ಮೆಲ್ಬೋರ್ನ್: ತಮ್ಮ ವೃತ್ತಿಜೀವನದ ಅಂತ್ಯಕ್ಕೂ ಮೊದಲು ಪ್ರತಿಸ್ಪರ್ಧಿ ಇಂಗ್ಲೆಂಡ್ ಅನ್ನು ಅವರದೇ ನೆಲದಲ್ಲಿ ಸೋಲಿಸುವುದು ಮತ್ತು ಭಾರತದಲ್ಲಿ ಟೆಸ್ಟ್ ಯಶಸ್ಸನ್ನು ಸಾಧಿಸುವುದು ಈ ಎರಡು ದೊಡ್ಡ ಪರ್ವತಗಳನ್ನು ಏರಲು ಬಯಸುತ್ತೇನೆ ಎಂದು ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟೀವ್ ಸ್ಮಿತ್ ಹೇಳಿದ್ದಾರೆ.
ಕಳೆದ ವರ್ಷ ಇಂಗ್ಲೆಂಡ್‌ನಲ್ಲಿ ಆ್ಯಶಸ್ ಅನ್ನು 2-2ರ ಸಮಬಲದೊಂದಿಗೆ ಆಸ್ಟ್ರೇಲಿಯಾ ಉಳಿಸಿಕೊಂಡಿತ್ತು. ಆದರೆ ಓವಲ್‌ನಲ್ಲಿ ನಡೆದ ಕೊನೆಯ ಟೆಸ್ಟ್‌ನಲ್ಲಿನ ಸೋಲು ಕಂಡಿತ್ತು. ಸ್ಮಿತ್ ನಾಲ್ಕು ಟೆಸ್ಟ್‌ಗಳಲ್ಲಿ 110.57 ಸರಾಸರಿಯಲ್ಲಿ 774 ರನ್ ಗಳಿಸಿ ಸರಣಿ ಶ್ರೇಷ್ಠ ಪ್ರದರ್ಶನ ತೋರಿದ್ದರು.
31 ವರ್ಷದ ಸ್ಮಿತ್ 2017 ರಲ್ಲಿ ಭಾರತದಲ್ಲಿ ನಡೆದ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಮೂರು ಶತಕಗಳನ್ನು ಗಳಿಸಿದ್ದರು. ಆದರೆ, ಆಸ್ಟ್ರೇಲಿಯಾ 1-2 ಅಂತರದಲ್ಲಿ ಸೋಲನುಭವಿಸಿತ್ತು.
ಆ ಎರಡು ದೊಡ್ಡ ಪರ್ವತಗಳನ್ನು ಏರಬೇಕಿದೆ. ಒಂದು ವೇಳೆ ಅದು ನಿಜವಾದರೆ ನಿಜಕ್ಕೂ ಅದು ನನಗೆ ವಿಶೇಷವಾದದ್ದು. ಈ ಬಗ್ಗೆ ನಾನು ಆಶಾದಾಯಕವಾಗಿದ್ದು, ಏನಾನುತ್ತದೆ ಕಾದು ನೋಡಬೇಕೆಂದು Cricket.com.au ಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.
ನನಗೆ ಈಗಾಗಲೇ ವಯಸ್ಸಾಗುತ್ತಿದೆ. ಇನ್ನು ಎಷ್ಟು ಸಮಯ ಉಳಿದಿದೆ ಎಂದು ತಿಳಿದಿಲ್ಲ. ಭವಿಷ್ಯದ ಬಗ್ಗೆ ಅರಿವಿಲ್ಲ. ಆದರೆ ಇದು ಖಂಡಿತವಾಗಿಯೂ ಶ್ರಮಿಸಬೇಕಾದ ಸಂಗತಿಯಾಗಿದೆ. ಅದಂತು ಸತ್ಯವೆಂದು ತಮ್ಮ ಮನದಾಳ ವ್ಯಕ್ತಪಡಿಸಿದ್ದಾರೆ.
