ಸಿಡ್ನಿ: ಸುದೀರ್ಘ ವಿಶ್ರಾಂತಿ ಬಳಿಕ ತನ್ನ ಮೊದಲ ಸರಣಿಗಾಗಿ ಆಸ್ಟ್ರೇಲಿಯಾ ಪ್ರವಾಸ ಕೈಗೊಂಡಿರುವ ಭಾರತಕ್ಕೆ ಗಾಯದ ಸಮಸ್ಯೆ ಬೆಂಬಿಡದ ಭೂತವಾಗಿ ಕಾಡುತ್ತಿದೆ. ಸರಣಿಗೂ ಮೊದಲೇ ಟಾಪ್ ಆಟಗಾರರು ಇಂಜುರಿಗೆ ತುತ್ತಾದರೆ, ಇದೀಗ ತಂಡದಲ್ಲಿರುವ ಆಟಗಾರರು ಒಬ್ಬಬ್ಬರಾಗಿ ಗಾಯದ ಪಟ್ಟಿಗೆ ಸೇರಿಕೊಳ್ಳುತ್ತಿರುವುದು ಟೀಮ್ ಇಂಡಿಯಾಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.
ಆಸೀಸ್ ಪ್ರವಾಸಕ್ಕೂ ಮೊದಲು 2018-19ರಲ್ಲಿ ಟೆಸ್ಟ್ ಸರಣಿ ಗೆಲ್ಲಲು ಪ್ರಮುಖ ಕಾರಣರಾಗಿದ್ದ ಇಶಾಂತ್ ಶರ್ಮಾ, ಭುವನೇಶ್ವರ್ ಕುಮಾರ್ ಐಪಿಎಲ್ ವೇಳೆ ಗಾಯಗೊಂಡು ಪ್ರವಾಸದಿಂದಲೇ ಹೊರಬಿದ್ದರು. ನಂತರ ಟೆಸ್ಟ್ ಸರಣಿ ಆರಂಭದಲ್ಲಿ ಮೊಹಮ್ಮದ್ ಶಮಿ, ನಂತರ ಉಮೇಶ್ ಯಾದವ್ ಕೂಡ ಗಾಯಕ್ಕೆ ಒಳಗಾಗಿ ಈಗಾಗಲೇ ಭಾರತಕ್ಕೆ ಮರಳಿದ್ದಾರೆ.
3ನೇ ಟೆಸ್ಟ್ಗೂ ಮುನ್ನ ಟೆಸ್ಟ್ ಕ್ರಿಕೆಟ್ಗೆ ಮರಳಲು ಕಾಯುತ್ತಿದ್ದ ಕನ್ನಡಿಗ ಕೆ.ಎಲ್.ರಾಹುಲ್ ಅಭ್ಯಾಸದ ವೇಳೆ ಮಣಿಕಟ್ಟು ಗಾಯಕ್ಕೆ ಒಳಗಾಗಿ 3 ವಾರಗಳ ಕಾಲ ವಿಶ್ರಾಂತಿಗೆ ತೆರಳಿದ್ದಾರೆ. ಅರ್ಧ ತಂಡದಷ್ಟು ಮಂದಿಯನ್ನು ಈಗಾಗಲೇ ಕಳೆದುಕೊಂಡಿರುವ ಭಾರತ ತಂಡಕ್ಕೆ 3ನೇ ಟೆಸ್ಟ್ನ 3ನೇ ದಿನ ಮತ್ತಿಬ್ಬರು ಟಾಪ್ ಪ್ಲೇಯರ್ಗಳು ಬ್ಯಾಟಿಂಗ್ ನಡೆಸುವಾಗ ಗಾಯಗೊಂಡಿದ್ದಾರೆ.
ಪ್ಯಾಟ್ ಕಮ್ಮಿನ್ಸ್ ಬೌಲಿಂಗ್ನಲ್ಲಿ ಮೊಣಕೈಗೆ ಪೆಟ್ಟು ತಿಂದಿರುವ ರಿಷಭ್ ಪಂತ್ ಮತ್ತು ಸ್ಟಾರ್ಕ್ ಬೌಲಿಂಗ್ನಲ್ಲಿ ಹೆಬ್ಬೆರಳ ಗಾಯಕ್ಕೆ ಒಳಗಾಗಿರುವ ಜಡೇಜಾ ಮೈದಾನದಿಂದ ಹೊರಗುಳಿದಿದ್ದಾರೆ. ಇವರಿಬ್ಬರು ಸ್ಕಾನಿಂಗ್ಗಾಗಿ ತೆರಳಿದ್ದಾರೆಂದು ಬಿಸಿಸಿಐ ತಿಳಿಸಿದೆ.
ಒಂದು ವೇಳೆ ಇವರಿಬ್ಬರು ತಂಡದಿಂದ ಹೊರಬಿದ್ದರೆ ಭಾರತ ತಂಡಕ್ಕೆ 2ನೇ ಇನ್ನಿಂಗ್ಸ್ ವೇಳೆ ಕೇವಲ 9 ಮಂದಿ ಬ್ಯಾಟ್ಸ್ಮನ್ಗಳು ಮಾತ್ರ ಬ್ಯಾಟಿಂಗ್ ಮಾಡಬೇಕಾದ ಒತ್ತಡದಕ್ಕೆ ಸಿಲುಕಲಿದೆ.
ಪಂತ್ ಗಾಯದಿಂದ ಚೇತರಿಸಿಕೊಳ್ಳದಿದ್ದರೆ ವೃದ್ಧಿಮಾನ್ ಸಹಾ ಅವರೇ 4ನೇ ಟೆಸ್ಟ್ ಪಂದ್ಯಕ್ಕೆ ವಿಕೆಟ್ ಕೀಪರ್ ಜವಾಬ್ದಾರಿ ನಿರ್ವಹಿಸಬಹುದು. ಆದ್ರೆ ರವೀಂದ್ರ ಜಡೇಜಾ ಅವರ ಸ್ಥಾನ ತುಂಬಬಲ್ಲ ಆಟಗಾರ ಟೀಮ್ ಇಂಡಿಯಾದಲ್ಲಿ ಯಾರೂ ಇಲ್ಲದಿರುವುದು ಟೀಮ್ ಮ್ಯಾನೇಜ್ಮೆಂಟ್ಗೆ ತಲೆನೋವು ತರಿಸಿದೆ.
ಇದನ್ನು ಓದಿ: ಆಸೀಸ್ಗೆ ಲಾಬುಶೇನ್, ಸ್ಮಿತ್ ಆಸರೆ: ದಿನಾಂತ್ಯಕ್ಕೆ 197 ರನ್ ಮುನ್ನಡೆ ಸಾಧಿಸಿದ ಕಾಂಗರೂ ಪಡೆ
