಚಲ ಟಿ20 ವಿಶ್ವಕಪ್​ ಎತ್ತಿ ಹಿಡಿದಿತ್ತು.

• This day, in 2⃣0⃣0⃣7⃣#TeamIndia were crowned World T20 Champions 😎🇮🇳 pic.twitter.com/o7gUrTF8XN

  — BCCI (@BCCI) September 24, 2019 " class="align-text-top noRightClick twitterSection" data="

  This day, in 2⃣0⃣0⃣7⃣#TeamIndia were crowned World T20 Champions 😎🇮🇳 pic.twitter.com/o7gUrTF8XN

  — BCCI (@BCCI) September 24, 2019

  ">

  This day, in 2⃣0⃣0⃣7⃣#TeamIndia were crowned World T20 Champions 😎🇮🇳 pic.twitter.com/o7gUrTF8XN

  — BCCI (@BCCI) September 24, 2019

ಕೊನೆಯ ಓವರ್​ನಲ್ಲಿ ಮಿಸ್ಬಾ ಎಡವಟ್ಟು, ಭಾರತಕ್ಕೆ ವಿಶ್ವಕಪ್

ಕೊನೆಯ ಓವರ್​ನಲ್ಲಿ ಪಾಕಿಸ್ತಾನಕ್ಕೆ 13 ರನ್​ಗಳ ಅವಶ್ಯಕತೆಯಿತ್ತು. ಮಿಸ್ಬಾ ಉಲ್​ ಹಕ್​ 37 ರನ್​ ಗಳಿಸಿ ಕ್ರೀಸ್​ನಲ್ಲಿದ್ದರು. ಧೋನಿ ಅನಾನುಭವಿ ಜೋಗಿಂದರ್​ ಶರ್ಮಾಗೆ ಚೆಂಡು ನೀಡಿದ್ದರು. ಶರ್ಮಾ ಮೊದಲ ಎಸೆತವನ್ನು ವೈಡ್​ ಮಾಡಿದ್ದರಿಂದ ಗೆಲ್ಲಲು 12 ರನ್​ ಅಗತ್ಯವಿತ್ತು, ಮೊದಲ ಎಸೆತವನ್ನು ಡಾಟ್​ ಮಾಡಿದ್ದ ಮಿಸ್ಬಾ ಎರಡನೇ ಎಸೆತವನ್ನು ಸಿಕ್ಸರ್​ಗೆಗಟ್ಟಿದ್ದರು. ಆಗ ಪಾಕ್​ಗೆ ಗೆಲ್ಲಲು 4 ಎಸೆತಗಳಲ್ಲಿ 6 ರನ್​ಗಳ ಅಗತ್ಯವಿತ್ತು. ಆದರೆ ಮಿಸ್ಬಾ ಫೈನ್​ಲೆಗ್​ನಲ್ಲಿ ಸ್ಕೂಪ್​ ಶಾಟ್​ ಮೂಲಕ ಎಡವಟ್ಟು ಮಾಡಿಕೊಂಡರು. ಆ ಚೆಂಡು ಬೌಂಡರಿ ಸೇರುವ ಬದಲು ಶ್ರೀಶಾಂತ್​ ಕೈಸೇರಿತ್ತು. ಈ ಮೂಲಕ ಪಾಕಿಸ್ತಾನ ಸೇರಬೇಕಿದ್ದ ಚೊಚ್ಚಲ ಟಿ20 ವಿಶ್ವಕಪ್​ ಭಾರತೀಯರ ಕೈಸೇರಿತ್ತು.

ಈ ವಿಶ್ವಕಪ್​ ಭಾರತಕ್ಕೆ ಕೇವಲ ವಿಶ್ವಕಪ್​ ಮಾತ್ರ ತಂದುಕೊಡಲಿಲ್ಲ, ಭಾರತ ತಂಡಕ್ಕೆ ಧೋನಿಯಂತ ಚಾಣಾಕ್ಷ ನಾಯಕನನ್ನು ಕ್ರಿಕೆಟ್​ ಜಗತ್ತಿಗೆ ತೋರಿಸಿಕೊಟ್ಟಿತು. ಮುಂದೆ ಭಾರತ ತಂಡ ಎಲ್ಲಾ ಮಾದರಿಯ ಕ್ರಿಕೆಟ್​ನಲ್ಲಿ ವಿಶ್ವದ ಬಲಿಷ್ಠ ತಂಡವಾಗಿ ಬೆಳೆಯಲು ನಾಂದಿಹಾಡಿತು.​