ವೆಲ್ಲಿಂಗ್ಟನ್: ನ್ಯೂಜಿಲ್ಯಾಂಡ್ ತಂಡದ ಮಾಜಿ ಬ್ಯಾಟ್ಸ್ಮನ್ ಜಾನ್ ಎಫ್ ರೀಡ್ ತಮ್ಮ 64ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆಂದು ನ್ಯೂಜಿಲ್ಯಾಂಡ್ ಕ್ರಿಕೆಟ್ ಮಂಡಳಿ ಮಂಗಳವಾರ ತಿಳಿಸಿದೆ.
ರೀಡ್ ಕಿವೀಸ್ ಪರ 19 ಟೆಸ್ಟ್ ಪಂದ್ಯಗಳನ್ನಾಡಿದ್ದು, ಇದರಲ್ಲಿ 6 ಶತಕ ಸಿಡಿಸಿದ್ದರು. ಅವರು 80ರ ದಶಕದಲ್ಲಿ ನ್ಯೂಜಿಲ್ಯಾಂಡ್ ತಂಡ ಪ್ರಮುಖ ಬ್ಯಾಟ್ಸ್ಮನ್ ಆಗಿದ್ದರು. ಅವರು ಆಸ್ಟ್ರೇಲಿಯಾ ವಿರುದ್ಧ 1985ರಲ್ಲಿ ಬ್ರಿಸ್ಬೇನ್ನಲ್ಲಿ ನಡೆದಿದ್ದ ಪಂದ್ಯದಲ್ಲಿ ಶತಕ ಸಿಡಿಸಿ ಇನ್ನಿಂಗ್ಸ್ ಹಾಗೂ 41 ರನ್ಗಳ ಐತಿಹಾಸಿಕ ಜಯ ಸಾಧಿಸಲು ನೆರವಾಗಿದ್ದರು.
ಅವರು ಆ ಪಂದ್ಯದಲ್ಲಿ ಮಾರ್ಟಿನ್ ಕ್ರೋವ್(188) ಜೊತೆಗೆ 225 ರನ್ಗಳ ಜೊತೆಯಾಟ ನಡೆಸಿ 553-7 ರನ್ಗಳ ಬೃಹತ್ ಮೊತ್ತ ದಾಕಲಿಸಲು ನೆರವಾಗಿದ್ದರು. ಈ ಪಂದ್ಯದಲ್ಲಿ ಜಾನ್ ರೀಡ್ 108 ರನ್ಗಳಿಸಿದ್ದರು. ರಿಚರ್ಡ್ ಹ್ಯಾಡ್ಲೀ ಮೊದಲ ಇನ್ನಿಂಗ್ಸ್ನಲ್ಲಿ 9 ಹಾಗೂ 2ನೇ ಇನ್ನಿಂಗ್ಸ್ನಲ್ಲಿ 6 ವಿಕೆಟ್ ವಿಕೆಟ್ ಪಡೆದು ಇನ್ನಿಂಗ್ಸ್ ಜಯಕ್ಕೆ ಕಾರಣರಾಗಿದ್ದರು.
1979ರಿಂದ 1986ರವರೆಗೆ ನ್ಯೂಜಿಲ್ಯಾಂಡ್ ತಂಡ ಪ್ರತಿನಿಧಿಸಿದ್ದ ಅವರು 46 ಸರಾಸರಿಯಲ್ಲಿ 1296 ರನ್ಗಳಿಸಿದ್ದರು. ಇದೇ ಹೆಸರಿನಲ್ಲಿ ಪ್ರಸಿದ್ಧರಾಗಿದ್ದ ನ್ಯೂಜಿಲ್ಯಾಂಡ್ ಮಾಜಿ ನಾಯಕ ಜಾನ್ ಆರ್ ರೀಡ್ ಅಕ್ಟೋಬರ್ನಲ್ಲಿ ನಿಧನರಾಗಿದ್ದಾರೆ.
