ಮುಂಬೈ: ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ 2021ರ ಐಪಿಎಲ್ ಭಾರತದಲ್ಲೇ ನಡೆಸುವ ವಿಶ್ವಾಸ ಹೊಂದಿದ್ದಾರೆ. ಆದರೆ ಈ ವರ್ಷ ನಡೆಯಬೇಕಿದ್ದ ಮೆಗಾ ಐಪಿಎಲ್ ಆ್ಯಕ್ಷನ್ ಬಗ್ಗೆ ಯಾವುದೇ ತೀರ್ಮಾನ ತೆಗೆದುಕೊಂಡಿಲ್ಲ ಎಂದು ದಾದಾ ತಿಳಿಸಿದ್ದಾರೆ.
ಐಪಿಎಲ್ ಆಯೋಜನೆಗೊಳ್ಳುವ ವೇಳೆಗೆ ಕೋವಿಡ್-19 ವ್ಯಾಕ್ಸಿನ್ ಬರುವ ಸಾಧ್ಯತೆ ಇದೆ. ಹಾಗಾಗಿ 2021ರ ಐಪಿಎಲ್ಅನ್ನು ಭಾರತದಲ್ಲೇ ಆಯೋಜನೆ ಮಾಡಬಹುದು ಎಂದು ಬಿಸಿಸಿಐ ಬಾಸ್ ಸೌರವ್ ಗಂಗೂಲಿ ಹೇಳಿದ್ದಾರೆ.
ಭಾರತದಲ್ಲಿ ಕೋವಿಡ್-19 ಪ್ರಕರಣ ಹೆಚ್ಚಾಗಿದ್ದ ಕಾರಣ ಪ್ರಸ್ತುತ 13ನೇ ಐಪಿಎಲ್ ಆವೃತ್ತಿಯನ್ನು ಯುಎಇನಲ್ಲಿ ಆಯೋಜಿಸಲಾಗಿದೆ. ಈ ಟೂರ್ನಿ ಮಾರ್ಚ್ 29ರಂದೇ ಆರಂಭವಾಗಬೇಕಿತ್ತು. ಆದರೆ ಕೋವಿಡ್ ಕಾರಣ ಬಿಸಿಸಿಐನಿಂದ ಅನಿರ್ದಿಷ್ಟಾವಧಿಗೆ ಮುಂದೂಡಲಾಗಿತ್ತು.
"2021ರ ಆವೃತ್ತಿ ವೇಳೆಗೆ ದೇಶದಲ್ಲಿ ಕೋವಿಡ್-19 ವ್ಯಾಕ್ಸಿನ್ ಬಾರದಿದ್ದರೆ ಮುಂದಿನ ಆವೃತ್ತಿಗೂ ಯುಎಇ ಮತ್ತೊಂದು ಆಯ್ಕೆಯಾಗಿ ಉಳಿಯಲಿದೆ" ಎಂದು ಗಂಗೂಲಿ ಮಾಹಿತಿ ನೀಡಿದ್ದಾರೆ.
ಇದೇ ಸಂದರ್ಭದಲ್ಲಿ ಮೆಗಾ ಆ್ಯಕ್ಷನ್ ಬಗ್ಗೆ ಮಾತನಾಡಿ, ಚೆನ್ನೈ ಸೂಪರ್ ಕಿಂಗ್ಸ್ನಂತಹ ತಂಡ ಇಡೀ ತಂಡವನ್ನೇ ಬದಲಾವಣೆ ಮಾಡಲು ಬಯಸಿದೆ. ಆದರೆ ಸಂಪೂರ್ಣ ಪ್ರಮಾಣದ ಹರಾಜು ಪ್ರಕ್ರಿಯೆ ನಡೆಸಬೇಕೆ ಅಥವಾ ಐಪಿಎಲ್ಗೂ ಮುನ್ನ ಮಿನಿ ಹರಾಜು ಆಯೋಜನೆ ಮಾಡಬೇಕೆ ಎಂಬುದರ ಸ್ಪಷ್ಟನೆಗಾಗಿ ಇನ್ನಷ್ಟು ದಿನ ಕಾಯಬೇಕಿದೆ ಎಂದು ದಾದಾ ಖಾಸಗಿ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
