ಲಂಡನ್: ಕೆಂಟ್ ತಂಡದ ಬ್ಯಾಟ್ಸ್ಮನ್ ಜೋರ್ಡಾನ್ ಕಾಕ್ಸ್ ಬಾಬ್ಸ್ ವಿಲ್ಸ್ ಟ್ರೋಫಿಯಲ್ಲಿ ಮಿಡಲ್ಎಸೆಕ್ಸ್ ವಿರುದ್ದ ಪಂದ್ಯ ನಡೆಯುತ್ತಿರುವಾಗ ಕೋವಿಡ್ 19 ಪ್ರೋಟೋಕಾಲ್ಗಳನ್ನು ಮೀರಿ ಅಭಿಮಾನಿಗಳೊಂದಿಗೆ ಸೆಲ್ಫಿ ತೆಗೆದುಕೊಂಡಿದ್ದಕ್ಕೆ ಒಂದು ಪಂದ್ಯದಿಂದ ಹೊರಗಿಡಲಾಗಿದೆ.
ಅಭಿಮಾನಿಗಳ ಮನವಿಗೆ ಮಣಿದು ಸೆಲ್ಫಿಗೆ ಫೋಸ್ ಕೊಡುವ ಮೂಲಕ ಕಾಕ್ಸ್ ಬಯೋಸೆಕ್ಯೂರ್ ಮತ್ತು ಸಾಮಾಜಿಕ ಅಂತರದ ನಿಯಮವನ್ನು ಮುರಿದಿರುವುದಕ್ಕೆ ಮುಂದಿನ ಪಂದ್ಯದಿಂದ ಹೊರಗಿಡಲಾಗಿದೆ.
" ಈ ಘಟನೆ ಸಂಭವಿಸಿರುವುದಕ್ಕೆ ನಾನು ಕ್ಷಮೆ ಕೋರುತ್ತೇನೆ. ನಾನು ಇದರಿಂದ ಎಲ್ಲ ಪರಿಣಾಮಗಳನ್ನು ಅರ್ಥಮಾಡಿಕೊಂಡಿದ್ದೇನೆ. ನನ್ನ ತಪ್ಪಿಗೆ ಎಲ್ಲರನ್ನೂ ಕ್ಷಮೆಯಾಚಿಸಲು ಬಯಸುತ್ತೇನೆ" ಎಂದು ಕಾಕ್ಸ್ ಕೆಂಟ್ ವೆಬ್ಸೈಟ್ಗೆ ತಿಳಿಸಿದ್ದಾರೆ.
"ನಾನು ಮುಂದಿನ ಪಂದ್ಯದಲ್ಲಿ ಆಡದಿರುವುದಕ್ಕೆ ನೋವುಂಟಾಗಿದೆ. ನನ್ನಿಂದ ಇಡೀ ತಂಡಕ್ಕೆ ನಿರಾಶೆಯುಂಟಾಗಿದೆ ಎಂದು ಭಾವಿಸುತ್ತೇನೆ" ಎಂದು ಅವರು ಹೇಳಿದ್ದಾರೆ.
ಇದೀಗ ಅವರು ಕ್ವಾರಂಟೈನ್ನಲ್ಲಿದ್ದು, ಕೋವಿಡ್ 19 ಪರೀಕ್ಷೆಯಲ್ಲಿ ನೆಗೆಟಿವ್ ಫಲಿತಾಂಶ ಬಂದನಂತರವಷ್ಟೇ ತಂಡಕ್ಕೆ ಮರಳಲಿದ್ದಾರೆ ಎಂದು ತಿಳಿದು ಬಂದಿದೆ.
" ಇದೊಂದು ದುರದೃಷ್ಟಕರ ಸಂಗತಿಯಾಗಿದೆ. ಏಕೆಂದರೆ ಜೋರ್ಡಾನ್ ಕಳೆದ ಪಂದ್ಯದಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದರೂ ಬೆನ್ನಲ್ಲೇ ಅವರು ತಂಡದ ವೈದ್ಯಕೀಯ ಪ್ರೋಟೋಕಾಲ್ಗಳನ್ನು ಉಲ್ಲಂಘಿಸಿದ್ದಾರೆ. ನಾವು ಈ ವೈದ್ಯಕೀಯ ಪ್ರೋಟೋಕಾಲ್ಗಳನ್ನು ಬಹಳ ಗಂಭೀರವಾಗಿ ಪರಿಗಣಿಸಿದ್ದೇವೆ. ಜೋರ್ಡಾನ್ ಕ್ವಾರಂಟೈನ್ಗೆ ಒಳಗಾಗುವುದನ್ನು ಬಿಟ್ಟರೆ ಬೇರೆ ದಾರಿಯೇ ಇಲ್ಲ " ಎಂದು ಕೆಂಟ್ ತಂಡದ ಡೈರೆಕ್ಟರ್ ಪಾಲ್ ಡಾಂಟನ್ ತಿಳಿಸಿದ್ದಾರೆ.
ಸಸೆಕ್ಸ್ ವಿರುದ್ಧದ ಕಳೆದ ಪಂದ್ಯದಲ್ಲಿ 19 ವರ್ಷದ ಜೋರ್ಡಾನ್ ಔಟಾಗದೇ 238 ರನ್ಗಳಿಸುವ ಮೂಲಕ ಹಲವಾರು ದಾಖಲೆಗಳೊಂದಿಗೆ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಅವರು 570 ಎಸೆತಗಳನ್ನು ಎದುರಿಸಿ 47 ಬೌಂಡರಿ ಹಾಗೂ 3 ಸಿಕ್ಸರ್ಗಳನ್ನ ಸಿಡಿಸಿದ್ದರು.
ಸಸೆಕ್ಸ್ ವಿರುದ್ಧ ಹೆಚ್ಚು ವೈಯಕ್ತಿಕ ರನ್ ಸಿಡಿಸಿದ ಕೆಂಟ್ ಬ್ಯಾಟ್ಸ್ಮನ್ ಹಾಗೂ ಕೌಂಟಿ ಇತಿಹಾಸದ ಮೊದಲ ಶತಕದಲ್ಲೇ ಅತಿ ಹೆಚ್ಚು ರನ್ಗಳಿಸಿದ ದಾಖಲೆಯನ್ನು ಜೋರ್ಡಾನ್ ಕಾಕ್ಸ್ ನಿರ್ಮಿಸಿದ್ದರು.
