ಸೂರತ್: ಅತ್ಯಂತ ರೋಚಕವಾಗಿ ಸಾಗಿದ ಸೈಯದ್ ಮುಷ್ತಾಕ್ ಅಲಿ ಟೂರ್ನಿಯ ಉಪಾಂತ್ಯ ಇಂದು ನಡೆಯಲಿದೆ. ಹಾಲಿ ಚಾಂಪಿಯನ್ ಕರ್ನಾಟಕ ಹಾಗೂ ದಕ್ಷಿಣದ ಮತ್ತೊಂದು ಬಲಿಷ್ಠ ತಂಡ ತಮಿಳುನಾಡು ಮುಖಾಮುಖಿಯಾಗಲಿವೆ.
ಕೆಲ ತಿಂಗಳ ಹಿಂದೆ ನಡೆದ ವಿಜಯ್ ಹಜಾರೆ ಟ್ರೋಫಿ ಫೈನಲ್ನಲ್ಲೂ ಇದೇ ತಂಡಗಳು ಎದುರಾಗಲಿವೆ. ಈ ವೇಳೆ ಕರ್ನಾಟಕ ತಂಡ ಪ್ರಶಸ್ತಿಗೆ ಮುತ್ತಿಕ್ಕಿತ್ತು. ಆದರೆ, ಈ ಸೇಡನ್ನು ತೀರಿಸಲು ತಮಿಳುನಾಡು ತಂಡಕ್ಕೆ ಅವಕಾಶ ದೊರೆತಿದ್ದು ಪಂದ್ಯದ ಕುತೂಹಲ ಹೆಚ್ಚಿಸಿದೆ.
ಕರ್ನಾಟಕ ತಂಡದ ಬ್ಯಾಟಿಂಗ್ ಅತ್ಯಂತ ಬಲಿಷ್ಠವಾಗಿದೆ. ಮೊದಲ ಬ್ಯಾಟಿಂಗ್ ಇಲ್ಲವೇ ಚೇಸಿಂಗ್ನಲ್ಲಿ ಮನೀಷ್ ಪಾಂಡೆ ತಂಡಕ್ಕೆ ತಮಿಳುನಾಡು ದಿಟ್ಟ ಹೋರಾಟ ನೀಡುವುದು ಅಸಾಧ್ಯ. ಆದರೆ, ತಮಿಳುನಾಡು ಬೌಲಿಂಗ್ ವಿಭಾಗದಲ್ಲಿ ಉತ್ತಮವಾಗಿದೆ. ಎದುರಾಳಿ ತಂಡವನ್ನು ಅಲ್ಪ ಮೊತ್ತಕ್ಕೆ ಕಟ್ಟಿಹಾಕಿದರೆ ಗೆಲುವು ಸಾಧ್ಯ.
ಇವರೇ ಕರ್ನಾಟಕದ ಶಕ್ತಿ: ಆರಂಭಿಕ ಆಟಗಾರರಾದ ದೇವದತ್ ಪಡಿಕ್ಕಲ್ ಹಾಗೂ ಕೆ ಎಲ್ ರಾಹುಲ್ ಅದ್ಭುತ ಫಾರ್ಮ್ನಲ್ಲಿದ್ದಾರೆ. ಸೆಮೀಸ್ನಲ್ಲೂ ಈ ಇಬ್ಬರು ಆಟಗಾರರು ಅಬ್ಬರಿಸಿದ್ದಾರೆ. 190ಕ್ಕೂ ಅಧಿಕ ರನ್ ಗುರಿಯನ್ನು ಆರಂಭಿಕರ ಸಹಾಯದಿಂದ 15 ಓವರ್‌ನೊಳಗೆ ಗೆದ್ದು ಬೀಗಿದ್ದಾರೆ. ವಿಜಯ್ ಹಜಾರೆ ಟೂರ್ನಿಯಲ್ಲಿ ಅತಿಹೆಚ್ಚು ರನ್ ಗಳಿಸಿದ್ದ ದೇವದತ್ ಪಡಿಕ್ಕಲ್(11 ಪಂದ್ಯದಿಂದ 548 ರನ್), ಸದ್ಯ ಈ ಟೂರ್ನಿಯಲ್ಲೂ ಮುಂಚೂಣಿಯಲ್ಲಿದ್ದಾರೆ. ಇವರ ಜೊತೆಗೆ ನಾಯಕ ಮನೀಷ್ ಪಾಂಡೆ, ಮಯಾಂಕ್ ಅಗರ್ವಾಲ್ ಉತ್ತಮವಾಗಿ ಬ್ಯಾಟ್ ಬೀಸಬಲ್ಲರು.
ತಮಿಳುನಾಡು ಹೇಗಿದೆ?: ಸೂಪರ್ ಲೀಗ್ನಲ್ಲಿ ಕರ್ನಾಟಕದ ವಿರುದ್ಧ ಸೋತಿದ್ದ ತಮಿಳುನಾಡು ಫೈನಲ್ನಲ್ಲಿ ಇದೇ ಸೇಡು ತೀರಿಸಲು ಮುಂದಾಗಿದೆ. ಸಾಯಿ ಕಿಶೋರ್(20 ವಿಕೆಟ್), ಎಂ.ಸಿದ್ಧಾರ್ಥ್, ಮುರುಗನ್ ಅಶ್ವಿನ್ ಬೌಲಿಂಗ್ನಲ್ಲಿ ಮಿಂಚು ಹರಿಸಿದ್ದಾರೆ. ಜೊತೆಯಲ್ಲಿ ಆಲ್ರೌಂಡರ್ ವಾಷಿಂಗ್ಟನ್ ಸುಂದರ್ ಸಹ ವಿಕೆಟ್ ಕೀಳುವ ಸಾಮರ್ಥ್ಯ ಹೊಂದಿದ್ದಾರೆ. ಬ್ಯಾಟಿಂಗ್ನಲ್ಲಿ ನಾಯಕ ದಿನೇಶ್ ಕಾರ್ತಿಕ್, ಶಾರುಖ್ ಖಾನ್, ವಿಜಯ್ ಶಂಕರ್ ಬಲ ತುಂಬಲಿದ್ದಾರೆ.
