ಮುಂಬೈ: ರೋಹಿತ್ ಶರ್ಮಾ ನೇತೃತ್ವದ ಮುಂಬೈ ಇಂಡಿಯನ್ಸ್ ವಿರುದ್ಧ ಪಂಜಾಬ್ ಕಿಂಗ್ಸ್ 12 ರನ್ಗಳ ರೋಚಕ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ಪಂಜಾಬ್ ತಂಡದ ಬೌಲರ್ಗಳು ಸ್ಟಾರ್ ಬ್ಯಾಟರ್ಗಳಿರುವ ಮುಂಬೈ ತಂಡವನ್ನು ನಿಯಂತ್ರಿಸುವಲ್ಲಿ ಯಶಸ್ವಿಯಾದರು. ಅದರಲ್ಲೂ ವಿಕೆಟ್ ಪಡೆಯದಿದ್ದರೂ ಸಹಾ ಅರ್ಶದೀಪ್ ಸಿಂಗ್ ಅವರ ಕರಾರುವಾಕ್‌ ಬೌಲಿಂಗ್ ಪ್ರದರ್ಶನ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿತ್ತು.
ಮಯಾಂಕ್ ಅಗರ್ವಾಲ್, ಶಿಖರ್ ಧವನ್ ಅವರ ಅರ್ಧಶತಕಗಳ ನೆರವಿನಿಂದ ಪಂಜಾಬ್ 199ರನ್ಗಳ ಸ್ಪರ್ಧಾತ್ಮಕ ಗುರಿ ನೀಡಿತ್ತು. ಈ ಮೊತ್ತವನ್ನು ಬೆನ್ನಟ್ಟಿದ ತಂಡ ಒಂದು ಹಂತದಲ್ಲಿ ಗೆಲುವಿನ ಸನಿಹ ಬಂದಿತ್ತು. ಆದರೆ, ರಬಾಡ ಒಡಿಯನ್ ಸ್ಮಿತ್ ಮತ್ತು ಅರ್ಶದೀಪ್ ಸಿಂಗ್ ಅದ್ಭುತವಾಗಿ ಬೌಲಿಂಗ್ ಮಾಡಿ ಪಂದ್ಯದ ಗತಿ ಬದಲಿಸಿದರು.
ಮುಂಬೈ ಈ ಪಂದ್ಯವನ್ನು ಗೆಲ್ಲಲು 18 ಎಸೆತಗಳಲ್ಲಿ 33 ರನ್ ಗಳಿಸಬೇಕಿತ್ತು. ನಿರ್ಣಾಯಕ 18ನೇ ಓವರ್ ಎಸೆದ ಅರ್ಶದೀಪ್ ಇನ್ಫಾರ್ಮ್ ಬ್ಯಾಟರ್ ಸೂರ್ಯಕುಮಾರ್ ಯಾದವ್ ಇದ್ದರೂ ಕೂಡ ಕೇವಲ 5 ರನ್ ಮಾತ್ರ ನೀಡಿ ಪಂದ್ಯದ ಸಮೀಕರಣವನ್ನು 12 ಎಸೆತಗಳಲ್ಲಿ 28 ರನ್ ಗಳಿಸುವ ಅನಿವಾರ್ಯತೆ ಸೃಷ್ಟಿಸಿದರು. ಈ ಪ್ರದರ್ಶನವನ್ನು ಪ್ರಶಂಸಿಸಿರುವ ಕಮೆಂಟೇಟರ್ ಹಾಗೂ ಮಾಜಿ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್ ಅರ್ಶದೀಪ್ ವಿಶ್ವಕಪ್ ತಂಡದಲ್ಲಿ ಆಡಿಸಬಹುದಾದಂತಹ ಪ್ರತಿಭೆ ಎಂದಿದ್ದಾರೆ.
ಭಾರತ ತಂಡ ಹೆಚ್ಚುವರಿ ಆಯ್ಕೆಯಾಗಿ ಅರ್ಶದೀಪ್ ಅವರ ಕಡೆ ನೋಡಬೇಕು. ಅರ್ಶ್ದೀಪ್ ಅವರು ನಿಮ್ಮ ಟಿ20 ತಂಡದಲ್ಲಿ ಹೊಂದಬಹುದಾದ ಉತ್ತಮ ಬೌಲರ್. ಭುವನೇಶ್ವರ್ ಕುಮಾರ್ ತಮ್ಮ ನೈಜ ಫಾರ್ಮ್ನಲ್ಲಿಲ್ಲದ ಕಾರಣ ಅರ್ಶ್ದೀಪ್ ತಂಡಕ್ಕೆ ಉತ್ತಮ ಆಯ್ಕೆಯಾಗಿದ್ದಾರೆ ಎಂದು ಇಸ್ಪಿಎನ್ ಕ್ರಿಕ್ಇನ್ಫೋಗೆ ತಿಳಿಸಿದ್ದಾರೆ.
ಭಾರತ ತಂಡ ಭುವನೇಶ್ವರ್ ಅವರಿಗೆ ನೀಡುವ ಬೆಂಬಲವನ್ನು ಮುಂದುವರಿಸಬಹುದು. ಅವರೊಬ್ಬ ಅದ್ಭುತ ಬೌಲರ್, ಆದರೆ ಇಂದು ನೀವೇನಾದರೂ ಭುವನೇಶ್ವರ್ ಮತ್ತು ಅರ್ಶ್ದೀಪ್ ನಡುವೆ ಹೋಲಿಕೆ ಮಾಡಿದರೆ, ಯುವ ಬೌಲರ್ ನಿಮ್ಮ ತಂಡದಲ್ಲಿ ಇರಬಹುದಾದ ಉತ್ತಮ ಬೌಲರ್ ಆಗಿರುತ್ತಾರೆ. ಸೂರ್ಯಕುಮಾರ್ ಯಾದವ್ ಅಂತಹ ಬ್ಯಾಟರ್ ಈ ಬೌಲರ್ಗೆ ದೊಡ್ಡ ಹೊಡೆತ ಸಿಡಿಸಲಾಗದೇ ಸಿಂಗಲ್ಸ್ ತೆಗೆದುಕೊಳ್ಳುವುದು ಸೂಕ್ತ ಎಂದು ಭಾವಿಸುತ್ತಿದ್ದಾರೆ. ಹಿಂದೆ ಬುಮ್ರಾ ಮತ್ತು ಮಾಲಿಂಗ ಓವರ್ಗಲಲ್ಲಿ ಬ್ಯಾಟರ್ಗಳು ಈ ರೀತಿ ಆಲೋಚಿಸುತ್ತಿದ್ದರು ಎಂದು ಮಂಜ್ರೇಕರ್ ತಿಳಿಸಿದ್ದಾರೆ.
ಇದನ್ನೂ ಓದಿ:ಟಿ20 ವಿಶ್ವಕಪ್ಗೆ ಫಿನಿಶರ್ ಹುಡುಕಾಟ: ಭಾರತ ತಂಡಕ್ಕೆ 'ಡಿಕೆ' ಪರಿಹಾರವಾಗಬಲ್ಲರೇ?
