ಕರಾಚಿ: ವಿರಾಟ್ ಕೊಹ್ಲಿ ಅವರ ದಾಖಲೆಗಳೇ ಅವರ ಸಾಮರ್ಥ್ಯವನ್ನು ಸಾಬೀತು ಪಡಿಸುತ್ತವೆ ಎಂದು ಹಿರಿಯ ಪಾಕ್ ಕ್ರಿಕೆಟ್ ಪಟು ಜಾವೇದ ಮಿಯಾಂದಾದ್ ಹೇಳಿದ್ದಾರೆ. ಕೊಹ್ಲಿ ಬ್ಯಾಂಟಿಂಗ್ 'ಕ್ಲಾಸಿ' ಎಂದು ಮಿಯಾಂದಾದ್ ಬಾಯ್ತುಂಬ ಹೊಗಳಿದ್ದಾರೆ.
ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಮಾತನಾಡಿರುವ ಮಿಯಾಂದಾದ್, ಪ್ರಸ್ತುತ ಭಾರತ ಕ್ರಿಕೆಟ್ ತಂಡದ ಪ್ರತಿಭಾ ಸಾಮರ್ಥ್ಯದ ಬಗ್ಗೆ ಸಾಕಷ್ಟು ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
'ಈಗ ಭಾರತೀಯ ಕ್ರಿಕೆಟ್ ತಂಡದಲ್ಲಿರುವವರಲ್ಲಿ ನಿಮಗೆ ಫೇವರಿಟ್ ಯಾರು ಎಂದು ಕೇಳಿದರೆ ನಾನು ಕೊಹ್ಲಿ ಅವರ ಬೆಂಬಲಕ್ಕೆ ನಿಲ್ಲುತ್ತೇನೆ. ಅವರ ಸಾಮರ್ಥ್ಯದ ಬಗ್ಗೆ ನಾನೇನೂ ಹೇಳಬೇಕಿಲ್ಲ. ಅವರ ದಾಖಲೆಗಳು, ಅದರಲ್ಲಿನ ಅಂಕಿ-ಅಂಶಗಳೇ ಎಲ್ಲವನ್ನೂ ಹೇಳುತ್ತವೆ. ಸೌತ್ ಆಫ್ರಿಕಾ ಪ್ರಯಾಣದಲ್ಲಿ ವಿರಾಟ್ ತುಂಬಾ ಅದ್ಭುತ ಆಟ ಪ್ರದರ್ಶಿಸಿದ್ದಾರೆ. ಅಲ್ಲಿಯೂ ಶತಕ ಬಾರಿಸಿರುವ ವಿರಾಟ್ ವೇಗದ ಬೌಲಿಂಗ್, ಪುಟಿಯುವ ಪಿಚ್ ಅಥವಾ ಸ್ಪಿನ್ನರ್ಗಳು ಯಾವುದಕ್ಕೂ ಹೆದರಲಾರರು.' ಎಂದು ಮಿಯಾಂದಾದ್ ತಿಳಿಸಿದ್ದಾರೆ.
