ಅಬುಧಾಬಿ: ಐಪಿಎಲ್ನ ಎಲಿಮಿನೇಟರ್ ಪಂದ್ಯದಲ್ಲಿ ವಿರಾಟ್-ವಾರ್ನರ್ ಪಡೆ ಮುಖಾಮುಖಿಯಾಗಿದ್ದು, ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿ ಆರ್ಸಿಬಿ ಎದುರಾಳಿ ತಂಡಕ್ಕೆ 132 ರನ್ಗಳ ಗೆಲುವಿನ ಟಾರ್ಗೆಟ್ ನೀಡಿದೆ.
ದೇವದತ್ ಪಡಿಕ್ಕಲ್ ಜತೆ ಸೇರಿ ಇನ್ನಿಂಗ್ಸ್ ಆರಂಭಿಸಿದ ವಿರಾಟ್ ಕೊಹ್ಲಿ ಕೇವಲ 6ರನ್ಗಳಿಕೆ ಮಾಡಿ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ದೇವದತ್ ಪಡಿಕ್ಕಲ್ ಕೂಡ ಕೇವಲ 1ರನ್ಗಳಿಕೆ ಮಾಡಿ ಜೇಸನ್ ಹೋಲ್ಡರ್ಗೆ ವಿಕೆಟ್ ಒಪ್ಪಿಸಿದರು. ಹೀಗಾಗಿ ತಂಡ ಪವರ್ ಪ್ಲೇ ಮುಕ್ತಾಯದ ವೇಳೆಗೆ (4 ಓವರ್ಗಳಲ್ಲಿ) 2ವಿಕೆಟ್ ಕಳೆದುಕೊಂಡು ಕೇವಲ 32ರನ್ಗಳಿಕೆ ಮಾಡಿತ್ತು.
ಇದಾದ ಬಳಿಕ ಒಂದಾದ ಫಿಂಚ್ ಹಾಗೂ ಡಿವಿಲಿಯರ್ಸ್ ತಂಡಕ್ಕೆ ಚೇತರಿಕೆ ನೀಡುವ ಯತ್ನ ಮಾಡಿದರು. ಹೀಗಾಗಿ ತಂಡ 10 ಓವರ್ಗಳಲ್ಲಿ 2ವಿಕೆಟ್ ಕಳೆದುಕೊಂಡು 54ರನ್ಗಳಿಕೆ ಮಾಡಿತು. ಆದರೆ 32ರನ್ಗಳಿಕೆ ಮಾಡಿದ ಫಿಂಚ್ ನದೀಂ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ಮೊಯಿನ್ ಅಲಿ ರನೌಟ್ ಬಲೆಗೆ ಬಿದ್ದರೆ, ಶಿವಂ ದುಬೆ 5ರನ್ಗಳಿಕೆ ಮಾಡಿದ್ದ ವೇಳೆ ಕ್ಯಾಚ್ ನೀಡಿ ನಿರ್ಗಮಿಸಿದರು.
ಇದಾದ ಬಳಿಕ ಬಂದ ವಾಷಿಂಗ್ಟನ್ ಸುಂದರ್(5)ರನ್ಗಳಿಕೆ ಮಾಡಿ ಕ್ಯಾಚ್ ನೀಡಿದರು. 56ರನ್ಗಳಿಕೆ ಮಾಡಿ ಆಡುತ್ತಿದ್ದ ಎಬಿಡಿ ನಟರಾಜನ್ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದರಿಂದ, ಆರ್ಸಿಬಿ ಕೊನೆ ಓವರ್ಗಳಲ್ಲಿ ಹೆಚ್ಚಿನ ರನ್ಗಳಿಕೆ ಮಾಡುವ ಆಸೆ ಈಡೇರಲಿಲ್ಲ. ಕೊನೆಯದಾಗಿ ಸಿರಾಜ್ ಅಜೇಯ 10ರನ್ ಹಾಗೂ ಸೈನಿ 9ರನ್ಗಳಿಕೆ ಮಾಡಿದ್ದರು. ತಂಡ 20 ಓವರ್ಗಳಲ್ಲಿ 7ವಿಕೆಟ್ ಕಳೆದುಕೊಂಡು 131ರನ್ಗಳಿಕೆ ಮಾಡಿದ್ದು, ಹೈದರಾಬಾದ್ ತಂಡಕ್ಕೆ 132ರನ್ ಟಾರ್ಗೆಟ್ ನೀಡಿದೆ.
ಹೈದರಾಬಾದ್ ತಂಡದ ಪರ ಹೋಲ್ಡರ್ 3 ವಿಕೆಟ್, ನಟರಾಜನ್ 2 ಹಾಗೂ ನದೀಂ 1 ವಿಕೆಟ್ ಪಡೆದುಕೊಂಡರು.
