ಹೈದರಾಬಾದ್ : ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ತಮ್ಮ ಖ್ಯಾತಿಗೆ ತಕ್ಕಂತೆ 13ನೇ ಪಂದ್ಯದಲ್ಲಿ ಆಡಿದ್ದು, ಎಂದಿನಂತೆ ಯಾವ ತಂಡಕ್ಕೂ ಸರಿಸಾಟಿಯಿಲ್ಲದ ಪ್ರದರ್ಶನದ ಮೂಲಕ ಪ್ರಾಬಲ್ಯ ಸಾಧಿಸಿ ಅಗ್ರಸ್ಥಾನ ಪಡೆದಿದ್ದಲ್ಲದೆ, 6ನೇ ಬಾರಿ ಫೈನಲ್ ಪ್ರವೇಶಿಸಿದೆ. ಈಗಾಗಲೇ 4 ಪ್ರಶಸ್ತಿಗಳನ್ನ ಗೆಲ್ಲುವ ಮೂಲಕ ಹೆಚ್ಚು ಟ್ರೋಫಿ ಗೆದ್ದಿರುವ ತಂಡ ಎಂದು ಖ್ಯಾತಿ ಹೊಂದಿರುವ ಮುಂಬೈ ದಾಖಲೆಯ 5ನೇ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿದೆ.
ಅತ್ತ ಮತ್ತೊಂದು ಕಡೆ ನೋಡಿದ್ರೆ, ಮುಂಬೈನವರೇ ಆದ ಯುವ ಆಟಗಾರ ಶ್ರೇಯಸ್ ಅಯ್ಯರ್ ಡೆಲ್ಲಿ ತಂಡ ಮುನ್ನಡೆಸಲಿದ್ದಾರೆ. ಮಂಗಳವಾರ ಈ ಎರಡು ತಂಡಗಳು ಫೈನಲ್ನಲ್ಲಿ ಮೊದಲ ಬಾರಿಗೆ ಮುಖಾಮುಖಿಯಾಗುತ್ತಿವೆ. ಇದರಲ್ಲಿ ಮುಂಬೈ ಇಂಡಿಯನ್ಸ್ ಗೆಲ್ಲುವ ನೆಚ್ಚಿನ ತಂಡ ಎಂದು ಹೇಳಿದ್ರೆ ಅತಿಶಯೋಕ್ತಿಯಲ್ಲ. ಎದುರಾಳಿ ತಂಡವನ್ನು ಒತ್ತಡಕ್ಕೀಡು ಮಾಡಿ 5ನೇ ಬಾರಿ ಪ್ರಶಸ್ತಿ ಎತ್ತಿ ಹಿಡಿಯಲು ಮುಂಬೈ ಕಾತುರದಿಂದ ಕಾಯುತ್ತಿದೆ.
13ನೇ ಆವೃತ್ತಿಯಲ್ಲಿ ಮುಂಬೈ ಪಯಣದ ಕಡೆ ಒಮ್ಮೆ ಕಣ್ಣಾಯಿಸಿದ್ರೆ, ಹಿಂದಿನ ಲೀಗ್ಗಳಂತೆ ಮೊದಲ ಒಂದೆರಡು ಪಂದ್ಯಗಳಲ್ಲಿ ಸೋಲು ಕಂಡಿದೆ. ಆದರೆ, ಮಧ್ಯಂತರ ಮತ್ತು ಕೊನೆಯ ನಾಲ್ಕು ಪಂದ್ಯಗಳಲ್ಲಿ ಯಾವುದೇ ಒತ್ತಡವಿಲ್ಲದೆ ಪ್ರಾಬಲ್ಯ ಮೆರೆದು ಗೆಲುವು ಸಾಧಿಸಿದೆ. ಮುಂಬೈ ಗುಂಪು ಹಂತದಲ್ಲಿ 14 ಪಂದ್ಯಗಳಲ್ಲಿ 5 ಸೋಲು 9 ಗೆಲುವಿನೊಂದಿಗೆ 18 ಅಂಕ ಪಡೆದು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿತ್ತು. ಸೋತ 5 ಪಂದ್ಯಗಳಲ್ಲಿ 2 ಸೂಪರ್ ಓವರ್ ಸೋಲು ಎನ್ನುವುದೇ ಗಮನಾರ್ಹ.
ಐಪಿಎಲ್ನಲ್ಲಿ ಆರಂಭ : ಮುಂಬೈ ಉದ್ಘಾಟನಾ ಪಂದ್ಯದಲ್ಲೇ ಕಳೆದ ವರ್ಷದ ರನ್ನರ್ ಅಪ್ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸೆಣೆಸಾಡಿ 5 ವಿಕೆಟ್ಗಳ ಸೋಲು ಕಂಡಿತ್ತು. ನಂತರ ತಿರುಗಿ ಬಿದ್ದು ಕೆಕೆಆರ್ ವಿರುದ್ಧ 49ರನ್ಗಳ ಅಧಿಕಾರಯುತ ಗೆಲುವು ಸಾಧಿಸಿದ್ರೆ, 3ನೇ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ಸೂಪರ್ ಓವರ್ ಪಂದ್ಯದಲ್ಲಿ ಸೋಲನುಭವಿಸಿತ್ತು.
ಮತ್ತೆ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ 48 ರನ್ಗಳ ಬೃಹತ್ ಜಯ ಸಾಧಿಸಿದ ಮುಂಬೈ, ಅಲ್ಲಿಂದ ಸತತ ಗೆಲುವುಗಳ ಜೊತೆಗೆ ಅಗ್ರ 2 ಸ್ಥಾನದಲ್ಲೇ ಟೂರ್ನಿಯುದ್ದಕ್ಕೂ ಪಯಣಿಸಿತು. ಪಂಜಾಬ್ ವಿರುದ್ಧ ಮತ್ತೊಂದು ಸೂಪರ್ ಓವರ್ನಲ್ಲಿ ಸೋಲು ಕಂಡ್ರೆ, ರಾಜಸ್ಥಾನ್ ವಿರುದ್ಧ ಆಘಾತಕಾರಿ ಸೋಲು ಮಾತ್ರ ಮುಂಬೈ ತಂಡದ ಹೀನಾಯ ಪ್ರದರ್ಶನಕ್ಕೆ ಸಾಕ್ಷಿಯಾಗಿತ್ತು. ಅದನ್ನು ಬಿಟ್ಟರೆ ಔಪಚಾರಿಕವಾಗಿದ್ದ ಕೊನೆಯ ಲೀಗ್ನಲ್ಲಿ ಬುಮ್ರಾ-ಬೌಲ್ಟ್ ಅನುಪಸ್ಥಿತಿಯಲ್ಲಿ ಕಣಕ್ಕಿಳಿದು ಹೈದರಾಬಾದ್ ವಿರುದ್ಧ 10 ವಿಕೆಟ್ ಸೋಲು ಕಂಡಿತ್ತು. ಉಳಿದೆಲ್ಲಾ ಪಂದ್ಯಗಳಲ್ಲಿ ಅಧಿಕಾರಯುತ ಜಯ ಸಾಧಿಸಿತ್ತು.
ಪ್ಲೇ ಆಫ್ : ಅಗ್ರಸ್ಥಾನದಲ್ಲಿ ಗುಂಪು ಹಂತ ಮುಗಿಸಿದ ರೋಹಿತ್ ಬಳಗ ನಂತರ ಕ್ವಾಲಿಫೈಯರ್ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 58 ರನ್ಗಳ ಸುಲಭ ಜಯ ಸಾಧಿಸಿ ಫೈನಲ್ ಪ್ರವೇಶಿಸಿತು. ಬುಮ್ರಾ 4 ಮತ್ತು ಬೌಲ್ಟ್ 2 ವಿಕೆಟ್ ಪಡೆದು ಮಿಂಚಿದ್ರೆ, ಇಶಾನ್ ಕಿಶನ್ 30 ಎಸೆತಗಳಲ್ಲಿ 55 ರನ್ ಸಿಡಿಸಿ ಗೆಲುವಿನ ರೂವಾರಿಗಳಾಗಿದ್ದರು.
13ನೇ ಆವೃತ್ತಿಯಲ್ಲಿ ಮುಂಬೈ ತಂಡದ ಪಯಣ
- ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 5 ವಿಕೆಟ್ಗಳ ಸೋಲು
- ಕೆಕೆಆರ್ ವಿರುದ್ಧ 49 ರನ್ಗಳ ಜಯ
- ಆರ್ಸಿಬಿ ವಿರುದ್ಧ ಸೂಪರ್ ಓವರ್ನಲ್ಲಿ ಸೋಲು
- ಕಿಂಗ್ಸ್ಇಲೆವೆನ್ ಪಂಜಾಬ್ ವಿರುದ್ಧ 48 ರನ್ಗಳ ಜಯ
- ಹೈದರಾಬಾದ್ ವಿರುದ್ಧ 34 ರನ್ಗಳ ಜಯ
- ರಾಜಸ್ಥಾನ್ ರಾಯಲ್ಸ್ ವಿರುದ್ಧ 57 ರನ್ಗಳ ಜಯ
- ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 5 ವಿಕೆಟ್ ಜಯ
- ಕೆಕೆಆರ್ ವಿರುದ್ಧ 8 ವಿಕೆಟ್ ಜಯ
- ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ ಸೂಪರ್ ಓವರ್ನಲ್ಲಿ ಸೋಲು
- ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 10 ವಿಕೆಟ್ಗಳ ಗೆಲುವು
- ರಾಜಸ್ಥಾನ್ ರಾಯಲ್ಸ್ ವಿರುದ್ಧ 8 ವಿಕೆಟ್ಗಳ ಸೋಲು
- ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 9 ವಿಕೆಟ್ಗಳ ಜಯ
- ಹೈದರಾಬಾದ್ ವಿರುದ್ಧ 10 ವಿಕೆಟ್ಗಳ ಸೋಲು
- ಪ್ಲೇ ಆಫ್
- ಡೆಲ್ಲಿ ವಿರುದ್ಧ 58 ರನ್ಗಳ ಜಯ
