ಮುಂಬೈ: ಜಂಟಲ್ಮೆನ್ ಕ್ರೀಡೆ ಕ್ರಿಕೆಟ್ನಲ್ಲಿ ದಾಖಲೆಗಳಿಗೆ ಬರವಿಲ್ಲ. ಆದರೆ ಈ ಸುದ್ದಿ ಅತ್ಯಂತ ಕಳಪೆ ಹಾಗೂ ತಂಡವೇ ನಾಚಿಕೆಪಡುವ ದಾಖಲೆ..!
ಹೌದು, ಮುಂಬೈನಲ್ಲಿ ನಡೆದ ಹ್ಯಾರಿಸ್ ಶೀಲ್ಡ್ ಪಂದ್ಯದಲ್ಲಿ ಚಿಲ್ಡ್ರನ್ ವೆಲ್ಫೇರ್ ಸೆಂಟರ್ ಸ್ಕೂಲ್ನ ಎಲ್ಲ ಆಟಗಾರರು ಶೂನ್ಯಕ್ಕೆ ನಿರ್ಗಮಿಸಿ ವಿಶೇಷ ಹಾಗೂ ಕೆಟ್ಟ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆಸಿಕೊಂಡಿದ್ದಾರೆ.
ಹ್ಯಾರಿಸ್ ಶೀಲ್ಡ್ ಟೂರ್ನಿಯ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಸ್ವಾಮಿ ವಿವೇಕಾನಂದ ಇಂಟರ್ನ್ಯಾಷನಲ್ ಸ್ಕೂಲ್ ತಂಡ ಲೀಲಾಜಾಲವಾಗಿ ರನ್ ಗಳಿಸುತ್ತಾ ಸಾಗಿತ್ತು. ಮೂರನೇ ಕ್ರಮಾಂಕದ ಆಟಗಾರ ಮೀತ್ ಮೆಯೇಕರ್ 338 ರನ್(56 ಬೌಂಡರಿ, 7 ಸಿಕ್ಸರ್) ಗಳಿಸಿ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು.
ಉಳಿದ ಬ್ಯಾಟ್ಸ್ಮನ್ಗಳಿಂದಲೂ ಪೂರಕ ಕೊಡುಗೆ ಬಂತು. ಚಿಲ್ಡ್ರನ್ ವೆಲ್ಫೇರ್ ಟೀಂ 57 ಇತರ ರನ್ ನೀಡಿದ್ದಲ್ಲದೆ, ನಿಗದಿತ ಸಮಯದಲ್ಲಿ 45 ಪೂರೈಸದ ಪರಿಣಾಮ 156 ರನ್ಗಳ ಪೆನಾಲ್ಟಿಯನ್ನು ಎದುರಾಳಿ ತಂಡಕ್ಕೆ ನೀಡಿತು. ಒಟ್ಟಾರೆ ಸ್ವಾಮಿ ವಿವೇಕಾನಂದ ತಂಡ 4 ವಿಕೆಟ್ ನಷ್ಟಕ್ಕೆ 761 ರನ್ ಗಳಿಸಿ ಇನ್ನಿಂಗ್ಸ್ ಮುಗಿಸಿತು.
ಆದರೆ 762 ರನ್ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಲು ಬಂದ ಚಿಲ್ಡ್ರನ್ ವೆಲ್ಫೇರ್ ತಂಡ ಆರೇ ಓವರ್ನಲ್ಲಿ ಇನ್ನಿಂಗ್ಸ್ ಕೊನೆಗೊಳಿಸಿತು. ಆದರೆ ಯಾವೊಬ್ಬ ಬ್ಯಾಟ್ಸ್ಮನ್ ಸಹ ರನ್ ಗಳಿಸಲಿಲ್ಲ ಎನ್ನುವುದು ವಿಶೇಷ. ಅಲೋಕ್ ಪೌಲ್ ಹ್ಯಾಟ್ರಿಕ್ ಸಹಿತ ಆರು ವಿಕೆಟ್ ಕಿತ್ತರು.
762 ರನ್ ಬಾರಿಸಿದ್ದ ಸ್ವಾಮಿ ವಿವೇಕಾನಂದ ತಂಡವನ್ನು ಹಲವಾರು ವರ್ಷಗಳ ಹಿಂದೆ ಹಿಟ್ಮ್ಯಾನ್ ರೋಹಿತ್ ಶರ್ಮಾ ಪ್ರತಿನಿಧಿಸಿದ್ದರು ಎನ್ನುವುದು ಉಲ್ಲೇಖನೀಯ. 761 ರನ್ಗಳ ಬೃಹತ್ ಗೆಲುವು ಸಾಧಿಸಿದ ಸ್ವಾಮಿ ವಿವೇಕಾನಂದ ತಂಡ ಹ್ಯಾರಿಸ್ ಶೀಲ್ಡ್ ಟೂರ್ನಿಯ 126 ವರ್ಷದ ಇತಿಹಾಸದಲ್ಲಿ ನೂತನ ದಾಖಲೆ ಬರೆಯಿತು.
