ಹೈದರಾಬಾದ್: ಕೋವಿಡ್ ಕಾರಣದಿಂದಾಗಿ ಈ ವರ್ಷದ ಐಷಾರಾಮಿ ಕ್ರಿಕೆಟ್ ಟೂರ್ನಿ ಐಪಿಎಲ್ ದುಬೈನಲ್ಲಿ ನಡೆಯುತ್ತಿದೆ. ಆದರೆ, ಇದೇ ಮೊದಲ ಬಾರಿಗೆ ಐಪಿಎಲ್ನಲ್ಲಿ ಆ್ಯಂಟಿ ಡೋಪಿಂಗ್ ಟೆಸ್ಟ್ ನಡೆಸಲು ತೀರ್ಮಾನಿಸಲಾಗಿದೆ. ಇದಕ್ಕಾಗಿ 5 ಕಡೆಗಳಲ್ಲಿ ಡೋಪ್ ಕಂಟ್ರೋಲ್ ಸ್ಟೇಷನ್ ತೆರೆಯಲು ರಾಷ್ಟ್ರೀಯ ಡೋಪಿಂಗ್ ವಿರೋಧಿ ಸಂಸ್ಥೆ ನಿರ್ಧರಿಸಿದೆ.
ಇನ್ನು ಈಗಾಗಲೇ ದುಬೈನ ಶಾರ್ಜಾ ಮೈದಾನದಲ್ಲಿ ಒಂದು ಡೋಪ್ ಕಂಟ್ರೋಲ್ ಸ್ಟೇಷನ್ ಹಾಗೂ ಜಾಯೇದ್ ಮೈದಾನದಲ್ಲಿ 2 ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ. ಇನ್ನು ಆಟಗಾರರು ಅಭ್ಯಾಸ ನಡೆಸುವ ವೇಳೆ ಮಾತ್ರ ಡೋಪಿಂಗ್ ಟೆಸ್ಟ್ ನಡೆಸಲು ನಾಡಾ ತೀರ್ಮಾನಿಸಿದೆ ಎಂದು ಪ್ರಧಾನ ನಿರ್ದೇಶಕ ನವಿನ್ ಅಗರ್ವಾಲ್ ತಿಳಿಸಿದ್ದಾರೆ.
ಇನ್ನು ಮಹಾಮೇಳದಲ್ಲಿ ಒಟ್ಟು 50 ಆಟಗಾರರ ಮಾದರಿ ಸಂಗ್ರಹಿಸಲಾಗಿದ್ದು, ಅಗತ್ಯಬಿದ್ದಲ್ಲಿ ಆಟಗಾರರ ರಕ್ತದ ಮಾದರಿಯನ್ನೂ ಸಂಗ್ರಹಿಸಲು ನಾಡಾ ಮುಂದಾಗಲಿದೆ ಎಂದಿದ್ದಾರೆ. ಐಪಿಎಲ್-13ನ ಪ್ರಮುಖ ಆಟಗಾರರಾದ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಮತ್ತು ಧೋನಿ ಸಹ ಡೋಪಿಂಗ್ ಟೆಸ್ಟ್ಗೆ ಒಳಗಾಗಲಿದ್ದಾರೆ.
2019ರ ಬಳಿಕ ಬಿಸಿಸಿಐ ಸಹ ನಾಡಾ ವ್ಯಾಪ್ತಿಯೊಳಗೆ ಬಂದಿದ್ದು, ಇದೀಗ ಮೊದಲ ಬಾರಿಗೆ ಐಪಿಎಲ್ ಆಟಗಾರರಿಗೂ ಉದ್ದೀಪನ ಮದ್ದು ಸೇವನಾ ಪರೀಕ್ಷೆ ನಡೆಸಲು ನಿರ್ಧರಿಸಲಾಗಿದೆ.
