ಅಹ್ಮದಾಬಾದ್: ಸ್ಪಿನ್ ಬೌಲಿಂಗ್ ದಾಳಿ ಎದುರಿಸಲಾಗದೆ ಪ್ರವಾಸಿ ಇಂಗ್ಲೆಂಡ್ ತಂಡ ಮೂರನೇ ಟೆಸ್ಟ್ನಲ್ಲಿ ಕೇವಲ 2 ದಿನದಲ್ಲೇ ಭಾರತಕ್ಕೆ ಶರಣಾಗಿತ್ತು. ಈ ಪಂದ್ಯದ ನಂತರ ಕೆಲವು ಮಾಜಿ ಕ್ರಿಕೆಟಿಗರು ಪಿಚ್ ಬಗ್ಗೆ ತೀವ್ರ ಟೀಕಾಪ್ರಹಾರ ನಡೆಸಿದ್ದರು. ಈ ಕುರಿತು ಕೊನೆಗೂ ಮೌನ ಮುರಿದಿರುವ ಟೀಮ್ ಇಂಡಿಯಾ ನಾಯಕ ಕೊಹ್ಲಿ, ಸ್ಪಿನ್ನಿಂಗ್ ಟ್ರ್ಯಾಕ್ ಎಂದು ಟೀಕಿಸುವುದನ್ನು ನಿಲ್ಲಿಸಿ, ತಮ್ಮ ಆಟವನ್ನು ಉತ್ತಮಗೊಳಿಸುವತ್ತ ಗಮನ ನೀಡಬೇಕೆಂದು ಸಲಹೆ ನೀಡಿದ್ದಾರೆ.
ಮೊಟೆರಾದಲ್ಲಿ ನಡೆದ ಪಿಂಕ್ಬಾಲ್ ಟೆಸ್ಟ್ನಲ್ಲಿ ಇಂಗ್ಲೆಂಡ್ ತಂಡ ಭಾರತೀಯ ಸ್ಪಿನ್ ದಾಳಿಗೆ ನಲುಗಿ 112 ಮತ್ತು 81 ರನ್ಗಳಿಗೆ ಆಲೌಟ್ ಆಗಿತ್ತು. ಇದಕ್ಕೂ ಮುನ್ನ ಚೆನ್ನೈನ 2ನೇ ಟೆಸ್ಟ್ನಲ್ಲಿ 134 ಮತ್ತು 164 ರನ್ಗಳಿಗೆ ಆಲೌಟ್ ಆಗಿತ್ತು. ಇವೆರಡು ಪಂದ್ಯಗಳ ನಂತರ ಭಾರತೀಯ ಪಿಚ್ಗಳ ಬಗ್ಗೆ ಕೆಲವು ಟೀಕೆಗಳು ಕೇಳಿಬಂದಿದ್ದವು. ಆದರೆ ಈ ಕುರಿತು ಪಂದ್ಯಕ್ಕೂ ಮುನ್ನ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿರುವ ಕೊಹ್ಲಿ, "ಸ್ಪಿನ್ ಟ್ಟ್ಯಾಕ್ ಬಗ್ಗೆ ಯಾವಾಗಲೂ ಹೆಚ್ಚಿನ ಮಾತುಗಳು ಮತ್ತು ಹೆಚ್ಚಿನ ಸಂಭಾಷಣೆ ಇದ್ದೇ ಇರುತ್ತದೆ" ಎಂದಿದ್ದಾರೆ.
"ನಮ್ಮ ಮಾಧ್ಯಮಗಳು ಕೇವಲ ಸ್ಪಿನ್ ಟ್ರ್ಯಾಕ್‌ಗಳನ್ನು ಮಾತ್ರ ಟೀಕಿಸುವುದು ಅನ್ಯಾಯವೆಂದು ನನಗನ್ನಿಸುತ್ತಿದೆ. ನನ್ನ ಪ್ರಕಾರ ಯಾವುದೇ ಪಿಚ್ಗಳ ಬಗ್ಗೆಯಾದರೂ ಸಮತೋಲಿತ ಸಂಭಾಷಣೆ ನಡೆಯಬೇಕು" ಎಂದು ಮೂರನೆಯ ಟೆಸ್ಟ್‌ನ ಕೊನೆಯಲ್ಲಿ ಕೊಹ್ಲಿ, ಮೊಟೆರಾ ಪಿಚ್ ಬಗ್ಗೆ ದೂಷಿಸದೆ, ಬ್ಯಾಟ್ಸ್ಮನ್ಗಳ ತಂತ್ರವನ್ನು ದೂಷಿಸಿದ್ದರು.
ಇದನ್ನೂ ಓದಿ:ಸರಣಿ ಡ್ರಾ ಮಾಡಿಕೊಂಡರೆ ಅದು ನನ್ನ ಕ್ರಿಕೆಟ್ ಜೀವನದ ಅತ್ಯುತ್ತಮ ಸಾಧನೆ: ರೂಟ್
ಇಂದೂ ಕೂಡ ಪಿಚ್ ಬಗ್ಗೆ ಸಮರ್ಥನೆ ಮಾಡಿಕೊಂಡಿರುವ ಅವರು, " ನಮ್ಮ ಮಾಧ್ಯಮಗಳು ಯಾವಾಗಲೂ ಸ್ಪಿನ್ ಪಿಚ್ಗಳ ವಿರುದ್ಧ ಸುದ್ದಿ ಮಾಡುವುದು ದುರದೃಷ್ಟಕರ. ಇದೇ ಪಿಚ್ನಲ್ಲಿ 4ನೇ ದಿನ ಅಥವಾ 5ನೇ ಪಂದ್ಯ ಮುಗಿದರೆ ಯಾರೂ ಏನನ್ನೂ ಹೇಳುವುದಿಲ್ಲ, ಆದರೆ 2 ದಿನದಲ್ಲಿ ಪಂದ್ಯ ಮುಗಿದರೆ ಪ್ರತಿಯೊಬ್ಬರು ಪಿಚ್ ಬಗ್ಗೆ ಟೀಕೆ ಮಾಡುತ್ತಾರೆ" ಎಂದು ಕೊಹ್ಲಿ ಹೇಳಿದ್ದಾರೆ.
ನ್ಯೂಜಿಲ್ಯಾಂಡ್ ವಿರುದ್ಧ ಭಾರತ ತಂಡ 3 ದಿನಗಳಲ್ಲಿ ಪಂದ್ಯವನ್ನು ಸೋತ ಸಂದರ್ಭದಲ್ಲಿ ಎಲ್ಲರೂ ಬ್ಯಾಟ್ಸ್ಮನ್ಗಳ ತಂತ್ರಗಾರಿಕೆಯನ್ನು ಪ್ರಶ್ನಿಸಿದ್ದರೆ ಹೊರತೂ ಯಾರೊಬ್ಬರೂ ಸೀಮ್ ಪಿಚ್ ಬಗ್ಗೆ ಟೀಕೆ ಮಾಡಿರಲಿಲ್ಲ ಎಂಬುದನ್ನು ಕೊಹ್ಲಿ ನೆನಪಿಸಿಕೊಂಡಿದ್ದಾರೆ.
" ನಾವು ಕೇವಲ 36 ಓವರ್ಗಳಲ್ಲಿ ನ್ಯೂಜಿಲ್ಯಾಂಡ್ ವಿರುದ್ಧ ಸೋಲು ಕಂಡಿದ್ದೆವು. ಆಗ ಯಾರೊಬ್ಬರು ಪಿಚ್ ಬಗ್ಗೆ ಬರೆದಿರಲಿಲ್ಲ ಎಂಬುದು ನನಗೆ ಖಾತ್ರಿಯಿದೆ. ಅಂದು ಪಿಚ್ ಬಗ್ಗೆ ಟೀಕಿಸಿರಲಿಲ್ಲ, ಯಾರೊಬ್ಬರು ಪಿಚ್ ನೋಡಲು ಮುಂದೆ ಬರಲಿಲ್ಲ, ಅಲ್ಲಿ ಚೆಂಡು ಎಷ್ಟು ಚಲಿಸುತ್ತಿತ್ತು, ಪಿಚ್ ಮೇಲೆ ಹುಲ್ಲು ಎಷ್ಟು ಬೆಳೆದಿತ್ತು ಎಂಬುದನ್ನು ಯಾರೂ ಕೇಳಿರಲಿಲ್ಲ" ಎಂದು ಕೊಹ್ಲಿ ಮೊಟೆರಾ ಪಿಚ್ ಟೀಕಿಸಿದವರಿಗೆ ತಿರುಗೇಟು ನೀಡಿದ್ದಾರೆ.
ತಮ್ಮ ತಂಡವು ಅವರ ಪಿಚ್ ಬಗ್ಗೆ ದೂರು ನೀಡುವ ಬದಲು ಅಲ್ಲಿನ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಲು ಪ್ರಯತ್ನಿಸುತ್ತದೆ. ಮತ್ತು ಅಲ್ಲಿ ಆಟವನ್ನು ಮುಂದುವರಿಸಲು ಬಯಸುತ್ತದೆ. ಇದೇ ನಮ್ಮತಂಡದ ಯಶಸ್ಸಿಗೆ ಕಾರಣ ಎಂದಿದ್ದಾರೆ.
ಇದನ್ನೂ ಓದಿ: ಪೂಜಾರ ಬಗ್ಗೆ ಟೀಕೆ ಸರಿಯಲ್ಲ, ಆತ ವಿಶ್ವದರ್ಜೆಯ ಬ್ಯಾಟ್ಸ್ಮನ್: ವಿರಾಟ್ ಕೊಹ್ಲಿ
